સુરતની ચમક જેના કારણે છે એવા હીરા ઉદ્યોગની ચમક હાલ મંદીને કારણે ઝાંખી થઇ ગઇ છે. છેલ્લા કેટલાય સમયથી હીરા ઉદ્યોગ મંદીની ઝપટેમાં છે ત્યારે કેટલાય રત્નકલાકારોની નોકરી છીનવાઇ ગઇ છે. આવા જ એક રત્નકલાકારની નોકરી છુટી જવાને કારણે આત્મહત્યાનું પગલું ભર્યું છે.
હીરા ઉદ્યોગની ચમક હાલ મંદીને કારણે ઝાંખી થઇ
સુરતમાં એક દિવસમાં બે રત્ન કલાકારે કરી આત્મહત્યા
રત્નકલાકારની નોકરી છુટી જવાને કારણે આત્મહત્યાનું પગલું ભર્યું
રત્નકલાકારોની રોજગારી છીનવાઇ જવાને કારણે રત્નકલાકારોને પોતાનું ઘર ચલાવવાની તકલીફ પડી રહી છે ત્યારે કેટલાંય રત્નકલાકારો દ્વારા આપઘાત કરવામાં આવી રહ્યા છે. ત્યારે ગઇકાલે સરથાણાના સીમાડા વિસ્તારમાં બીઆરટીએસ કેનાલ રોડ ઉપર રાજુભાઈ ખેની નામના વ્યક્તિ દ્વારા ઝેરી દવા પીને આત્મહત્યાનો પ્રયાસ કરવામાં આવ્યો હતો.
જેમાં દવા પીધા બાદ રાજુભાઇ ખેનીને હોસ્પિટલ ખાતે ખસેડવામાં આવ્યા હતા. તેમાં ટૂંકી સારવાર બાદ તેમનું મોત થયું હતું. રાજુભાઇ ખેની છેલ્લા 15 વર્ષથી હીરાના વ્યવસાય સાથે સંકળાયેલા હતા. તેમાં તેઓ મહિને 25 હજાર જેટલા કમાઇને પોતાના પરિવારનું ભરણ પોષણ કરતા હતા. જો કે છેલ્લા કેટલાંય સમયથી ચાલી રહેલી મંદીને કારણે તેમની નોકરી છીનવાઇ ગઇ હતી જેના કારણે તેમણે આપઘાતનું પગલું ભર્યું હતું.
રત્નકલાકાર રાજુભાઇ ખેનીએ ઝેરી દવા પીધા બાદ પોતાના સંબંધીને ફોન કર્યો હતો. જેમાં તેમણે કહ્યું હતું કે હું કંટાળી ગયો છું અને દવા પીધી છે. મારે કામધંધો થતો નથી અને ખર્ચા પૂરા પડતા નથી. ત્યારબાદ તેને હોસ્પિટલ ખસેડવામાં આવ્યો હતો. જ્યાં તેમની સારવાર દરમિયાન મોત થયું હતું. હાલ મૃતકના ઘરે માતમ છવાયો છે.
સુરતમાં એક દિવસમાં બીજા રત્ન કલાકારે આત્મહત્યા કરી
સુરતના મીની બજાર કોહીનૂર સોસાયટીમાં રત્ન કલાકારે ગળેફાંસો ખાઇ આત્મહત્યા કરી છે. હીરાની સરણ માંજવાનું કામ કરતા યુવકે આત્મહત્યા કરી છે.
અત્રે ઉલ્લેખનીય છે કે, સુરતનો હીરા ઉદ્યોગ મંદીની ઝપેટમાં આવી ગયો છે. જેના કારણે છેલ્લા 10 મહિનામાં 13 હજાર અને 2 મહિનામાં 4 હજાર રત્નકલાકારોને છૂટા કરી દેવામાં આવ્યા છે. જેમાં સુરતની મુખ્ય મોટી કંપનીઓએ પણ કારીગરોને છૂટા કરી દેવામાં આવ્યા છે. દિવાળી પછીથી હીરા ઉદ્યોગમાં મંદીનો માર ચાલી રહ્યો છે. જોકે સરકારે હીરા ઉદ્યોગના જોબવર્ક પર પાંચ ટકા જીએસટી હતો તે ઘટાડીને 1.5 ટકા કરી નાખ્યો છે. જેને લઇને હવે હીરા ઉદ્યોગના વેપારીઓમાં પણ ઉત્સાહ જોવા મળી રહ્યો છે. પરંતુ ક્યાંક હજુ પણ મંદીની અસર વર્તાઇ રહી છે.