સુરેન્દ્રનગર / 'ધંધો કરવો હોય તો ખંડણી આપવી પડશે' : ધ્રાંગધ્રામાં દુકાનમાં વેપારી સાથે ગુંડાગીરી, CCTV આવ્યા સામે

• સુરેન્દ્રનગર જિલ્લામાં કાયદા અને વ્યવસ્થાની સ્થિતિ કથળી
• ધ્રાંગધ્રાની બજારમાં અસામાજિક તત્વોએ કરી તોડફોડ
• દુકાનમાં તોડફોડ કરી ખંડણી પણ માંગી

સુરેન્દ્રનગર જિલ્લામાં કાયદો અને વ્યવસ્થાની પરિસ્થિતિ કથળતી જઇ રહી છે. તેવા સંજોગો વચ્ચે જિલ્લાભરમાં ચોરી લૂંટફાટ મારામારી અને હત્યાના બનાવોમાં નોંધપાત્ર વધારો આવ્યો છે. આથી પોલીસની કામગીરી સામે લોકોમાં રોષ જોવા મળી રહ્યું છે. પોલીસ માત્ર નામની જ રહી હોય તેવું લોકોને લાગી રહ્યું છે. તેવામાં ધ્રાંગધ્રાની બજારમાં અસામાજિક તત્વોએ આતંક મચાવી આડેધડ તોડફોડ કરી હોવાનું સામે આવ્યું છે. એટલું જ નહિ જિલ્લામાં જાણે પોલીસનું અસ્તિત્વ જ ન  હોય અને આવા લુખ્ખા તત્વોને પોલીસનો કોઇ ડર જ ન હોય તેમ દુકાનમાં ઘૂસી વેપારીને ધમકી આપી હતી. જે અંગેના CCTV ફૂટેજ સામે આવ્યા છે. 

ધંધો કરવો હોય તો ખંડણી આપવી પડશે : ધ્રાંગધ્રામાં ગુંડાઓની વેપારીને ધમકી

સુરેન્દ્રનગર: ધ્રાંગધ્રામાં બજારમાં અસામાજિક તત્વોએ દુકાનમાં પ્રવેશી વેપારીને ધમકી આપી. દુકાનમાં તોડફોડ કરી ખંડણી પણ માગી. સમગ્ર ઘટનાના CCTV ફૂટેજ આવ્યા સામે.@GujaratPolice #Dhrangdhra#surendranagar pic.twitter.com/Q1fKFouwDQ

— VTV Gujarati News and Beyond (@VtvGujarati) July 4, 2022

વેપારીઓએ જિલ્લા પોલીસ વડાને કરી રજૂઆત
અસામાજિક તત્વોએ દુકાનમાં તોડફોડ કરી વેપારી પાસેથી ખંડણી પણ માંગી હોવાનું CCTV ફૂટેજમાં દ્રશ્યમાન થઇ રહ્યું છે. લુખ્ખાઓએ ધંધો કરવો હોય તો ખંડણી આપવી પડશે તેવી વેપારીને  ધમકી આપી ખુલ્લેઆમ રૂપિયાની માંગણી કરી હતી. આથી સુરેન્દ્રનગર પંથકમાં ખાખીનો રોફ અને ખોફ ફિકકો પડયો હોય તેવી સ્થિતિ સર્જાઇ છે. આ મામલે અન્ય વેપારીઓને જાણ થતાં વેપારીઓમાં આક્રોશનો જ્વાળા ભભૂકી ઉઠ્યો હતો. મોટી સંખ્યામાં વેપારીઓએ એકઠા થઈ જિલ્લા પોલીસ વડાને રજૂઆત કરી હતી અને આરોપીઓ સામે કડકમાં કડક સજા કરવાની માંગ ઉઠાવી હતી.