સરકારનાં એક તાજેતરમાં હાથ ધરાયેલા સર્વેમાં આ ચોંકાવનારો ખુલાસો થયો છે કે, ગ્રામીણ અને શહેરી બંને ક્ષેત્રોમાં પુરુષ અને મહિલાઓની માસિક આવકમાં ઘણો તફાવત છે. ગ્રામીણ ક્ષેત્રમાં એક પુરુષ કામદાર મહિલાઓની સરખામણીએ 1.4થી 1.7 ગણું વધારે મહેનતાણું મેળવે છે, જ્યારે શહેરી ક્ષેત્રમાં પુરુષ કર્મચારીઓની આવક મહિલાઓની સરખામણીએ 1.2થી 1.3 ગણી વધારે છે.
ભારતમાં રાજનીતિનાં ક્ષેત્રમાં ભલે મહિલાઓને પુરુષોથી સમાન અધિકાર મળી ગયા હોય, પરંતુ આર્થિક ક્ષેત્રમાં બરાબરીનો હક મેળવવામાં તેમણે કદાચ હજુ લાંબી લડાઈ લડવી પડશે. તાજેતરમાં યોજાયેલી લોકસભા ચૂંટણીમાં મહિલાઓએ પુરુષો જેટલું જ અને કેટલાક રાજ્યોમાં તો તેમના કરતાં વધુ મતદાન કર્યું હતું, પરંતુ આર્થિક ક્ષેત્રની કડવી હકીકત છે કે, ગામડું હોય કે શહેર, સ્વરોજગાર હોય કે નોકરી, મહિલાઓની મહિનાની આવક તેમની સમકક્ષના પુરુષ કર્મચારીઓ કરતા ઘણી ઓછી છે.
સરકારનાં એક તાજેતરમાં હાથ ધરાયેલા સર્વેમાં આ ચોંકાવનારો ખુલાસો થયો છે કે, ગ્રામીણ અને શહેરી બંને ક્ષેત્રોમાં પુરુષ અને મહિલાઓની માસિક આવકમાં ઘણો તફાવત છે. ગ્રામીણ ક્ષેત્રમાં એક પુરુષ કામદાર મહિલાઓની સરખામણીએ 1.4થી 1.7 ગણું વધારે મહેનતાણું મેળવે છે, જ્યારે શહેરી ક્ષેત્રમાં પુરુષ કર્મચારીઓની આવક મહિલાઓની સરખામણીએ 1.2થી 1.3 ગણી વધારે છે.
‘પીરિયોડિક લેબર ફોર્સ સર્વે’ શીર્ષક હેઠળ કરવામાં આવેલો આ સર્વે નેશનલ સેમ્પલ સર્વે ઓફિસે વર્ષ 2017-18 માટે દેશભરમાં હાથ ધર્યો હતો. જેના પરિણામો હવે જાહેર કરવામાં આવ્યાં છે. સર્વે અનુસાર, ગ્રામીણ ક્ષેત્રમાં નિયમિત મજૂરી અને વેતન મેળવતા પુરુષ કર્મચારીઓની માસિક આવક સરેરાશ 13,000 થી 14,000 રૂપિયા નોંધાઈ છે, જ્યારે મહિલા કર્મચારીઓની આવક માત્ર 8.5 હજારથી 10,000 રૂપિયા રહી હતી. એ જ રીતે શહેરી ક્ષેત્રોમાં નિયમિત મજૂરી કરતા અને વેત મેળવતા પુરુષ કર્મચારીઓની માસિક આવક 17,000થી 18,000 રૂપિયા વચ્ચે રહી હતી, જ્યારે મહિલા કર્મચારીઓની આવક માત્ર 14,000થી 15,000 રૂપિયા હોવાનું જાણવા મળ્યું હતું.