જાહ્નવી કપૂરની પહેલી બોલિવુડ ફિલ્મ ‘ધડક’ 20મી જુલાઈના રોજ બૉક્સ ઑફિસ પર રિલીઝ થઈ ગઈ. જો કે આ ફિલ્મ ઓડિયન્સ પર મરાઠી ફિલ્મ 'સૈરાટ' જેવો જાદૂ ન ચલાવી શકી. જેના કારણે ઓડિયન્સ સોશ્યલ મીડિયા પર ફિલ્મને ખૂબ જ ટ્રોલ કરી રહી છે ત્યારે ફિલ્મના વિલન આશુતોષ રાણાએ જાહ્નવી સાથે કામ કરવાના પોતાના અનુભવ જણાવ્યા. એક રિપોર્ટ મુજબ આશુતોષ રાણાએ કહ્યું કે “મારા અનુભવના આધારે કહું તો મને એક વાર પણ નથી લાગતું કે જાહ્નવી શ્રીદેવીની દીકરી છે. મને પહેલા દિવસથી જ લાગવા માંડ્યું હતું કે તે એક મહાન કલાકાર બનવા જઈ રહી છે.”
આશુતોષ રાણાએ કહ્યું કે ''તે લાંબા સમયથી ઈન્ડસ્ટ્રીમાં છે. અનુભવ તમને જણાવી દે છે કે કોણ લાંબી રેસનો ઘોડો સાબિત થશે. જાહ્નવી પાસે શ્રીદેવી વાળો ચાર્મ નથી અને તેણે ક્યારેય તેને હાંસલ કરવાનો પ્રયત્ન પણ નથી કર્યો.'' આશુતોષે આગળ ઉમેર્યું કે ''તેની સાથેના કામને મેં એન્જોય કર્યું. તે બહુ પ્રોફેશનલ છે અને કામને લઈને બહુ ફોકસ્ડ છે. તેની સમજ અને પ્રોફેશ્નલિઝ્મ તેને એ જણાવે છે કે તે એક બોર્ન એક્ટર છે.''
વધુમાં આશુતોષે કહ્યું કે જાહ્નવીની શ્રીદેવી સાથે અને ઈશાનની શાહિદ કપૂર સાથે તૂલના કરવી ખોટી છે. એમણે કહ્યું કે “કોઈપણ સ્ટારકિડમાં આપણે તેના માતા-પિતાને શોધવા મંડીએ છીએ. મને લાગે છે કે આ યોગ્ય નથી. જો તમે તેને માત્ર જાહ્નવી કપૂરની રીતે જોશો તો સમજી શકશો કે તે કેટલી શાનદાર કલાકાર છે.” ઉલ્લેખનીય છે કે ફિલ્મ ધડક મરાઠી ફિલ્મ 'સૈરાટ'ની ઑફિશિયલ હિન્દી રિમેક છે.