વિધાતાએ મને જે આપ્યું.. તે મારું ભાગ્ય છે.. અને તે ભાગ્યને તો હું નથી બદલી શકતી.. પરંતુ હું એટલી પણ કમજોર નથી કે હું કોઈપર બોજ બનીને રહું.. : વંદના
દિવ્યાંગ વંદનાના સંઘર્ષને વંદન
માતા-પિતાની છત્રછાયા ગુમાવી
દિવ્યાંગ વંદના આત્મનિર્ભરતા સાથે જીવે છે જીવન
જો માનો તો હર પળમાં છે ખુશી. નહી તો નર્યુ મૃગજળ છે ખુશી" આજે આ સૂત્રને જેતપુરની એક દીકરીએ સાર્થક કરી બતાવ્યું છે. પોતે દિવ્યાંગ છે અને શરીર પર પોતાનો કંટ્રોલ પણ નથી.. પરંતુ તેના ઈરાદાઓ એટલા મક્કમ છે કે, તે સમાજમાં નાની-નાની બાબતોમાં ખોટું પગલું ભરી લેતા વિદ્યાર્થીઓ માટે એક પ્રેરણા છે. આજે ખુદના દમ પર આત્મનિર્ભર બની છે.
પગની મદદથી વંદના મોબાઈલ રિચાર્જ અને ઝેરોક્ષનું કામ કરે છે વંદના
આ દીકરી આપણા ગુજરાતના જેતપુરમાં રહેતી વંદના કટારિયા છે. જે 80 ટકા દિવ્યાંગ છે. બાળપણમાં જ તેના માથેથી પિતાની છત્રછાયા ગુમાવી ચૂકી છે. જન્મથી જ શારીરિક તકલીફોનો વંદના સામનો કરી રહી છે. પરંતુ ક્યારેય પણ તેણે હિંમત નથી હારી. પરંતુ દ્રઢ મનોબળ સાથે તેણે ખુદની જાતને એટલી સશક્ત બનાવી છે કે, આજે પોતાના દમ પર ગુજરાન ચલાવે છે. હાથનું સંતુલન ન હોવા છતાં પગની મદદથી વંદના મોબાઈલ રિચાર્જ અને ઝેરોક્ષનું કામને આત્મનિર્ભર જીવન જીવે છે.
માતા-પિતાએ વંદનાની સારવાર માટે પાણીની જેમ પૈસા વહાવ્યા હતા
વંદનાબેન અંગે લોકો જણાવે છે કે, તેના જન્મના થોડા દિવસો બાદ તેને કમળો થયો હતો. જેના કારણે તેના હાથ-પગ ખોટા પડી ગયા હતા. માતા-પિતાએ વંદનાની સારવાર માટે પાણીની જેમ પૈસા વહાવ્યા. પરંતુ તેની બીમારી ઠીક ન થઈ. આજે શરીરનું સંતુલન જળવાતું નથી. બોલવાથી ગરદન, હડપચી તેમજ મોઢાની નસો ખેંચાવાની તકલીફ થાય છે. જોકે પિતાની છત્રછાયા ગુમાવ્યા પછી પણ વંદનાએ હાર ન માની. આજે તે મોબાઈલ રિચાર્જ, લેપટોપ અને ઝેરોક્ષનું કામ પોતાના પગથી કરીને મહિને સારી એવી કમાણી કરે છે અને ગુજરાન ચલાવે છે.
ભોપાલની યુનિવર્સિટીમાં PGDCAનો અભ્યાસ પૂર્ણ કર્યો
આ દીકરી પર ગર્વ એટલા માટે થાય છે. કારણ કે, તેના શરીરનું સંતુલન ન જળવાતું હોવા છતાં.. માતાની મદદથી અભ્યાસ કર્યો.. માતાએ પણ તેને ભણાવવા માટે ખુબ પરિશ્રમ કર્યો અને ધીરે-ધીરે વંદના લખતા શીખી. વંદનાએ ધોરણ 7થી લઈને ગ્રેજ્યુએશન સુધીનો અભ્યાસ પણ રાઈટરની મદદથી પુરો કર્યો છે. ત્યારબાદ ભોપાલની યુનિવર્સિટીમાં પીજીડીસીઓનો અભ્યાસ પણ પૂર્ણ કર્યો.
3 વર્ષ પહેલા વંદનાના માતાનું અવસાન થયું
પરંતુ કુદરત જેની પરીક્ષા લે છે તેના માથે એક પછી એક દુઃખો આવતા રહે છે. ત્રણ વર્ષ પહેલા જ વંદનાના માથેથી માતાની છત્રછાયા પણ છિનવાઈ ગઈ. પરંતુ તેણે એ દુઃખનો ઘુંટડો પણ ગળે ઉતારી લીધો. આજે 22 વર્ષીય વંદના ફોટો કોપી કાઢવાનું કામ કરીને પોતાનું ગુજરાન ચલાવે છે.
અમિતાભ બચ્ચનની ફેન છે વંદના
તે અમિતાભ બચ્ચનની ફેન્સ હોવાથી તેમની સાથે તેમના જન્મ દિવસ પર પત્રવ્યવહાર પણ કરે છે. ઘરમાં પણ અમિતાભ બચ્ચનના ફોટો રાખ્યા છે. ગુજરાતની આ દીકરીની સંઘર્ષ ભરી કહાની જોઈ ગર્વ મહેસૂસ થાય છે. VTV NEWS આ દીકરીને સલામ કરે છે. આ સાથે જ આશા રાખે છે કે, સરકાર આ દીકરીને કોઈ નોકરીની તક આપે જેથી તેના સંઘર્ષમાં થોડો ઘટાડો થાય.