હાર્દિક પટેલ આજે કોંગ્રેસ માટે ગુજરાતનો સ્ટાર છે તો હજારો લોકોના દિલમાં રાજ પણ કરે છે. પરંતુ મતદાનને માત્ર ગણતરીના જ કલાકોની વાર છે. ત્યારે પાટીદાર આગેવાન દિલીપ સાબવાએ રાજકીય વાતાવરણમાં ગરમાવો લાવી દીધો છે. દિલીપ સાબવાએ આક્ષેપ લગાવ્યો કે, 25 તારીખે બનેલા તોફાનો પૂર્વનિયોજીત હતા અને તેમાં હાર્દિકનો હાથ હતો.
દિલીપ સાબવા ગોહિલવાડનો એક એવો પાટીદાર ચહેરો છે જેના પર સમાજનું પ્રભૂત્વ હતુ. પાટીદાર આંદોલનના મુખ્ય ચહેરામાંનો એક ચહેરો હતા. હાર્દિક પટેલનો સુખ-દુઃખનો સાથીદાર. જ્યારે આંદોલન તમામ ચહેરાઓએ હાર્દિકનો સાથ છોડ્યો ત્યારે હાર્દિકની પડખે ઊભો રહેનાર આજે હાર્દિકનો જ દુશ્મન બની ગયો છે.
શું છે સાબવાના આક્ષેપો પર ધમાસાણ?
હાર્દિક પટેલ પર જ ગંભીર આક્ષેપ લગાવી રહ્યો છે. લોકસભા ચૂંટણી માટે મતદાનને માત્ર ગણતરીના જ કલાકોની વાર છે. તેવામાં દિલીપ સાબવાએ એવા આક્ષેપ લગાવ્યા કે, વાતાવરણમાં રાજકીય ગરમાવો લાવી દીધો છે.
સાબવાના આક્ષેપો અંગે વાત કરવામાં આવે તો તેના મતે 'પાટીદાર સમાજ વેદના સાથે અનામતની માંગ કરતો હતો. પરંતુ તેને 10 ટકા જ આર્થિક અનામત મળી છે. 25 ઓગસ્ટના પાટીદાર ક્રાંતિ સભા યોજાઈ હતી. જેમાં 3 હજાર આંદોલનકારીઓ બેઘર બન્યા હતા. આ આંદોલનમાં આંદોલનકારીઓએ જ કાંકરીચાળા કર્યા હતા. કારણ કે આ એક તોફાન કરાવવાનું ષડયંત્ર હતું. એટલું જ નહીં આદોલનકારીઓને કોંગ્રેસનો સપોર્ટ પણ હતો. આ ઉપરાંત પણ દિલીપ સાબવાએ હાર્દિક અને કોંગ્રેસના ઉમેદવાર લલિત કગથરા અને લલિત વસોયા પર ગંભીર આક્ષેપો કર્યા હતા.
આક્ષેપો મુદ્દે હાર્દિક પટેલે શું કહ્યું?
હાર્દિક પટેલે તો સાબવાના તમામ આક્ષેપોને પાયા વિહોણા ગણાવ્યા છે. તેમણે કહ્યું કે, આ એ જ દિલીપ સાબવા છે જેણે અમિત શાહ સામે ફોર્મ ભર્યુ હતું. આ જે સાબવા છે જેણે અમિત શાહ સામેથી ફોર્મ પરત ખેંચ્યું છે. ભાજપના લોકો ખરીદવા અને ધમકાવવાનું કામ કરી રહ્યાં છે. 2017માં પણ આવી જ રીતે આક્ષેપ લાગ્યા હતા. 2017માં પણ પૈસા લઇને મારી વિરુદ્ધ પ્રેસ કરાઇ હતી. બોટાદના દિલીપ સાબવા રાજકોટ કેમ પત્રકાર પરિષદ કરે છે. જે 2 ઉમેદવારો જીતી રહ્યાં છે એ લોકોના જ કેમ નામ લેવાયા છે. લલિત વસોયા અને લલિત કગથરા જીતી રહ્યાં છે.
દિલીપ સાબવાના આક્ષેપો મુદ્દે દિનેશ બાંભણીયાનું નિવેદન
દિલીપ સાબવાના આક્ષેપો ખોટા અને પાયાવિહોણા છે. હું દિલીપ સાબવાની વાતથી સહમત નથી.
દિલીપ સાબવાના આક્ષેપો પર કેતન પટેલે આપ્યો જવાબ
દિલીપ સાબવાના આરોપો પર કેતન પટેલે જવાબ આપ્યો છે. તેમણે કહ્યું કે ભાજપમાં સેટિંગ કરાવવા માટે દિલીપ સાબવા મારી પાસે આવ્યો હતો.
મહત્વનું છે કે, પાટીદાર આંદોલન સાથે જોડાયેલા પાયાના અને મુખ્ય તમામ ચહેરાઓ ધીમે-ધીમે આંદોલનની દૂર થતા ગયા. તેમનું કોઈ વર્ચસ્વ ન રહ્યું. હાર્દિક પટેલ ક્યાંકને ક્યાંક રાજકીય રીતે અને પોતાના પ્રભાવ અને કિસ્સાઓના કારણે ચમકતો રહ્યો. આજે કોંગ્રેસનો સ્ટાર બની ગયો છે. જ્યારે સાબવા જેવા અનેક ચહેરાઓ ક્યાંકને ક્યાંક ખૂણામાં ઘકેલાઈ ગયા છે. કદાચ તેનું જ આ પરિણામ પણ હોઈ શકે છે. જોકે અહીં સાબવા સાચો પણ હોઈ તો તેના પર લોકો તેના પર ભરોસો કેવી રીતે કરે? કારણ કે ચૂંટણી સમયે આ તો કોઈ સ્ટંટ પણ હોઈ શકે છે.