વડોદરા કોર્પોરેશનની છપાયેલી વર્ષ 2018ની ડાયરી લોકો સુધી પહોંચે તે પહેલા જ વિવાદનું કેન્દ્ર બની છે. ડાયરીના મુખ્ય પેજ પર કમળના નિશાનમાં PM મોદી વિજય રૂપાણી નીતિન પટેલનો ફોટો છપાતાં વિપક્ષના નેતા તથા કોંગ્રેસના કાઉન્સિલરોએ વિરોધ કર્યો છે.
ડાયરીમાંથી વિપક્ષ અને અન્ય પાર્ટીના કાઉન્સિલરોના નામ ફોટા સરનામાં ગાયબ થતાં વિરોધ ઉભો થયો છે. ડાયરી પ્રજાને કોર્પોરેશનની વ્યવસ્થા તથા તમામ સેવાકીય વિભાગોની માહિતી તેમજ વિવિધ કોન્ટેકટ નંબર સહિતની જાણકારી મળે તે હેતુસર પ્રસિધ્ધ કરવામાં આવે છે. પરંતુ ભાજપની સત્તા પક્ષ ફક્ત તેમના પક્ષના પ્રચાર માટે અને પ્રસિદ્ધિ મેળવવા લોકોના નાણાંનો દુરૂઉપયોગ કરે છે.
જો કે સમગ્ર મામલે શાસક પક્ષ હરકતમાં આવ્યો છે અને તમામ ડાયરીઓ પાછી મંગાવી છે અને ડાયરી તૈયાર કરનાર એજન્સીને નોટીસ પાઠવી છે. ઉલ્લેખનીય છે કે 3 હજાર 500 ડાયરીઓમાંથી મોટાભાગની ડાયરીઓમાં 19 વોર્ડના 76 કાઉન્સિલરના ફોટા અને વિગતોમાંથી 1 થી 8 વોર્ડની જાણકારી અપાઈ છે.
બાકીના વોર્ડ 9 થી 19 સુધીના કાઉન્સિલરના ફોટા નામ સહિતની જાણકારી ગાયબ કરી દેવાઇ છે. સાથે કોર્પોરેશનની જે કામગીરીના ફોટા છપાય છે. તેમાં મોટા ભાગના ફોટામાં મેયર ભરત ડાંગર જ દેખાય છે. જેમનો મેયર તરીકેનો કાર્યકાળ આગામી ત્રણ માસમાં પૂર્ણ થાય છે.