જળ એ જીવન કહેવાય છે. પાણીના એક એક ટીપાં નું મૂલ્ય છે. પરંતુ આ મૂલ્ય ત્યારે જ સમજાય જ્યારે પાણીના એક એક ટીપાં માટે ટળવળવું પડે. વિસનગરમાં એક રિક્ષા ચાલક સાથે કંઈક આવું જ થયું. મુસાફરી દરમિયાન રિક્ષા ચાલકને તરસ લાગી. પણ અંતરિયાળ વિસ્તારમાં પાણી નહીં મળતા પાણી માટે વલખા મારવા પડ્યા. બસ એ દિવસથી રિક્ષા ચાલકે કંઈક એવું કર્યું કે આજે સૌ કોઈ માટે એ રિક્ષા ચાલક પ્રેરણા બની ગયો છે.
દિલીપ રાવલની અનોખી હરતી-ફરતી પાણીની પરબ
અંતરિયાળ વિસ્તારમાં પાણી નહીં મળતા શરૂ કર્યો સેવાયજ્ઞ
11 વર્ષથી ચાલે છે સેવાયજ્ઞ
અંબાજી જતા પદયાત્રીઓ માટે તમને ઘણા કેમ્પ જોવા મળશે. પરંતુ આજે અમે તમને એક એવી રિક્ષા ચાલકની મુલાકાત કરાવીએ કે જેણે, રિક્ષાને જ હરતી ફરતી પરબ બનાવીને પદયાત્રીની તરસ બુઝાવી રહ્યો છે. મૂળ મહેસાણાના વડનગર તાલુકાના સિપોર ગામના દિલીપ રાવલે તરસ્યાને પાણી પીવડાવવા માટે જાણે બીડુ ઝડપી લીધું છે. છેલ્લા 11 વર્ષથી રિક્ષામાં જ આ રીતે બારે માસ લોકોને પીવાના પાણીની સેવા પૂરી પાડે છે.
ઠંડા પાણીની ટેન્ક ફિટ કરાવી
દિલીપ રાવલે રિક્ષામાં ઠંડુ પાણી સચવાઈ રહે તે માટે ખાસ ટેન્ક ફિટ કરાવી છે અને રિક્ષામાં જ પાણીની પાઇપલાઇન બિછાવીને એક નળ આગળ અને બે નળ પાછળ એમ કુલ 3 પાણીના નળ ફિટિંગ કરાવી દીધા છે. જેનો ભાદરવી પૂનમ દરમ્યાન પદયાત્રિકો ને પણ લાભ મળે તે માટે દિલીપ રાવલ અંબાજી રૂટ પર નીકળી પડે છે. જે જોઈને લોકોને પણ નવાઈ લાગે છે.
રિક્ષામાં લગાવાઇ છે 100 લીટરની પાણીની ટાંકી
દિલીપભાઈ રાવલ છેલ્લા 20 વર્ષથી રિક્ષા ચલાવીને પોતાના પરિવાર નું ગુજરાન ચલાવે છે. પરંતુ 10 વર્ષ પૂર્વે એક વખત દિલીપભાઈ કોદરામ ગામમાં રિક્ષા લઈને ગયા હતા,તે વખતે તેમને પાણી ની ખૂબ તરસ લાગી હતી. પણ અંતરિયાળ વિસ્તાર હોવાથી કોઈ જગ્યાએ પાણી નહીં મળતા તેઓને તે દિવસે પાણીનું મૂલ્ય સમજાઈ ગયું હતું.
બસ તે દિવસ થી તેમણે પોતાની રિક્ષા ને જ હરતી ફરતી પરબ બનાવી દીધી. દિલીપ ભાઈ એ પોતાની રિક્ષામાં 100 લીટર ની ટાંકી લગાવી દીધી અને ત્રણ નળ ફિટ કરાવી દીધા. છેલ્લા 10 વર્ષ થી દિલીપભાઈ આ પ્રકારે વિસનગર માં જળ સેવા આપી રહ્યા છે. દિલીપભાઈની આ અનોખી પહેલ થી લોકો પણ તેમના માટે આદરથી જોઈ રહ્યા છે.
કહેવાય છે કે મન હોય તો માળવે જવાય. સેવા કરવા માટે સાધન ની નહીં પણ ઈચ્છા શક્તિ ની જરૂર પડે છે.આ બાબત નું અનોખું ઉદાહરણ દિલીપ રાવલ છે.ત્યારે દિલીપ રાવલ ની આ સેવા ને સો સો સલામ