ગુજરાતમાં પ્રથમ વખત રાજકોટમાં સોલાર ટ્રાફિક સિગ્નલ મુકવામાં આવ્યુ છે. ટ્રાફિક પોલીસે સાઈડ આપવા હવે હાથથી સિગ્નલ નહીં આપવા પડે. પ્રથમ વખત સેલ્ફ કંટ્રોલ પોર્ટેબલ સોલાર ટ્રાફિક સિગ્નલ રાજકોટમાં રજૂ કરાયુ છે. રાજકોટમાં ટ્રાફિક પોલીસ ડીઝીટલ બની છે.
અન્ય જગ્યાએ લઈ જવામાં પણ આસાની
ટ્રાફિક પોલીસ દ્વારા મુખ્ય માર્ગો પર સાઈડ સિગ્નલ લગાવવામાં આવ્યા છે. જ્યારે અમુક ચોકમાં ટ્રાફિક પોલીસ કે વોર્ડન દ્વારા વાહનોને સાઈડ આપવા હાથ ઊંચો કરવો પડે છે. હવે પોલીસ સ્ટાફને સાઈડ આપવા હાથથી સિગ્નલ ન આપવા પડે તે માટે આ નિર્ણય લેવામાં આવ્યો છે. આ સિગ્નલ એક જગ્યાથી બીજી જગ્યાએ લઈ જઈ શકાય તેવું સિગ્નલ હોવાનું ટ્રાફિક પોલીસ અધિકારીએ જણાવ્યું હતું.
કોઈ જ મેન્ટેનન્સ ખર્ચ વગર ઓપરેટ થશે
રોજર મોટર્સ કંપનીના એમ.ડી.એ જણાવ્યા મુજબ પોર્ટેબલ ટ્રાફિક સિગ્નલ સંપૂર્ણપણે સોલાર દ્વારા ચાલતું હોવાથી વીજળી અને તેના ખર્ચની પણ બચત થાય છે. કંપનીનાં જણાવ્યા મુજબ આ પોર્ટેબલ સિગ્નલ ઝીરો મેઇન્ટેનન્સવાળુ છે. અને તેને તહેવારોની ઉજવણી દરમિયાન કોઇપણ ટ્રાફિકવાળી જગ્યા ઉપર સરળતાથી મૂકી શકાય છે. અગામી દિવસોમાં શહેરના અન્ય સ્થળોએ પણ આ પ્રકારના પોર્ટેબલ ટ્રાફિક સિગ્નલ મુકવામાં આવનાર છે.