BIG BREAKING / DGCA એ સ્પાઇસજેટને ફટકારી નોટિસ, 18 જ દિવસમાં 8 ઘટનાઓ પર માંગ્યો જવાબ

• 18 દિવસમાં એરક્રાફ્ટમાં ટેકનિકલ ખામીની 8 ઘટનાઓ પર માંગ્યો જવાબ
• દિલ્હી-દુબઈ ફ્લાઈટમાં ખામી સર્જાતાં પાકિસ્તાનમાં ઈમરજન્સી લેન્ડિંગ કરાયું હતું 
• કંડલા-મુંબઈ ફ્લાઇટમાં પણ ખામી સર્જાતાં ઈમરજન્સી લેન્ડિંગ કરાયું હતું 

તાજેતરમાં 18 દિવસમાં સ્પાઈસ જેટ એરક્રાફ્ટમાં ટેકનિકલ ખામીની 8 ઘટનાઓ સામે આવી છે, જેને લઈ હવે DGCA હરકતમાં આવ્યું છે અને સ્પાઈસ જેટને નોટિસ ફટકારી છે. વાસ્તવમાં દિલ્હી-દુબઈ ફ્લાઈટનું ઈંધણ ઈન્ડિકેટરમાં ખામી સર્જાયા બાદ પાકિસ્તાનના કરાચીમાં ઈમરજન્સી લેન્ડિંગ કરવામાં આવ્યું હતું. આ સાથે તે જ દિવસે, કંડલા-મુંબઈ ફ્લાઇટને મધ્ય હવામાં વિન્ડશિલ્ડમાં તિરાડ પડ્યા બાદ મહારાષ્ટ્રની રાજધાનીમાં લેન્ડ કરવામાં આવી હતી. 

ડિરેક્ટોરેટ જનરલ ઓફ સિવિલ એવિએશન (DGCA) એ સ્પાઈસ જેટને નોટિસ જારી કરી છે. માહિતી અનુસાર, છેલ્લા 18 દિવસમાં 8 ખરાબી ઘટનાઓ બાદ DGCAએ સ્પાઇસજેટને કારણ બતાવો નોટિસ જારી કરી છે. મંગળવારે આ બે ઘટનાઓ સામે આવ્યા બાદ છેલ્લા 18 દિવસમાં સ્પાઈસ જેટ એરક્રાફ્ટમાં ટેકનિકલ ખામીની 8 ઘટનાઓ સામે આવી છે. ડીજીસીએના જણાવ્યા અનુસાર આ તમામ ઘટનાઓની ગંભીરતાથી તપાસ ચાલી રહી છે.

DGCA (Directorate General of Civil Aviation) issues show-cause notice to SpiceJet in connection with the degradation of safety margins of its aircraft. pic.twitter.com/eD5r0vPSk0

— ANI (@ANI) July 6, 2022

સ્પાઈસ જેટ એરલાઈન ત્રણ વર્ષથી ખોટમાં ચાલી રહી છે

નોંધનીય છે કે, સ્પાઈસ જેટ એરલાઈન છેલ્લા ત્રણ વર્ષથી ખોટમાં ચાલી રહી છે. સસ્તી સેવા પૂરી પાડતી સ્પાઇસજેટને 2018-19માં રૂ. 316 કરોડ, 2019-2020માં રૂ. 934 કરોડ અને 2020-21માં રૂ. 998 કરોડનું નુકસાન થયું હતું. ઉડ્ડયન ક્ષેત્ર કોરોના રોગચાળામાંથી પુનઃપ્રાપ્ત થઈ રહ્યું છે. એવિએશન કન્સલ્ટિંગ ફર્મ CAPA એ 29 જૂનના રોજ જણાવ્યું હતું કે, ભારતીય એરલાઇન્સની ખોટ 2021-22માં $3 બિલિયનથી ઘટીને 2022-23માં $1.4 અને 1.7 બિલિયનની વચ્ચે આવી શકે છે.