સાવધાન / સુરેન્દ્રનગરના ધ્રાંગધ્રામાં ગર્ભ પરિક્ષણનો વેપલોઃ પોલીસે ડોક્ટરની ધરપકડ કરી

• ધ્રાંગધ્રામાં ગાયનેકમાં થતુ હતુ ગેરકાયદે ગર્ભ પરીક્ષણ
• ડોક્ટર રૂા. 22000 લઈને તપાસી આપતો હતો ગર્ભસ્થ શિશુની જાત
• છટકુ ગોઠવીને પકડી લેવાયો ડોક્ટર અને મુદ્દામાલ

સરકાર દ્વારા એક તરફ બેટી બચાવો અને સ્ત્રી ભ્રુણ હત્યા અટકાવવાની વાતો કરવામાં આવે છે ત્યારે ધ્રાંગધ્રા શહેરની એક ખાનગી હોસ્પિટલના ડોક્ટરને આરોગ્ય વિભાગની ટીમે ગેરકાયદેસર રીતે ગર્ભ પરીક્ષણ કરતા પકડી પાડ્યો છે. આ માટે ખાસ છટકું ગોઠવવામાં આવ્યુ હતુ. ડોક્ટર રોકડ રકમ લેતા રંગે હાથે ઝડપાઈ ગયો હતો. પોલીસે આ અંગે કાયદેસરની કાર્યવાહી હાથ ધરી હતી.

જૈના મેટરનિટી એન્ડ નર્સીંગ હોમમાં થઈ રહ્યુ હતુ ગેરકાયદે ગર્ભ પરિક્ષણ
ધ્રાંગધ્રા શહેરમાં અનેક ખાનગી હોસ્પિટલો આવેલી છે. જ્યાં શહેરી વિસ્તારો સહીત ગ્રામ્ય વિસ્તારોના દર્દીઓ સારવાર અર્થે આવે છે. ત્યારે શહેરની મધ્યમાં આવેલ જૈના મેટરનિટી એન્ડ નર્સીંગ હોમ નામથી ગાયનેક હોસ્પિટલ ચલાવતા ડો. પ્રજ્ઞેશ ખેડાવાળા દ્વારા નિયમો વિરુદ્ધ અને પ્રતિબંધ હોવા છતાં ગેરકાયદેસર રીતે મોટી રકમ લઇ ગર્ભ પરીક્ષણ કરતા હોવાની ફરિયાદો ઉઠી હતી. 

22000 લઈને કરી રહ્યો હતો ગર્ભ પરીક્ષણ
આ ફરિયાદને પગલે જિલ્લા કલેકટર કે. રાજેશની સૂચનાથી  આરોગ્ય વિભાગના મુખ્ય અધિકારી સહિતની ટીમે પોલીસને સાથે રાખી ગર્ભવતી મહિલાને સાથે રાખી ડોક્ટર દ્વારા ગર્ભ પરીક્ષણ કરવાનું છટકું ગોઠવ્યું હતું. જે દરમિયાન ડો. પ્રજ્ઞેશ ખેડાવાળાને રૂા. 22000 લઇ ગેરકાયદેસર રીતે ગર્ભ પરીક્ષણ કરતા રંગે હાથે ઝડપી પાડ્યા હતા. ડોક્ટરનું નામ પ્રજ્ઞેશ ખેડાવાલા છે. 

પોલીસે સોનોગ્રાફી મશીન સહિત હોસ્પિટલને માર્યુ સીલ
પોલીસે ગર્ભ પરીક્ષણ કરવાના અને સોનોગ્રાફી મશીન સહિતનો મુદામાલ સીલ કરી દીધો હતો. ડોક્ટર સામે ફરિયાદ નોંધી કાયદેસરની  કાર્યવાહી હાથ ધરી હતી. જયારે અચાનક આરોગ્ય વિભાગની ટિમ દ્વારા રેઇડ કરવામાં આવતા જિલ્લાના અન્ય ગાયનેક ડોક્ટરોમાં પણ ફફડાટ ફેલાઈ જવા પામ્યો હતો.