કોવિડ ૧૯ / અહીં એકસાથે ૧૦૦ સાધુઓ કોરોના પોઝિટિવ આવતા હડકંપ, તંત્રે કરી આ કાર્યવાહી

• દેશના અમુક ભાગોમાં ફરીથી વધી રહ્યું છે સંક્રમણ 
• હિમાચલ પ્રદેશમાં એક જ દિવસમાં ૧૦૦ જેટલા સાધુઓનો રિપોર્ટ પોઝિટિવ આવ્યો 
• તંત્રને મૂંઝવતો પ્રશ્ન- આટલી મોટી સંખ્યામાં કોરોના ફેલાયો કેવી રીતે? 

હિમાચલ પ્રદેશના ધર્મશાળા જિલ્લાના ગ્યોટો મઠમાં એક જ દિવસમાં એકીસાથે 100 બૌદ્ધ સાધુઓ કોરોના પોઝિટિવ મળ્યા પછી ખળભળાટ મચી ગયો છે. કાંગડાના ચીફ મેડિકલ ઓફિસર CMO અનુસાર, આ સમગ્ર વિસ્તારને કન્ટેનમેન્ટ ઝોન તરીકે જાહેર કરવામાં આવ્યો છે. CMO ડો. ગુરદર્શન ગુપ્તાએ જણાવ્યું હતું કે, આ મઠમાં અત્યાર સુધી 156 બૌદ્ધ સાધુઓ કોરોના પોઝિટિવ મળી આવ્યા છે. તંત્ર હવે શોધી રહ્યું છે કે આશ્રમમાં આટલી મોટી સંખ્યામાં કોરોના કેવી રીતે ફેલાયો, અને કઈ રીતે આટલી મોટી સંખ્યામાં લોકો કોરોના પોઝિટિવ થયા?

હિમાચલ પ્રદેશમાં કોરોના કેસો સામે આવ્યા 

નોંધપાત્ર વાત એ છે કે હિમાચલ પ્રદેશમાં ફરી એકવાર કોરોના સંક્રમણના કેસો સામે આવી રહ્યા છે અને તેને જોતા વહીવટીતંત્રે કેટલાક વિસ્તારોમાં પણ કડક કાર્યવાહી શરૂ કરી દીધી છે. કોરોના ગાઈડલાઇન્સનું કડક પાલન કરવામાં આવી રહ્યું છે અને કન્ટેનમેન્ટ ઝોન તરીકે જાહેર કરાયેલા વિસ્તારો પર સતત નજર રાખવામાં આવી રહી છે.

ખાનગી હોસ્પિટલોમાં પણ કોરોના રસીકરણ

તે જ સમયે, ખાનગી હોસ્પિટલોને હિમાચલ પ્રદેશમાં કોરોના રસીકરણ માટેની મંજૂરી આપવામાં આવી છે. અહીં, વિવિધ જિલ્લાની 70 થી વધુ ખાનગી હોસ્પિટલોમાં કોરોના રસી આપવાની  મંજૂરી આપવામાં આવી છે. તે હોસ્પિટલોના નામની યાદી બહાર પાડવામાં આવી છે. સોલન, માંડી, સિરમૌર, કિન્નૌર, કાંગરા અને ઉના સહિતની હોસ્પિટલોના નામ તેમાં સામેલ છે. આ હોસ્પિટલોમાં હવે કોરોના રસી લગાવી શકાય છે.

બીજા ચરણમાં આ લોકોને લગાવાશે રસી 

નોંધનીય છે કે રસીકરણના બીજા તબક્કામાં, 60 વર્ષથી વધુ ઉંમરના વૃદ્ધ અને 45 વર્ષથી વધુ ઉંમરના બીમાર વ્યક્તિઓને રસી આપવામાં આવશે. રસીકરણ અભિયાનના પ્રથમ તબક્કામાં 26 ફેબ્રુઆરી સુધીમાં દેશભરમાં 1.42 કરોડ લોકોને રસી આપવામાં આવી છે. જોકે સરકારે પ્રથમ તબક્કામાં ત્રણ કરોડ ફ્રન્ટ લાઇન કોરોના યોદ્ધાઓને રસી આપવાનું લક્ષ્યાંક બનાવ્યું હતું. આમાં 1,17,88,669 પ્રથમ લેવામાં આવ્યો છે અને 24, 53, 878 ને બીજો ડોઝ આપવામાં આવ્યો છે.