ડિજિટલ ઇન્ડિયા વીક-૨૦૨૨ ના પ્રારંભ અંતર્ગત તા. ૪થી ૬ જુલાઈ દરમિયાન ગાંધીનગરમાં ડિજિટલ ક્ષેત્રે કાર્યરત સંસ્થાઓના વિવિધ પ્રદર્શનો યોજાઈ રહ્યાં છે.
ડિજિટલ ઇન્ડિયા વીકનો દેશવ્યાપી પ્રારંભ
૬ જુલાઈ સુધી યોજાનારા ડિજિટલ પ્રદર્શનની મુલાકાત લેવા વડાપ્રધાન દ્વારા અનુરોધ
પ્રદર્શન સવારે ૯-૩૦ થી સાંજે ૫-૩૦ સુધી ખુલ્લુ રહેશે
વડાપ્રધાન નરેન્દ્ર મોદીના હસ્તે ડિજિટલ ઈન્ડિયાની વર્ષગાંઠની ઉજવણીના ભાગરૂપે ‘ડિજિટલ ઇન્ડિયા વીક-૨૦૨૨’નો દેશવ્યાપી પ્રારંભ કરાવ્યો હતો. આ કાર્યક્રમ અંતર્ગત મહાત્મા મંદિર ગાંધીનગર ખાતે તા. ૪થી ૬ જુલાઈ દરમિયાન ડિજિટલ ક્ષેત્રે કાર્યરત સંસ્થાઓના વિવિધ પ્રદર્શનો યોજાઈ રહ્યાં છે. જેમાં સ્ટાર્ટઅપ, સરકાર, ઉદ્યોગ અને શૈક્ષણિક સંસ્થાઓની જનભાગીદારી થકી ૨૦૦થી વધુ સ્ટોલ સાથે આ પ્રદર્શન મેળામાં રોજિંદી જીવનશૈલીને સરળ બનાવતા વિવિધ ડિજિટલ સોલ્યુશન્સ જેવા કે આધાર, યુપીઆઈ, કૉ-વિન, ડિજિલૉકર જેવા જાહેર ડિજિટલ પ્લેટફોર્મ મારફત નાગરિકોને સેવાઓ કેવી રીતે સરળતાથી મળી રહે છે તે અંગેની માહિતી આપવામાં આવી છે.
PM Modi takes a view of an exhibition organized as part of Digital India Week program in Gandhinagar, Gujarat
પ્રદર્શનની મુલાકાત લેવા વડાપ્રધાન નરેન્દ્ર મોદીએ કર્યો અનુરોધ
તા. ૬ જુલાઈ સુધી યોજાનાર આ આધુનિક ટેકનોલૉજીસભર પ્રદર્શનની મુલાકાત લેવા વડાપ્રધાન નરેન્દ્ર મોદીએ ઉદ્ઘાટન પ્રસંગે વિદ્યાર્થીઓ-યુવાઓ સહિત ટેકનોસેવીઓને અનુરોધ કર્યો હતો.આ પ્રદર્શનમાં મુખ્યત્વે નેશનલ ઇન્ફોર્મેટિક્સ સેન્ટર, કોમન સર્વિસ સેન્ટર, આધાર, સી-ડેક, આયુષમાન ભારત ડિજિટલ મિશન, ડિજિટલ પેમેન્ટ પેવેલિયન, ગુજરાત ઇન્ફોર્મેટિક્સ લિમિટેડ, ડિજિટલઇન્ડિયા કોર્પોરેશન, સેફ એન્ડ ટ્રસ્ટેડ ઇન્ટરનેટ, ઇ-સંજીવની, ડિજિટલ ભાષિની, નેશનલ ઇ-ગવર્નન્સ ડિપાર્ટમેન્ટ, એજ્યુકેશન એન્ડ રિસર્ચ નેટવર્ક, આઈ-ક્રિએટ, આઈટી આધારિત ફિનટેક કંપનીઓ તેમજ બિહાર અને ઉત્તરાખંડના આઈટી વિભાગો વગેરે જેવી મહત્વની સંસ્થાઓ ભાગ લઈ રહી છે.
૪૦૦ જેટલી સરકારી સેવાઓ ઓનલાઇન ઉપલબ્ધ કરાઇ
કેન્દ્ર સરકારની એક આગવી પહેલ CSC એટલે કોમન સર્વિસ સેન્ટર. CSCના માધ્યમથી દેશના લાખો ગામોમાં નાગરિકોને ઘરે બેઠા અંદાજે ૪૦૦ જેટલી સરકારી સેવાઓ ઓનલાઇન ઉપલબ્ધ કરવામાં આવે છે. જે અંતર્ગત ગુજરાત સહિત ભારતના ૨૮ રાજ્યોમાં ૧,૭૮૬ જેટલી CSC બાળ વિદ્યાલય કાર્યરત છે. આ બાળ વિદ્યાલયમાં ૩ થી ૬ વર્ષના બાળકોને NEP-2020 હેઠળ ટેક્નોલોજી એેનેબલ પ્લેફુલ લર્નિંગ આપવામાં આવે છે. જેનો ટેક્નોલોજી આધારિત અભ્યાસક્રમ IIT દિલ્હી, દ્વારા તૈયાર કરવામાં આવ્યો છે.
ઇ-સંજીવની-નેશનલ ટેલીમેડિસિન સર્વિસ શરૂ કરવામાં આવી
CSC હેઠળ મુખ્યત્વે ડિજિટલ વિલેજ, CSC એકેડમી, CSC ઓલિમ્પિયાડ, ગ્રામીણ e-store, CSC FPO મોડેલ અને CSC એગ્રિકલ્ચર જેવી સેવાઓનો સમાવેશ થાય છે. નેશનલ પેમેન્ટ કોર્પોરેશન ઓફ ઇન્ડિયા-NCPI અંતર્ગત ‘‘ડિજિટલ પેમેન્ટ પેવેલિયન’’ તૈયાર કરવામાં આવ્યું છે. જેમાં વિવિધ ઓનલાઇન પેમેન્ટ સેવાઓ જેવી ભારત પે, કાર્ડ 91, SBI, Zaggle, ઇન્ડિયા પોસ્ટ પેમેન્ટ બેંન્ક, Paytm, Tone Tag- પેમેન્ટ સર્વિસ, DBT ભારત અને bob વર્લ્ડ જેવી સેવાઓ અને તેનો ડિજિટલ માધ્યમથી કેવી રીતે ઉપયોગ કરવો તેના વિશે માહિતી આપવામાં આવી હતી. ભારતના નાગરિકોને ઘરે બેઠા AIIMS જેવી પ્રતિષ્ઠિત આરોગ્ય સંસ્થાના તબીબો દ્વારા ટેલિફોન-મોબાઇલ પર માર્ગદર્શન મળી રહે તેવા ઉમદા હેતુથી વર્ષ ૨૦૧૯માં ભારત સરકાર દ્વારા ઇ-સંજીવની-નેશનલ ટેલીમેડિસિન સર્વિસ શરૂ કરવામાં આવી છે. આ સેવા હેઠળ સમગ્ર ભારતમાં અત્યાર સુધીમાં ૪ કરોડથી પણ વધુ નાગરિકોએ જ્યારે ભારત બહાર ૨ લાખથી વધુ લોકોએ લાભ લીધો છે.
૭૫ જેટલી મહત્વની ડિજિટલ સેવાઓ અંગે માર્ગદર્શન
આયુષમાન ભારત ડિજિટલ મિશન અંતર્ગત દરેક નાગરિકોને ૧૪ આંકડાનો આયુષમાન ભારત હેલ્થ અકાઉન્ટ (ABHA) નંબર આપવામાં આવશે, જેમાં દર્દીની સંપૂર્ણ વિગતો સામેલ હશે, આ માટે આભા એપ પણ લૉન્ચ કરવામાં આવી છે, જેમાં દર્દીની સ્વાસ્થ્યલક્ષી તમામ વિગતો સામેલ હશે. આ મિશન હેઠળ હેલ્થકેર પ્રોફેશનલ્સ રજિસ્ટ્રી, હેલથ ફેસીલિટી રજિસ્ટ્રી અને યુનિફાઈડ હેલ્થ ઇન્ટરફેસ-યુએચઆઈ જેવી ઓનલાઈન આરોગ્યલક્ષી સુવિધાઓ-સેવાઓ ઉપલબ્ધ થશે. નેશનલ ઇન્ફોર્મેટિક્સ સેન્ટર દ્વારા તૈયાર કરવામાં આવેલ ૭૫ જેટલી મહત્વની ડિજિટલ સેવાઓ અંગેની જાણકારી ડિજિટલ માધ્યમથી આપવામાં આવી છે, આઈ-ક્રિએટ તકનિકી ઉત્પાદન પર ધ્યાન કેન્દ્રિત કરી આયાતી ચિપ્સ પરનું અવલંબન ઘટાડવા અને ભારતનું આઈપી રાખવા માટે એક ‘સિસ્ટમ ઓન ચીપ’ વિકસાવી રહી છે, જે એક મોટર કન્ટ્રોલર, વાહન નિયંત્રણ એકમ અને બેટરી થર્મલ મેનેજમેન્ટ સિસ્ટમને બે ઇંચની QFN ચીપમાં સમાવી શકવાની ક્ષમતા ધરાવે છે.