આજે ખેતી ક્ષેત્રે નવા નવા અખતરા કરી સૌરાષ્ટ્રના ખેડૂતો પ્રગતિ તરફ વળ્યા છે. ખેતીમાં આધુનિકતા બક્ષી ખેડૂતો જબરી કમાણી કરી રહ્યા છે. ત્યારે ધોરાજીના એક ખેડૂત ડ્રેગન ફ્રુટનું વાવેતર નવો રાહ ચીંધ્યો છે.
ધોરાજીના ખેડૂતે કરી કમલમ ફ્રુટની ખેતી
અઢી વિધામાં કરે છે લાખોની કમાણી
યુટ્યુબ પર જોઈને આધેડ ખેડૂતે કરી કમલમની ખેતી
'મન હોય તો માળવે જવાય' આ કહેવતને ધોરાજીના એક પ્રગતિશિલ ખેડૂતે સાર્થક કરી છે. હાલની સ્થિતીએ અનેક ખેડૂતો ખેતીમાં સારી આવક ન થતા, ખેતી છોડી નોકરીની શોધ કરતા હોય છે. પરંતુ ધોરાજીના આ ખેડૂતે માત્ર અઢી વીઘા જમીનમાં અલગ જ પ્રકારની ખેતી કરી એક નોકરીયાત કરતા પણ સારી કમાણી કરી છે. રાજકોટ જિલ્લાના ધોરાજીના પ્રગતિશિલ ખેડૂતએ એમના અઢી વીઘા જમીનમાં ડ્રેગન ફ્રૂટનું વાવેતર કરી આજના યુવાનોને નવો રાહ ચીંધ્યો છે.
ખેડૂતે વધુ આવક મેળવવા માટે રિસર્ચ શરૂ કર્યું
કપાસ, મગફળી સહીતના રવિ પાક કેટલાય સમયથી નિષ્ફળ નિવડતા ધોરાજીના ખેડૂતો ચિંતિત બન્યા છે. આવી સ્થિતિમાં એક પ્રગતિશીલ ખેડૂતે રસ્તો કાઢી લીધો છે. આધેડ વયના આ ખેડૂતે એમના અઢી વીઘા જમીનમાં અખતરો કરી કોઠા સૂઝ અને સમજણથી ડ્રેગન ફ્રૂટની ખેતીનો પ્રારંભ કર્યો હતો. ધોરાજીના ખેડૂત ભગવાનજીભાઈ ચવાડિયા અગાઉ પરંપરાગત ખેતી કરી રહ્યા હતા અને દર વર્ષે કંઇકને કંઈક મુશ્કેલીઓનો સામનો કરી રહ્યા હતા. આખરે થાકેલા ભગવાનજીભાઈએ ખેતીમાં કઈક નવું કરવા અને વધુ આવક મેળવવા માટે રિસર્ચ શરૂ કર્યું. તે દરમિયાન તેઓ ખેતી વિષયક સતત નવું નવું જાણી રહ્યા હતા. ત્યારે તેઓને ડ્રેગન ફ્રુટ અંગે માહિતી મળી. તેમણે પોતાના ખેતરમાં ડ્રેગન ફ્રુટ વાવવાનો નિણર્ય કર્યો.
યુટ્યુબમાંથી શીખ્યાં ડ્રેગન ફ્રુટની ખેતી
યુટ્યુબના વીડિયો જોઈને તેઓ ડ્રેગન ફ્રુટની ખેતી કરવાનુ શીખ્યાં અને તેઓએ કોલકાત્તાથી ડ્રેગન ફ્રૂટનું બીજ મંગાવ્યું અને ખેતી શરૂ કરી. જેમાં તેઓએ અઢી વીઘામાં દોઢ લાખનો ખર્ચ કર્યો અને વાવેતર કર્યું અને માત્ર એક વર્ષમાં જ તેઓએ પોતાના વાવેતરનો ખર્ચ કાઢી લીધો હતો અને નફો કમાવવાનું શરૂ કર્યું હતું. ભગવાનજીભાઈના જણાવ્યા મુજબ, ડ્રેગન ફ્રુટનું એક વખત વાવેતર કર્યા બાદ તે આપોઆપ ઉગે છે. ડ્રેગન ફ્રુટના છોડના ઉછેરને માત્ર એક વર્ષ જ લાગે છે અને ત્યારબાદ જેવું ડ્રેગન ફ્રુટનું ઉત્પાદન શરૂ થાય છે. ફ્રુટ આવતા જાય પછી ખાસ કોઈ માવજત કરવી પડતી નથી. સાથે સાથે ઓછા પાણીએ પણ ઊગી નીકળે છે. બીજી બાબત એ પણ કે આ છોડમાં કુદરતી આફત સામે ટકવાની એક ગજબ શક્તિ છે. જેને લઈને વાવાઝોડા કે અન્ય આફત સામે ખૂબ જ ઓછું નુકસાન થાય છે. આમ છતાં તે સતત 20 વર્ષ સુધી સામાન્ય માવજતમાં ઉત્પાદન આપતું રહે છે.
અનેક ખેડૂતો ડ્રેગન ફ્રુટના વાવેતર તરફ વળ્યા
અઢી વીઘા જમીનમાં 1 હજાર કિલોથી પણ વધારે ડ્રેગન ફ્રુટની આવક થાય છે. તેને જોતા હાલ 25 વીઘા જેટલી જમીનમાં વધુ ડ્રેગન ફ્રૂટની ખેતી ચાલુ કર્યો છે તેમજ હાલ માર્કેટમાં તેની માંગ સારી છે. એક કિલોના 150 થી 200 રૂપિયા સુધી ભાવ મળે છે. જે જોતા ડ્રેગન ફ્રુટ એ એક વખતના વાવેતર બાદ નફાનો ધંધો છે, જેથી દરેક ખેડૂતે થોડું ઘણું વાવેતર કરવું જોઈએ. ડ્રેગન ફ્રુટ દવા અને લોહીનું શરીરમાં પ્રમાણ વધારવા માટે ખુબજ ઉપયોગી છે. જેથી તેની લોકોમાં માંગ વધુ છે. અનેક ખેતરોમાં તો તે બારોબાર વેચાઈ જાય છે. ભગવાનજીભાઈએ કરેલ ડ્રેગન ફ્રુટનું વાવેતર જોઈને અન્ય ખેડૂતો પણ પ્રોત્સાહિત થઈ રહ્યા છે અને ડ્રેગન ફ્રુટના વાવેતર તરફ વળ્યાં છે.