નોટિસ / મોદી સરકારના ખાસ મંત્રી અને દીકરાને પોલીસનું તેડું, સુશાંત કેસમાં લગાવ્યા હતા ગંભીર આરોપ

• કેન્દ્રીય મંત્રી નારાયણ રાણે અને પુત્ર નિતેશ રાણેને સમન્સ
• નારાયણ રાણે અને નિતેશ રાણે પર છે ગંભીર આરોપ
• અગાઉ દિશા સાલિયાનના સંબંધીઓને બદનામ કરવા બદલ નોંધાઇ હતી FIR

જાણો નારાયણ-નિતેશ રાણે પર શું છે આરોપ?

નારાયણ રાણે અને તેમના ધારાસભ્ય પુત્ર નિતેશ રાણે પર દિવંગત બોલિવૂડ અભિનેતા સુશાંત સિંહ રાજપૂતના પૂર્વ મેનેજર દિવંગત દિશા સાલિયાનના પરિવારજનોને અલગ-અલગ મીડિયા પ્લેટફોર્મ પર બદનામ કરવાનો આરોપ લગાવ્યો છે. આ મામલે દિશાની માતા વસંતી સાલિયાનની ફરિયાદ પર મુંબઈ પોલીસે ગયા મહિને બંને વિરુદ્ધ કેસ નોંધ્યો હતો. એફઆઈઆર FIR ભારતીય દંડ સંહિતાની વિવિધ કલમ અંતર્ગત દાખલ કરવામાં આવી છે. જેમાં કલમ 211, 500 અને ઇન્ફોર્મેશન ટેક્નોલોજી એક્ટની કલમ 67 પણ સામેલ છે. હાલમાં આ મામલે વધુ તપાસ ચાલુ હોવાનું પોલીસ અધિકારીએ જણાવ્યું હતું.

દિશાની માતાએ ખટખટાવ્યો હતો મહિલા આયોગનો દરવાજો

વસંતી સાલિયાનએ મહારાષ્ટ્ર સ્ટેટ કમિશન ફોર વુમન (MSWC) નો સંપર્ક સાધ્યો હતો અને સોશિયલ મીડિયા પ્લેટફોર્મ્સ પર સાલિયાન પરિવારને બદનામ કરવા બદલ નારાયણ રાણે, નિતેશ રાણે અને અન્યો સામે પગલાં લેવાની માંગ પણ કરી હતી. ત્યાર બાદ MSWC એ પોલીસને દિશા સાલિયાનના મૃત્યુ વિશે ખોટી માહિતી ફેલાવતા સોશિયલ મીડિયા એકાઉન્ટ્સને બ્લોક કરવા તેમજ આ મામલે નારાયણ રાણે અને નિતેશ બંને સામે પગલાં લેવા જણાવ્યું હતું.

MSWC અધ્યક્ષ રૂપાલી ચાકણકરે અનેક ટ્વિટ કરીને જણાવ્યું હતું કે, માલવાની પોલીસે (મુંબઈમાં) કમિશનને જણાવ્યું કે, સાલિયાનની પોસ્ટમોર્ટમ રિપોર્ટમાં કહેવાયું છે કે, તેણી પર બળાત્કાર નથી થયો અને તે ગર્ભવતી ન હોતી. નારાયણ રાણેએ પ્રેસ કોન્ફરન્સ સંબોધિત કરીને દિશા સાલિયાનના મૃત્યુને લઈને અનેક દાવા કર્યા હતાં.

દિશાએ 8 જૂન 2020ના રોજ કરી હતી આત્મહત્યા

તમને જણાવી દઇએ કે, દિશા સાલિયાને મલાડમાં આવેલી એક બહુમાળી ઇમારત પરથી કથિત રીતે 8 જૂન, 2020 ના રોજ કૂદીને આત્મહત્યા કરી લીધી હતી. તેના છ દિવસ પહેલાં સુશાંત સિંહ રાજપૂત (34) ની પણ બાંદ્રામાં આવેલ પોતાના એપાર્ટમેન્ટમાં લટકતી હાલતમાં લાશ મળી આવી હતી.