VIDEO / ઢબૂડી માતાનાં સમર્થકોનો નવો નુસખો, `જે વિરૂદ્ધમાં બોલશે, તે મરશે' જેવાં ધમકીભર્યા વીડિયો વાયરલ

રાજ્યમાં ઢબૂડી માતા બનીને લીભોળી જનતાને ધતિંગનો શિકાર બનાવનારા ધનજી સામે હવે લોકો સવાલ ઉઠાવતા થયાં છે. ઢબૂડી ઉર્ફે ધનજીની વાતમાં આવી જઈને પોતાનો દીકરો ખોઈ ચૂકેલા બોટાદના ભીખાભાઈએ ફરિયાદ નોંધાવ્યાં બાદ અને જાથા વિજ્ઞાનનાં તર્કબદ્ધ આક્ષેપો બાદ પોલીસે ધનજીના ઠેકાણાઓ અને નિવાસસ્થાનોની ઝડતી લેવાનું શરૂ કરી દીધું છે. તો બીજી તરફ રૂપાલ ગામમાંથી પણ ધનજીના પાખંડ વિરુદ્દ સૂર ઉઠી રહ્યાં છે.

અંધશ્રદ્ધાળુનાં એક વિશાળ સમૂહ વચ્ચે સોશિયલ મીડિયા દ્વારા અને મેળાવડા દ્વારા છવાઈ ગયેલો ધનજી હવે ધરપકડનાં ભયથી ભૂગર્ભમાં ચાલ્યો ગયો છે. જો કે એ પછી ચિંતાની  અને પોલીસ માટે પડકારજનક વાત એ ઊભી થઈ છે કે, હવે ધનજીનાં સમર્થકો ફરી પાછા સોશિયલ મીડિયાનો ઉપયોગ કરીને ઢબૂડીનાં વિરોધીઓને ડરાવવાની રીત રસમો અપનાવી રહ્યાં છે. તેઓ ઢબૂડીનો વિરોધ કરવાથી કેવા નુકસાન થાય છે તેનાં વિડિયો બનાવીને સોશિયલ મીડિયામાં શેર કરવા લાગ્યાં છે.

ઢબૂડી માતા હાલમાં ભૂગર્ભમાં ઉતરી ગયાં છે. તેમનો દરબાર થોડા દિવસથી ક્યાંય ભરાયો નથી. ઢબૂડી માતા પોતાનો પક્ષ રજૂ કરી શકે તેવો કોઈ તેમની પાસે તર્ક નથી. તેમનાં સમર્થકો પાસે પણ ઢબૂડી માતાને અને પોતાને ઉગારી શકે તેવી સર્વ સ્વીકાર્ય બને તેવી દલીલો નથી. આથી હવે ઢબૂડીની ગેરહાજરીમાં તેનાં સમર્થકોએ મોરચો સંભાળી લીધો છે. આ શાણા સમર્થકો ભોળા શ્રદ્ધાળુઓ અને આમ નાગરિકોને ગર્ભિત ધમકી દેતા વીડિયો વાયરલ કરવા લાગ્યાં છે. તેમનાં આ વીડિયોમાં એ જ સૂર વહે છે કે જો તમે ઢબૂડી વિરુદ્ધ બોલશો તો ગંભીર પરિણામો ભોગવવા પડશે. આવી વાત ફેલાવવા માટે તેમનાં સમર્થકો ભૂતકાળમાં ઢબૂડીનાં દરબારમાં કોઈએ ભોળા અંધશ્રદ્ધાળુએ માંગેલી માફીની કરેલા એકરારનાં જૂના વિડિયો વાયરલ કરવા લાગ્યાં છે.

ઢબૂડીનાં હકડેઠઠ ભરાયેલા દરબારની અને ભોળાશ્રદ્ધાળુઓની વિનવણીનાં વિડિયો હાલમાં સોશિયલ મીડિયામાં વાયરલ થઈ રહ્યાં છે. આ વીડિયોમાં ઢબૂડીનાં ભરાયેલા દરબારમાં એક સમર્થક ઉભો થઈને કહી રહ્યો છે. ન માનો તો કંઈ નહીં પરંતુ અવાજ ન ઉઠાવશો. વિરોધ ન કરશો. તેનો મતલબ એ સ્પષ્ટ છે કે અમારા ધતિંગ ચાલવા દો તમે ન ફસાવ તો કંઈ નહીં. બીજા ફસાય છે તેને ન રોકો! સાંભળો તમે આ ઢબૂડી સમર્થકની વાતનો આ જ સૂર નથી તો શું છે.

ધનજી ઓડ ઉર્ફે ઢબૂડી અને તેનાં સમર્થકો આજ સુધી ઢબૂડીનાં પરચાની વાતો કરતા હતાં. ઢબૂડીનાં આશીર્વાદનાં કારણે લોકોનાં સફળ થયેલા કાર્યોનો પ્રચાર કરતા હતાં પરંતુ જ્યારેથી ઢબૂડી સામે આંગળી ચીંધાવા લાગી છે અને લોકો ફરિયાદો કરતા થયા છે ત્યારથી ઢબૂડીનાં સમર્થકોએ `માઠાફળો'ની એટલે કે ઢબૂડીનો વિરોધ કરશો તો બહુ મોટું નુકસાન થશે એવો ડર ફેલાવાનું શરૂ કર્યું છે. જેની સામે લોકોએ સાવધ થઈ જવાની જરૂર છે.