તાજેતરમાં મ્યુનિસિપલ કોર્પોરેશનના સત્તાવાળાઓએ જાહેરમાં થૂંકનાર નાગરિકને રૂ.૧૦૦નો ઇ-મેમો ફટકારીને આ રીતે સ્વચ્છતાના મામલે ઇ-મેમો આપનાર દેશભરનું પહેલું કોર્પોરેશન બનવાનું ગૌરવ પ્રાપ્ત કર્યું. તંત્ર દ્વારા પાનના ગલ્લા પાસે પિચકારી મારનાર લોકોને પણ દંડવાની ઝુંબેશ હાથ ધરાઇ છે.
જોકે આ નવી ઝુંબેશમાં ધૂમ્રપાન (સ્મોકિંગ) વિરોધી અભિયાનને પડતું મુકાયું છે. જેના કારણે આગામી દિવસોમાં સત્તાવાળાઓ કંઇક નવું ગતકડું કાઢીને તેમાં વ્યસ્ત થઇ જશે તેવી ચર્ચા પણ ઊઠી છે.
તંત્ર દ્વારા જાહેરમાં થૂંકનાર નાગરિકો સામે દંડાત્મક કાર્યવાહી શરૂ કરાઇ છે. ગયા રવિવારે સ્ટેડિયમ ચાર રસ્તા પાસે મહેશકુમાર નામના વાહનચાલક જાહેરમાં થૂંકતાં સીસીટીવી કેમેરામાં ઝડપાતાં તેમને તંત્રે તમાકુ નિયંત્રણ અધિનિયમ ર૦૦૩ હેઠળ રૂ.૧૦૦નો દંડ ફટકાર્યો હતો. આ વાહનચાલકની બાઇકના નંબર પ્લેટના આધારે સત્તાવાળાઓએ તેમના સરનામે ઇ-મેમો મોકલીને દંડની વસૂલાત કરી હતી.
શહેરને વધુ સ્વચ્છ-સંુદર બનાવવા માટે તંત્ર દ્વારા જાહેરમાં પેશાબ કરનાર કે થૂંકનાર સામે પણ દંડાત્મક કાર્યવાહી કરાય છે. આ ઉપરાંત પાનના ગલ્લાની આજુબાજુ અનેક ગ્રાહકોને પાન-મસાલો ખાતાં ખાતાં કે ખાઇને પિચકારી મારવાની કુટેવ હોઇ આ મામલે પણ તંત્રે લાલ આંખ કરી છે. પાનના ગલ્લાની આસપાની જગ્યામાં પિચકારી મારતા ગ્રાહકો અટકે તે માટે થૂંકદાની રાખવી ફરજિયાત કરાઇ છે. તેમ છતાં જો પિચકારી મારેલી હોય તો તેવા કિસ્સામાં પાનના ગલ્લાવાળાને રૂ.ર,૦૦૦ સુધીનો દંડ કરાય છે. મ્યુનિસિપલ સોલિડ વેસ્ટ મેનેજમેન્ટ વિભાગના સ્વચ્છતા જાળવી રાખવા અપનાવાયેલા આ નવતર અભિગમને અમુક અંશે લોકોએ આવકાર્યો પણ છે.
જોકે જે તમાકુ નિયંત્રણ અધિનિયમ-ર૦૦૩ હેઠળ મહેશકુમાર દંડાયા હતા તે અધિનિયમ હેઠળ જાહેરમાં સ્મોકિંગ (ધૂમ્રપાન) કરતા લોકો સામે હવે કાર્યવાહી કરાતી નથી. આ અધિનિયમમાં જાહેર સ્થળો જેવા કે ઓફિસ, થિયેટર, મોલ, કોર્ટ બિલ્ડિંગ, શૈક્ષણિક સંસ્થાઓ, રેસ્ટોરાં, હોસ્પિટલ, ઓડિટોરિયમ, લાઇબ્રેરી, રેલવે સ્ટેશન, બસસ્ટોપ, કામકાજના સ્થળોએ સ્મોકિંગ પર કડક પ્રતિબંધ મુકાયો છે.
આ કાયદાનું પાલન નહીં કરનાર વ્યકિત કે સંસ્થા સામે રૂ.ર૦૦ સુધીનો દંડ વસૂલવાની કાયદેસરની જોગવાઇ છે, પરંતુ હવે આ અભિયાન ઠપ થયું છે. કેમ કે મ્યુનિસિપલ હેલ્થ વિભાગ પાસે પૂરતો સ્ટાફ જ નથી. જ્યારે સોલિડ વેસ્ટ મેનેજમેન્ટ વિભાગ પાસે આ કાર્યવાહી કરવા વધારાનો સ્ટાફ નથી.