રાહુલ ગાંધી જ્યારથી સક્રિય રાજકારણમાં આવ્યા ત્યારથી જ તેમના ભાષણ ચર્ચામાં રહે છે. ત્યારે હવે લોકસભાની ચૂંટણી સમયે પણ રાહુલ ગાંધીનો એક એવો વીડિયો વાયરલ થયો છે, જેનાથી રાહુલની સમજશક્તિ પર જ કેટલાક લોકોએ સવાલ ઉઠાવ્યા છે.
કારણ કે વાયરલ વીડિયોમાં રાહુલ ગાંધી કહી રહ્યા છે કે ઉત્તરપ્રદેશની મહિલાઓ વર્ષમાં 52 બાળકોને જન્મ આપે છે. તો શું છે રાહુલ ગાંધીના વાયરલ વીડિયો પાછળની હકિકત. આખરે શું રાહુલ ગાંધી આ વાક્ય બોલ્યા?
"ઉત્તરપ્રદેશમાં એવી મહિલાઓ છે જે દર અઠવાડિયે એક બાળકને જન્મ આપી શકે છે. એવી મહિલાઓ છે જે વર્ષમાં 52 બાળકોને જન્મ આપે છે."
હા, આ શબ્દો ખુદ કોંગ્રેસ અધ્યક્ષ રાહુલ ગાંધી જ બોલી રહ્યા છે. અવાજ રાહુલ ગાંધીનો છે. વીડિયોમાં પણ રાહુલ ગાંધી જ દેખાઇ રહ્યા છે. વાયરલ થયેલ આ વીડિયો ક્લીપની સાથે પણ રાહુલ ગાંધીનું જ નામ લખવામાં આવ્યું છે. પણ આ બધું જ આંખો સામે હોવા છતાં રાહુલ ગાંધી એવી વાત કરી રહ્યા છે, તે વાત ખરેખર આશ્ચર્યજનક છે.
રાહુલ ગાંધી છેલ્લા દોઢ દાયકાથી સક્રિય રાજકારણમાં છે. તેમના ઘણા ભાષણ હાસ્યાસ્પદ બન્યા છે. વિરોધી નેતાઓએ પણ ઘણી વાર પ્રત્યક્ષ અથવા પરોક્ષ રીતે રાહુલ ગાંધીની ભાષણશૈલી પર સવાલ ઉઠાવ્યા જ છે. હાલમાં લોકસભાની ચૂંટણી ચાલી રહી છે. કોંગ્રેસ ફરીથી સત્તામાં આવશે તેવા સપના સાથે રાહુલ પ્રચારમાં લાગી ગયા છે. પણ રાહુલ ગાંધીને એક અપરિપક્વ નેતા સાબિત કરતી આ વીડિયો ક્લીપ કોંગ્રેસ માટે મુશ્કેલી લઇને આવી છે.
રાહુલ ગાંધીની 10 સેકન્ડની આ વીડિયો ક્લીપ એક ચેલને કરેલા પ્રસારણ સમયની છે. એક તરફ રાહુલ ગાંધીનું ભાષણ ચાલી રહ્યું છે. બીજી તરફ બ્રેકીંગ ન્યૂઝ લખેલા જોવા મળે છે. સૌથી ઉપર રાહુલ ગાંધી લાઈવ પણ લખ્યું છે. આર.કે સિન્હા ભાજપ તરફથી રાજ્યસભાના સાંસદ છે. તેમણે ટ્વીટર પર આ વીડિયો ક્લીપ અપલોડ કર્યો. સાથે જ રાહુલ ગાંધી પર જોરદાર કટાક્ષ પણ કર્યો હતો. તો ફેસબુક પર નન્હે શર્મા નામના વ્યક્તિએ આ વીડિયો શેર કર્યો હતો. જેને ગણતરીના કલાકોમાં જ 19 હજારથી પણ વધુ વ્યુઝ મળી ચુક્યા છે. આ સિવાય પણ અન્ય કેટલાક લોકોએ રાહુલ ગાંધીની ટીખળ ઉડાવવા માટે આ વીડિયોને પોતાની રીતે શેર કર્યો, આમ, સોશિયલ મીડિયાના તમામ પ્લેટ ફોર્મ પર રાહુલ ગાંધીના ભાષણની 10 સેકન્ડની વીડિયો ક્લીપ છવાઈ ચુકી છે.
પણ રાહુલ ગાંધીએ આ ભાષણ ક્યારે આપ્યું હતું?
શું રાહુલ ગાંધીએ યૂપીની મહિલાઓ અંગે આપત્તીજનક ટીપ્પણી કરી?
શું રાહુલ ગાંધીની વીડિયો ક્લીપને એડિટ કરવામાં આવી છે?
રાહુલ ગાંધીના મુખમાંથી સરેલા આ શબ્દો વિરોધી નેતાઓ માટે આક્ષેપનો સામાન બની ચુક્યો છે. પણ હજ્જારો લોકોની મેદની સામે રાહુલ ગાંધી આવું કેમ બોલ્યા તેની તપાસ જરૂરી હતી. એટલે વીડિયો ક્લીપની તપાસ માટે અમે યુટ્યુબ પર પહોંચ્યા. વાયરલ વીડિયો ક્લીપમાં લખ્યું હતું કે ઉત્તરપ્રદેશમાં જ્યાં પણ જુઓ ત્યાં ભ્રષ્ટાચાર છે. આ જ વાક્યને ધ્યાનમાં રાખીને અમે યુટ્યુબ પર સર્ચ કર્યું. એટલે અમને રાહુલ ગાંધીના ભાષણની આખી વીડિયો ક્લીપ મળી ગઈ. વીડિયો ક્લીપ સાથે માહિતી હતી કે રાહુલ ગાંધીએ ઉત્તરપ્રદેશના ફુલપુરમાં એક સભાને સંબોધી હતી.
રાહુલ ગાંધીએ કયા મુદ્દે વાત કરી?
હજારો કરોડ રૂપિયા દિલ્હીની સરકારે ઉત્તરપ્રદેશની સરકારને મોકલ્યા. જનની સુરક્ષા યોજના એક પ્રોગ્રામ છે. જ્યારે બાળકનો જન્મ થાય છે ત્યારે મહિલાઓને 1400 રૂપિયા આપવામાં આવે છે. અમે આરટીઆઇ કરીની જવાબ માગ્યો. આરટીઆઈમાં અમને જે રિપોર્ટ મળ્યો. ઉત્તરપ્રદેશમાં એવી મહિલાઓ છે જે દર અઠવાડિયે એક બાળકને જન્મ આપી શકે છે. એવી મહિલાઓ છે જે વર્ષમાં 52 બાળકોને જન્મ આપે છે. એક જ નામ છે, 1400 રૂપિયા દર અઠવાડિયે તેમના ખીસ્સામાં જાય છે અને માત્ર એક જ મહિલા નથી, હજ્જારો મહિલાઓ છે.
(5:15થી 6:04 મિનીટ સુધી)
એટલે સાત વર્ષ પહેલા રાહુલ ગાંધીએ ઉત્તરપ્રદેશની સરકાર પર જનની સુરક્ષા યોજનામાં ભ્રષ્ટાચાર કર્યાનો આરોપ લગાવ્યો હતો. કટાક્ષ રૂપે જનતા સમક્ષ વાત મૂકી હતી. પણ રાહુલ ગાંધીની આ જ સ્પીચમાંથી 10 સેકન્ડનો ટુકડો કાપીને વાયરલ કરી નાખ્યો. જેથી કહી શકાય કે વાયરલ વીડિયો ક્લીપ સાથે કરવામાં આવેલો દાવો ખોટો છે.