નિવેદન / ધંધુકા હત્યા કેસના પડઘા: લોકગાયક ગીતા રબારીએ ઘટનાને વખોડી, કહ્યું હંમેશા મારા ધર્મ માટે ઉભી રહીશ

• ગીતા રબારીનું નિવેદન 
• "ધંધુકા ઘટના બની તે બહુ દુ:ખદ"
• "તમામને કડકમાં કડક સજા કરવામાં આવે" 

કિશન ભરવાડ હત્યા કેસમાં સમાજથી હિન્દુ સંગઠનો અને નેતાઓથી લઈ કલાકારો સુધી પરિવારને ઝડપી ન્યાય મળે એ માટે માંગ કરી રહ્યા છે. ત્યારે સમગ્ર હત્યા કેસ સામે કચ્છની જાણીતી કોયલ અને રબારી સમાજનો લોકપ્રિય ચહેરો ગીતાબેન રબારીએ પોતાનું નિવેદન જાહેર કર્યું છે. ધંધુકા ખાતે જે ઘટના બની તે ખૂબ જ દુ:ખદ ગણાવતા કહ્યું છે કે કાવતરામાં સંડોવાયેલા તમામને કડકમાં કડક સજા કરવામાં આવે. હું મારા ધર્મ સાથે જોડાયેલી છું, હંમેશા મારા ધર્મ માટે ઉભી રહીશ. ભવિષ્યમાં આવી ઘટના ન બને તેવી  દાખલારૂપ સજા કરવા સરકારને વિનંતી કરી છે.

આરોપીને ફાંસીની સજા કરવામાં આવે: રાજભા ગઢવી
ધંધુકામાં કિશન ભરવાડની હત્યાનો મામલે લોક સાહિત્યકાર રાજભા ગઢવીએ પણ નિવેદન આપતા કહ્યું હતું કે આરોપીઓને ફાંસીની સજા કરવામા આવે, દરેક હિન્દુઓએ એક થઇ રજૂઆત કરવી જોઇએ તેમજ મુસ્લિમ આગેવાનોએ આવા તત્વોને રોકવા જોઇએ. કિશન ભરવાડે પોસ્ટ મુકવા બદલ માફી પણ માગી હતી. બંધારણ અને કાયદો હોવા છતાં મૃત્યુદંડ આપનારને સજા થવી જોઇએ.

આરોપી રમીઝ સેતાની આજે ધરપકડ
કિશન ભરવાડ હત્યા કેસમાં દિવસને દિવસે પોલીસ હત્યામાં સંડોવાયેલા આરોપીઓને ઝડપી રહી છે. ત્યારે હત્યામાં સંડોવાયેલા વધું એક આરોપીને રાજકોટથી ધરપકડ કરવામાં આવી છે. આરોપી રમીઝ સેતા હોવાનું સામે આવ્યું છે. તેણે અગાઉ ઝડપાયેલ આરોપી અજીમ સમાને હથિયાર સપ્લાય કર્યા હતા. આરોપી જંગલેશ્વરનો રહેવાસી છે અને એસઓજીની ટીમ દ્વારા તેની અટકાયત કરવામાં આવી છે. ભાવનગરના ઢસાથી આરોપીને પકડીને એટીએસની ટીમને સોંપી દેવામાં આવ્યો છે. જેની સામે પોલીસે હવે કાયદેસરની કાર્યવાહી હાથ ધરી છે. 

કાયદાકીય રીતે કેસ ફાસ્ટ ટ્રેક કોર્ટમાં ચલાવનો પ્રયત્ન કરીશું-સંઘવી 
આજે ભરવાડ સમાજના પ્રતિષ્ઠિત ગાદીપતિએ આગેવાનો સાથે હર્ષ સંઘવી સાથે મુલાકાત કરી છે.ગૃહરાજ્યમંત્રી હર્ષ સંઘવીએ તેઓને આશ્વાસન આપતા કહ્યું હતું કે પોલીસ ઝડપથી તપાસ કરી રહી છે એક બાદ એક આરોપીને ઝડપી કડક કાર્યવાહી કરી કિશનને ન્યાય અપાવવામાં આવશે.ભરવાડ સમાજ રજૂઆત પર રાજ્ય ગૃહમંત્રીનું નિવેદન આપ્યું છે કે વિવિધ જિલ્લાના અગ્રણીઓ તમામ લોકો સાથે બેઠક થઈ ફાસ્ટ ટ્રેક કોર્ટમાં કેસ ચાલે તેવી માગણી કરવામાં આવી છે. કાયદાકીય રીતે કેસ ફાસ્ટ ટ્રેક કોર્ટમાં ચલાવનો પ્રયત્ન સરકાર દ્વારા કરવામાં આવશે તેવી પ્રયત્ન કરવાની પણ વાત થઈ છે.