અરવલ્લી / યુથ કોંગ્રેસ બાયડના WhatsApp ગ્રુપમાં ગંદી બાત, કાર્યકર્તાએ લખ્યું 'જો આ મુદ્દો ઉછળશે તો ઘણા મહાનુભાવોએ જોવું પડશે નીચું'

• યુથ કોંગ્રેસ બાયડનું વોટ્સએપ ગ્રુપ વિવાદમાં
• યુથ કોંગ્રેસના બે યુવા કાર્યકરોએ મૂકી અશ્લીલ પોસ્ટ
• પોસ્ટ કરનારને ગ્રુપમાંથી રિમુવ કરવા કાર્યકરોની માંગ

આજના આ ડિજિટલ યુગમાં કેટલાંક અગ્રણી નેતાઓની માનસિકતા ઘણી વાર વોટ્સએપ ગ્રુપમાં છતી થતી રહે છે ત્યારે તાજેતરમાં જ વધુ એક એવી ઘટના સામે આવી છે. યુથ કોંગ્રેસ બાયડના વોટ્સએપ ગ્રુપમાં અશ્લીલ પોસ્ટ મૂકવામાં આવતા ભારે ચકચાર મચી ગઇ છે. યુથ કોંગ્રેસના રંગીન મિજાજી બે યુવા કાર્યકરોએ આ અશ્લીલ પોસ્ટ મૂકતા ગ્રુપના અન્ય સભ્યો ક્ષોભમાં મૂકાયા. ગ્રુપમાં અશ્લીલ પોસ્ટ વાયરલ થતા ગ્રુપના અન્ય સભ્યોમાં ભારે રોષ જોવા મળી રહ્યો છે. પોસ્ટ કરનારને ગ્રુપમાંથી રિમુવ કરવા કાર્યકરો માંગ કરી રહ્યાં છે. યુથ કોંગ્રેસ બાયડના ગ્રુપમાં ધારાસભ્ય સહિત અન્ય કોંગ્રેસના નેતાઓ સામેલ છે.

• યુથ કોંગ્રેસ બાયડના વોટ્સએપ ગ્રુપમાં મૂકાઇ અશ્લીલ પોસ્ટ
• યુથ કોંગ્રેસના બે યુવા કાર્યકરોએ ગ્રુપમાં મૂકી અશ્લીલ પોસ્ટ
• અશ્લીલ પોસ્ટ કરનારને ગ્રુપમાંથી રિમુવ કરવા કાર્યકરોની માંગ
• યુથ કોંગ્રેસ બાયડના ગ્રુપમાં ધારાસભ્ય સહિત અન્ય કોંગ્રેસ નેતાઓ સામેલ

વોટ્સએપ ગ્રુપમાં ધારાસભ્ય સહિત અનેક અગ્રણીઓ અને કાર્યકરો સામેલ

ઉલ્લેખનીય છે કે, આ અગાઉ બાયડ AAPના ગ્રુપમાં પણ અશ્લીલ પોસ્ટ વાયરલ થઈ હતી. વધુમાં જણાવી દઇએ કે, બાયડ યુથ કોંગ્રેસના વોટ્સએપ ગ્રુપમાં ધારાસભ્ય સહિત અનેક અગ્રણીઓ અને કાર્યકરો પણ જોડાયેલા છે. ત્યારે રવિવારે સાંજના અચાનક યુથ કોંગ્રેસના એક યુવા નેતાએ બે-ત્રણ અશ્લીલ વીડિયો પોસ્ટ કરતા ગ્રુપમાં અફડાતફડી મચી ગઇ હતી.

બંનેને ગ્રુપમાંથી દૂર કરવાની માંગ ઉઠી

ત્યાર બાદ તુરંત અન્ય એક યુવા કાર્યકરે પણ જાણે કે ગ્રુપમાં બિભત્સ વીડિયો વાયરલ કરવાની હોડ જામી હોય તેમ ફરીથી અશ્લીલ વીડિયો પોસ્ટ કરતાની સાથે બંનેને ગ્રુપમાંથી દૂર કરવાની માંગ ઉઠી હતી. આ સાથે આ પોસ્ટ મૂકતાની સાથે ગ્રુપમાં અન્ય કાર્યકરોએ લખ્યું હતું કે, આ મુદ્દો હવે વધારે ઉછળશે અને આ ઘટનાના કારણે કોંગ્રેસના દિગ્ગજ નેતાઓએ નીચું જોવાનો વારો આવશે.