આજે કેન્દ્રીય બજેટમાં નાણામંત્રી દ્વારા ડાયમંડ હબ સુરત માટે મહત્વની જાહેરાત કરી લેબગ્રોન ડાયમન્ડના ઉત્પાદનને વૃદ્ધિ આપવાનો પ્રયાસો કરવા જાહેરાત કરતા હીરા ઉદ્યોગમાં ખુશીનો માહોલ જોવા મળી રહ્યો છે, જો કે, સુરતના ટેક્સટાઇલ ઉદ્યોગ માટે સરકારે કોઈ જાહેરાત ન કરતા નિરાશા વચ્ચે પણ સુરત ચેમ્બર ઓફ કોમર્સે બજેટને આવકાર્યું છે.
ડાયમંડ ઉત્પાદન વૃદ્ધિની જાહેરાતથી સુરતના હીરા ઉદ્યોગમાં ખુશી
બજેટથી સુરતને ઘણો ફાયદો થશે, સુરત ચેમ્બર ઓફ કોમર્સે બજેટને આવકાર્યું
સુરતના ટેક્સટાઇલ ઉદ્યોગ માટે સરકારે કોઈ જાહેરાત ન કરતા નિરાશા
સંસદમાં આજે નાણામંત્રી નિર્મલા સીતારમણ દ્વારા બજેટ 2023 રજૂ કરવામાં આવ્યું છે. આજે મોદી સરકારના બીજા કાર્યકાળનું છેલ્લું સંપૂર્ણ બજેટ રજૂ કરાયું છે. જેમાં તમામ સેક્ટરને આવરી લેવાયું હોય તેવું જણાઈ રહ્યું છે. સામાન્યવર્ગ અને મધ્યમવર્ગ માટે અનેક જાહેરાત કરાઈ છે, આ અંદાજપત્રમાં ઇન્કમટેક્સ મુક્તિ મર્યાદા વધારવા સહિતના અનેક પગલાં ભર્યા છે ત્યારે કેન્દ્રીય બજેટમાં ડાયમંડ સીટી માટે મહત્વની જાહેરાત કરી લેબગ્રોન ડાયમન્ડના ઉત્પાદન અંગે નિર્ણય જાહેર કરતા જાહેરાતથી હીરા ઉદ્યોગમાં ખુશીનો માહોલ જોવા મળ્યો છે. જો કે ડાયમંડની જેમ જ ટેક્સ્ટાઇલ ઉદ્યોગ પણ સુરત માટે અતિ મહત્વનો છે પરંતુ કેન્દ્રીય બજેટમાં ટેક્સટાઇલ માટે સરકારે કોઈ જાહેરાત ન કરતા ટેક્સ્ટાઇલ સેક્ટરમાં બજેટ બાદ નિરાશા જોવા મળી રહી છે.
ચેમ્બર ઓફ કોમર્સ પ્રમુખ હિમાંશુ બોડાવાલાએ કહ્યું
સુરત ચેમ્બર ઓફ કોમર્સ પ્રમુખ હિમાંશુ બોડાવાલાએ કેન્દ્રીય બજેટને આવકારતા જણાવ્યું હતું કે, આ બજેટથી સુરતને ઘણો ફાયદો થશે, કેન્દ્રીય બજેટથી રોજગારીની તકો વધે તેવી શક્યતા વ્યક્ત કરી લેબગ્રોન ડાયમંડમાં થયેલી જાહેરાતથી હીરા ઉદ્યોગમાં ખુશી હોવાનું તેમને ઉમેર્યું હતું. જો કે, ટેક્સટાઇલ સેક્ટર માટે સરકારે કોઈ જાહેરાત ન કરતા ચેમ્બર પ્રમુખ દ્વારા માંગ કરવામાં અમારો પનો ટૂંકો પાડયો હોવાનો સુર વ્યક્ત કર્યો હતો. જોકે વર્ષ 2023-24ના બજેટથી બજેટથી સુરતને ઘણો ફાયદો થશે તેવું જણાવ્યું હતું.
વાઇસ પ્રેસિડેન્ટ રમેશભાઈ વઘાસિયાએ જણાવ્યું કે...
દરમિયાન ચેમ્બર ઓફ કોમર્સના વાઇસ પ્રેસિડેન્ટ રમેશભાઈ વઘાસિયાએ જણાવ્યું હતું કે કેન્દ્રીય બજેટ એકંદરે સુરત માટે સારું છે, જો બજેટમાં ટેક્સટાઇલ ઉદ્યોગને લગતી માંગણી સમાવી લેવામાં આવી હોત તો ચોક્કસ પણે ટેક્સ્ટાઇલ ઉદ્યોગકાર હાલ જે મુશ્કેલીનો સામનો કરી રહ્યા છે તેમાં રાહત મેળવી શક્યા હોત. નોંધનીય છે કેમ ટેકસટાઇલ ઉદ્યોગ દ્વારા ટફ સબસીડીની માંગ કરાઈ હતી પરંતુ સરકારે ટફ સબસીડી ફરી શરૂ કરવા અંગે કોઈ જાહેરાત કરી નથી જેથી 5 ટ્રિલિયન ઇકોનોમિક માટે ખાસ ફેરફાર ન હોવાનું તેઓએ ઉમેર્યું હતું.