જયંતિ ભાનુશાળીની હત્યા માટે છબીલ પટેલે 30 લાખ રૂપિયાની આપી હતી સોપારીઃ DGP

જયંતી ભાનુશાળી હત્યાકેસમાં નવો વળાંક આવ્યો છે. અત્યાર સુધી દેશબહાર રહીને પોતે નિર્દોષ હોવાનો અને પોતાને કાવતરાનો ભોગ બનાવ્યા હોવાનો દાવો કરનારા છબીલ પટેલનું નામ મુખ્ય આરોપી તરીકે જાહેર થયું છે. છબીલ પટેલે જ ભાનુશાળીની હત્યા કરવા માટે શાર્પ શૂટરને સોપારી આપી હોવાનું ખુદ શાર્પ શૂટરે વટાણા વેરી દીધા છે. ત્યારે હવે ભાનુશાળીની હત્યા બાદ મસ્કત ભાગી ગયેલા છબીલ પટેલની ધરપકડ માટે ચોતરફથી ભીંસ વધે તે નક્કી છે.

લોહીતરસી એક સિયાસત...
રાજ્યમાં ચર્ચાસ્પદ બનેલા અને અનેકો સામે આંગળી ચીંધનારા ભાનુશાળી હત્યા કેસમાં હવે નવો જ વળાંક આવ્યો છે. આ કેસની તપાસ કરી રહેલા સીટ એટીએસ અને અમદાવાદ ક્રાઈમબાંચની આતુરતાનો અંત નજીક આવતો જાય છે. કેમકે જયંતી ભાનુશાળી હત્યા કેસમાં સીઆઈડી ક્રાઈમની તપાસમાં હવે મુખ્ય સૂત્રધાર તરીકે ખુદ છબીલ પટેલનું નામ સામે આવ્યું છે. છબીલ વિરુદ્ધ બીજા કોઈએ નહીં પરંતુ ગોળી છોડનારા અને ઝડપાઈ ચૂકેલા શાર્પશૂટરે જ પોલીસ સમક્ષ કેફિયત રજૂ કરી છે. જયંતીભાનુ શાળી હત્યાકેસમાં થોડા દિવસ અગાઉ ડાંગમાંથી અશરફ અને શશીકાંત કામલે નામના બે શાર્પશૂટરોની ધરપકડ કરવામાં આવી હતી. એ ધરપકડ સાથે જ એ અટકળ તેજ બની હતી કે હવે મુખ્ય આરોપીનું નામ જાહેર થવાની વાર નહીં લાગે અને થયું પણ તેવું જ. પોલીસની શાર્પ પૂછપરછમાં ખુદ શાર્પશૂટર પડી ભાંગ્યા અને તેમણે છબીલ પટેલનુ નામ આખરે જણાવી જ દીધું. શાર્પ શૂટરનોના કહેવા મુજબ ખુદ છબીલ પટેલે તેમને ભાનુશાળીની હત્યા માટે સોપારી આપી હતી. આ સોપારી પેટે તેમને 30 લાખ રૂપિયા આપવાનું નક્કી કરવામાં આવ્યુ હતું.

શાર્પ શૂટરોએ ટ્રેનમાં હત્યા પહેલા રેકી કરી હતી
શાર્પ શૂટરોએ આપેલી કેફિયત મુજબ અને સીઆઈડીને મળેલી માહિતી મુજબ આરોપીઓએ પહેલા ભુજમાં હત્યા કરવાનો પ્લાન કર્યો હતો. પરંતુ ત્યાંથી નાસી છુટવા માટે યોગ્ય જગ્યા મળી શકે તેવું ન હોવાથી શાર્પશુટરેના પાડી હતી. ત્યારબાદ ટ્રેનમાં જ હત્યા કરવાનું નક્કી થયું હતું. શાર્પ શૂટરોએ ટ્રેનમાં હત્યા પહેલા રેકી કરી હતી. જયંતિ ભાનુશાળી AC કોચમાં મુસાફરી કરે છે તેવી માહિતી પણ મેળવી હતી. હત્યારાઓએ સામખ્યાળી સુધી મુસાફરી કરી ત્યાં જ હત્યા કરવાનું નક્કી કર્યું હતું. આ બંનેને છબીલ પટેલે એડવાન્સ 5 લાખ રૂપિયા આપ્યા હતા. આ પાંચ લાખ રૂપિયામાં આરોપીઓએ હથિયાર ખરીદ્યા હતા.

અશરફે પહેલી ગોળી મારી અને ત્યારબાદ બીજી ગોળી શશીકાંતે મારી હતી 
ભચાઉમાં ટ્રેન આવી પરંતુ H1 કોચ બંધ હતો એટલે બાજુના કોચમાંથી હત્યારાઓએ અંદર પ્રવેશ કર્યો હતો. કોચમાં અન્ય કોઈ વ્યક્તિ જાગતા હોવથી હત્યારાઓ બાથરૂમમાં જઈ હત્યા માટેની તૈયારી કરી લઈને H1 કોચ પાસે પહોંચ્યા હતા. બન્નેમાંથી શશીકાંતે પહેલાં ત્યાં પહોંચી ગયો હતો તેણે જગ્યા છે તેવું જણાવી અશરફને પણ બોલાવી લીધો. જ્યાં આવ્યા બાદ અશરફે પહેલી ગોળી મારી અને ત્યારબાદ બીજી ગોળી શશીકાંતે મારી હતી.

શાર્પશૂટરો રાધનપુર માર્ગેથી ભાગ્યા હતા 
હત્યા કર્યા બાદ શાર્પશૂટરો રાધનપુર માર્ગેથી ભાગ્યા હતા. ત્યાર બાદ બન્ને શાર્પ શૂટરો કુંભ મેળામાં અને વૈષ્ણોદેવી મંદિર પણ ગયા હતા. હત્યા વખતે કનેક્ટેડ રહેવા માટે છબીલ પટેલ બન્ને શાર્પ શૂટરોને મોબાઈલ આપ્યા હતા જે મોબાઈલ હત્યારાઓએ હત્યા બાદ તોડીને ફેંકી દીધા હતા.

શંકાના આ હતા કારણો 
જયંતી ભાનુશાળીની હત્યા થઈ ત્યારથી જ ભાનુશાળીના પરિવારજનોએ છબીલ પટેલ પર આંગળી ચીંધવા માંડી હતી. તો બીજી તરફ રાજકારણમાં થોડું ઘણું જાણતા લોકો પણ આ કેસમાં છબીલ પટેલની ભૂમિકા નકાર શકતા ન હતા. કેમ કે હત્યાને અંજામ આપનારા ઘણા બધા રાજકીય ઘટનાક્રમ છબીલ પટેલ અને જયંતી ભાનુશાળી વચ્ચે સર્જાયા હતા. કેમકે છબીલ પટેલ કોંગ્રેસમાં હતા ત્યારે ભાનુશાળીના રાજકીય હરિફ હતા. છબીલ પટેલ ભાજપમાં જોડાયા તો ભાનુશાળીની ટિકિટ કપાઈ. છબીલ પટેલને ભાજપમાંથી ટિકિટ મળતા બન્ને દુશ્મન બન્યા. બન્ને નેતાઓ એકબીજાની રાજકીય કારકિર્દી ખતમ કરવા માગતા હતા. દરમિયાન મનીષા ગોસ્વામી દ્વારા ભાનુશાળી પર દુષ્કર્મની ફરિયાદ નોંધાઈ. ફરિયાદ પાછળ છબીલ પટેલનો હાથ હોવાની ભાનુશાળીને શંકા ગઈ હતી. મનીષા ગોસ્વામી સામે ભાનુશાળીએ બ્લેકમેઈલિંગની ફરિયાદ કરી. છબીલ પટેલે મનીષા ગોસ્વામીને હાથ બનાવ્યો. મનીષા અને છબીલ પટેલે ભાનુશાળીને ખતમ કરવાનો પ્લાન ઘડ્યો. ભાનુશાળીની હત્યા માટે શાર્પશૂટરોને સોપારી આપવામાં આવી.

ભાનુશાળીની હત્યાના કેસમાં છબીલ પટેલની મુશ્કેલી વધી શકે છે. ભાગેડુ જાહેર કરાયેલા છબીલની વિરૂધ્ધ તપાસ એજન્સી રેડ કોર્નર નોટિસ ઈશ્યુ કરી શકશે. છબીલ પટેલની ધરપકડ માટે વોરન્ટ પણ ઇસ્યુ કરવાની કાયદાકિય પ્રક્રિયા આગળ ધપાવી દેવાઇ છે. વોરન્ટ ઇસ્યુ થયા બાદ છબીલ પોલીસ સમક્ષ હાજર નહીં થાય તો તેની સંપત્તિઓ ટાંચમાં લેવાશે તેવી શક્યતા દેખાઈ રહી છે.