ડમી સિમકાર્ડને લઈ રાજ્યમાં અનેક ગુના નોંધાયા છે. જેમાં એક જ વ્યક્તિના ફોટોનો દુરઉપયોગ કરી રાજ્યભરમાં 29 હજારથી વધુ સિમકાર્ડ ઈસ્યુ થયાનો પણ ઘટસ્ફોટ થયો છે.
સિમકાર્ડના દુરઉપયોગને લઈ નોંધાયા ગુના
એક જ વ્યક્તિના ફોટો પર સિમકાર્ડ કરાયા એક્ટિવ
29 હજારથી વધુ સિમકાર્ડ ઈસ્યુ થયાનો ખુલાસો
રાજ્યામાં સિમકાર્ડના દુરૂપયોગ અંગે પોલીસ દ્વારા કાર્યવાહી કરવામાં આવી રહી છે. ત્યારે આ મામલે માહિતી સામે આવી છે. જેમાં સિમકાર્ડના દુરૂપયોગને લઈ રાજ્યમાં અનેક ગુના નોંધાયા છે. જેમાં એક જ વ્યક્તિના ફોટોનો દુરઉપયોગ કરી સિમકાર્ડ એક્ટિવ કરાવવામાં આવ્યા હોવાનો પર્દાફાશ થયો છે. વધુમા રાજ્યભરમાં 29 હજારથી વધુ સિમકાર્ડ ઈસ્યુ થયાનો પણ ઘટસ્ફોટ થયો છે. જેની તપાસમાં સામાન્ય વ્યક્તિના દસ્તાવેજ પર એક જ ફોટો લગાવી સિમકાર્ડ વેચાયા છે. જે સિમ છેતરપિંડી, ક્રિકેટ સટ્ટો, ગેમ્બલિંગ સહિતના ગેરકાયદે કામમાં વપરાતા હોવાની શકયતા હોવાથી હવે પોલીસ દ્વારા આ દિશામા કાર્યવાહી હાથ ધરાઈ રહી છે. 486 જેટલા ફોટાનો દુરઉપયોગ કરી સીમકાર્ડ વેચાયાનું સામે આવતા રાજ્યભરમાં 15 ગુના દાખલ કરી 18 આરોપીની ધરપકડ કરાઈ હોવાનું સત્તાવાર નિવેદન સામે આવ્યું છે.
ગુજરાતમાં સિમકાર્ડના દુરૂપયોગને લઈ માહિતી આવી સામે, 29 હજારથી વધુ ડમી સિમકાર્ડ ઈસ્યુ થયા, સામાન્ય વ્યક્તિના ડોક્યુમેન્ટ પર એક જ ફોટો લગાવી વેચાયા સિમકાર્ડ, 486 જેટલા ફોટાનો દુરઉપયોગ, 15 ગુના દાખલ કરી 18 આરોપીની કરી ધરપકડ#gujarat#simcard#misuse#vtvgujaratipic.twitter.com/zaIxf9OGDR
— VTV Gujarati News and Beyond (@VtvGujarati) April 16, 2023
અમદાવાદ પોલીસે કરી હતી કાર્યવાહી
અમદાવાદ સહિત દેશભરમાં આતંકી સંગઠન ઈન્ડિયન મુજાહિદ્દીનની મોડસ ઓપરેન્ડી પકડાયા પછી ડમી સિમકાર્ડનો ઉપયોગ ટાળવા માટે અનેક કાયદા સુધારવામાં આવ્યા છે, પણ, બદલાયેલા કાયદામાંથી છીંડાં શોધી ડમી સિમકાર્ડનાં વેચાણ અને ઉપયોગ કરવાના ગોરખધંધા બેરોકટોક ચાલી રહ્યા હોવાનું બહાર આવ્યું છે. બોગસ કોલ સેન્ટર, ક્રિકેટ સટ્ટો, ખંડણી, ધમકી જેવા અનેક ગંભીર પ્રકારના ગુનાને રોકવા માટે ગુજરાત પોલીસ એલર્ટ મોડ પર આવી ગઇ છે અને બોગસ ડોક્યુમેન્ટ બનાવીને સિમકાર્ડ વેચનાર લોકો પર તવાઇ બોલાવી રહી છે. ગુજરાત એટીએસએ કેટલાક શંકાસ્પદ નંબર અમદાવાદ એસઓજીની ટીમને આપ્યા હતા.
ડોક્યુમેન્ટનો દુરુપયોગ કરતા હતા
જેના આધારે તાજેતરમાં એસઓજીની ટીમે મણિનગરની માહી એન્ટરપ્રાઇઝ નામના કર્મચારી તેમજ માલિક વિરુદ્ધ ચીટિંગનો ગુનો દાખલ કર્યો હતો. એટીએસએ સિમકાર્ડ અંગેના ઇનપુટ એસઓજી કચેરીને આપ્યા હતા જેમાં સિમકાર્ડ વેચતા પીઓએસ (પોઇન્ટ ઓફ સેલ) ડીટેઇલ આપી હતી. સિમકાર્ડ વેચતા પીઓએસ અલગ અલગ વ્યકિતનાં નામે સિમકાર્ડ એક્ટિવ કરવા સીએએફ (કોમન એપ્લિકેશન ફોર્મ) વિગતો ભરતા હતા. સિમકાર્ડ વેચતા લોકો ગ્રાહકોના ડોક્યુમેન્ટનો દુરુપયોગ કરીને તેની વિગતો સીએએફમાં ભરતા હતા અને બાદમાં તેમના કર્મચારીનો ફોટોગ્રાફ્સ અપલોડ કરીને સિમકાર્ડ ખરીદી લેતા હતા.
અગાઉ પોલીસે અંકિત પરમારની અટકાયત કરી હતી
થોડા દિવસ આગાઉ અમદાવાદ એસઓજીની ટીમે દામીલીમડા વિસ્તારમાં આવેલા ચામુંડાકૃપા નિવાસમાં રહેતા અંકિત પરમારની અટકાયત કરીને પૂછપરછ કરી હતી. અંકિતના ફોટોગ્રાફ્સના અધારે અલગ અલગ નામે સિમકાર્ડ ઇશ્યૂ થઇ ગયાં હતાં. એસઓજીએ અંકિત સમક્ષ હકીકત રજૂ કરી ત્યારે તે પણ ચોંકી ગયો હતો અને બાદમાં તેણે સમગ્ર હકીકત કહી દીધી હતી. અંકિત વર્ષ ૨૦૧૮માં મણિનગર ક્રોસિંગ પાસે આવેલી માહી એન્ટરપ્રાઇઝ નામના એરટેલના સ્ટોરમાં કોલર તરીકે નોકરી કરતો હતો. અંકિતનું કામ ગ્રાહકોને ફોન કરીને પોસ્ટપેડ કાર્ડ લેવા માટે સમજાવવાનું હતું. માહી એન્ટરપ્રાઇઝના માલિક રાહુલ ગજ્જર છે. જે પહેલાં જશોદાનગર અને હાલ યુકેમાં રહે છે. સેલેરી ઓછી પડતા અંકિતે વર્ષ ૨૦૨૧માં નોકરી છોડી દીધી હતી જ્યારે છેલ્લાં બે વર્ષથી માહી એન્ટરપ્રાઇઝ બંધ થઇ ગઇ છે.