હોલી ખેલે રઘુવીરા / VIDEO: ઉત્સાહમાં દેખાયા હર્ષ સંઘવી અને હાર્દિક પટેલ, વાઘાણીએ લાકડી ફેરવી કર્યું નૃત્ય, પહેલીવાર વિધાનસભામાં રમાઈ ધૂળેટી

• ગુજરાત વિધાનસભા પરિસરમાં ધૂળેટીની ઉજવણી
• CM ભૂપેન્દ્ર પટેલ પણ રહ્યા રંગોત્સવમાં ઉપસ્થિત
• નેચરલ કલર અને કેસૂડાના ફૂલથી ધૂળેટીની ઉજવણી

ગુજરાત વિધાનસભાના ઇતિહાસમાં પ્રથમ વખત વિધાનસભા પરિસરમાં ધારાસભ્યો અને મંત્રીઓ ધૂળેટી રમ્યા. વિધાનસભા પરિસરમાં ધારાસભ્યો સીએમ ભૂપેન્દ્ર પટેલની હાજરીમાં નચરલ કલર અને કેસૂડાના ફૂલથી ધૂળેટી રમી હતી. મહત્વનું છે કે, વિધાનસભા સંકુલમાં આવેલા મેદાનમાં હોળી રંગોત્સવ કાર્યક્રમ માટે અધ્યક્ષ શંકર ચૌધરીએ મંજૂરી આપી હતી. 

ધારાસભ્યો અને મંત્રીઓએ એકબીજાને લગાવ્યો રંગ
આજે વહેલી સવારે 9 કલાકે વિધાનસભા સત્રની શરૂઆત થઈ હતી. જે બાદ તમામ ધારાસભ્યોએ આજે પડતર દિવસે વિધાનસભા સંકુલમાં આવેલા મેદાનમાં પહોંચ્યા હતા. ધારાસભ્યો અને મંત્રીઓએ એકબીજાને કલર લગાવીને ધૂળેટીની ઉજવણી કરી હતી. તો આ દરમિયાન ભાવનગરના ધારાસભ્ય અને પૂર્વ મંત્રી જીતુ વાઘાણી તલવારની જેમ લાકડી ફેરવતા જોવા મળ્યા હતા. આ દરમિયાન ધારાસભ્યો પિચકારી લઈને એકબીજાની પાછળ દોડતા જોવા મળ્યા હતા. ધૂળેટીના પર્વને લઈને તમામ ધારાસભ્યો અને મંત્રીઓમાં એક અલગ જ ઉત્સાહ જોવા મળ્યો હતો. તો ગૃહ રાજ્યમંત્રી હર્ષ સંઘવીને પણ તમામ ધારાસભ્યો અને મંત્રીઓએ રંગે રંગી નાખ્યા હતા. 

ભાજપ, કોગ્રેસ અને આપના ધારાસભ્યોએ ભાગ લીધો
મળતી માહિતી પ્રમાણે,  વિધાનસભામાં ધૂળેટીની ઉજવણી માટે 100 કિલો કેસુડાના ફુલ મંગાવવામાં આવ્યા હતા.  પક્ષાપક્ષીને બાદ રાખીને તમામ ધારાસભ્ય એક સાથે પ્રથમવાર એક જ સ્થળે હોળીની ઉજવણી કરી હતી. ધૂળેટીની ઉજવણીમાં ભાજપ, કોગ્રેસ અને આપના ધારાસભ્યોએ પણ ભાગ લીધો હતો. રાજ્યના મુખ્યમંત્રી સહિતના તમામ મંત્રીઓ પણ હાજર રહ્યા હતા. આપને જણાવી દઈએ કે, ઈતિહાસમાં પ્રથમ વિધાનસભા પરિસરમાં રંગોત્સવની ઉજવણી કરવામાં આવી હતી. 

બાલકૃષ્ણ શુક્લએ આપી હતી દરખાસ્ત
અત્રે ઉલ્લેખનીય છે કે,  શાસક પક્ષના મુખ્ય દંડક બાલકૃષ્ણ શુક્લએ હોળીના આયોજન માટે વિધાનસભાના અધ્યક્ષ શંકર ચૌધરીને એક દરખાસ્ત આપી હતી અને અધ્યક્ષે દરખાસ્ત ગ્રાહ્ય રાખતાં વિધાનસભા સચિવાલયે પણ તેને મંજૂરી આપી હતી. આ દરમ્યાન આજે પડતર દિવસ હોવાથી વિધાનસભા ગૃહની બેઠક પણ સવારની કરવામાં આવી હતી.