સુરતઃ શહેરના ડુમ્મસમાં યોજાયેલા ડાયરામાં રૂપિયા ઉછાળવાની બાબતે બબાલ થઈ હતી. લોક ગાયક ગીતા રબારીના ડાયરામાં રૂપિયા ઉડાવવાના મામલે બોલાચાલી થઈ હતી. જેના પગલે ગીતા રબારીને કાર્યક્રમ છોડવાની ફરજ પડી હતી. તો બાદમાં આ વીડિયો સોશિયલ મીડિયામાં વાયરલ થયો હતો.
તાપી માતાના જન્મદિવસ નિમિતે ડુમસમાં ડાયરાનો આયોજન કરવામાં આવ્યું હતું. લોક ગાયક ગીતા રબારી કાર્યક્રમમાં ભજન ગાઇ રહી હતી. તે દરમિયાન અસામાજિક તત્વો નશાની હાલતમાં સ્ટેજ પર ચડી ગયા હતા. ત્યારબાદ ડાયરાને અટકાવી દેવામાં આવ્યો હતો અને કલાકાર ગીતા રબારી સ્ટેજ છોડીને જતી રહી હતી.
આ અસામાજિક તત્વો નશામાં દાદાગીરી કરવા લાગ્યા હતા અને કોઇ સમજાવે તો તેને માર પડતો હતો. આ ઘટના અંગે પોલીસને જાણ થતા પોલીસ સ્થળ પર દોડી આવી હતી.