એક તરફ મહારાષ્ટ્રમાં કોરોના મહામારીએ ભરડો લીધો છે તો બીજી તરફ આજે આશરે 10 મહિના બાદ ફરી એકવાર અજીત પવાર અને ભાજપના નેતા દેવેન્દ્ર ફડણવીસ સાથે જોવા મળ્યા હતા. નોંધનીય છે કે, 23 નવેમ્બરે ફડણવીસ અને પવારે વહેલી સવારે સપથગ્રહણ કરીને સૌને ચોંકાવી દીધા હતા.
10 મહિના બાદ સાથે જોવા મળ્યા ફડણવીસ અને અજીત પવાર
મહારાષ્ટ્રના રાજકારણમાં અનેક તર્ક-વિતર્ક
પ્રાપ્ત થતી જાણકારી પ્રમાણે શુક્રવારે બંન્ને નેતાઓ પુણે મનપાના મલ્ટી સ્ટોરી કોવિડ-19 હોસ્પિટલનું ઉદ્યાટન સમારોહમાં જોવા મળ્યા હતા. નોંધનીય છે કે, આ સમયે તેઓ ભાજપના રાજ્ય અધ્યક્ષ ચંદ્રકાંત પાટિલ પણ સાથે જોવા મળ્યા હતા.
10 મહિના બાદ સાથે જોવા મળ્યા બંન્ને નેતા
મહારાષ્ટ્રમાં વિધાનસભાની ચૂંટણી યોજાઇ ત્યારથી જ ઉથલપાથલ ચાલી રહી છે. રાતો-રાતે અજીત પવાર અને ફડણવીસે સરકારની રચના કરી દીધી તો ત્યારબાદ ફરી એકવાર અજીત પવાર NCPમાં જોડાયા અને ગણતરીના કલાકોમાં ભાજપની સરકાર ઉથલી. ત્યારબાદ શિવસેના-કોંગ્રેસ અને એનસીપીના ગઠબંધનવાળી સરકારની રચના થઇ અને હાલ આ સરકાર મહારાષ્ટ્રમાં કાર્યરત છે. ત્યારે આજે આશરે 10 મહિના બાદ પવાર અને મહારાષ્ટ્રના પૂર્વ મુખ્યમંત્રી દેવેન્દ્ર ફડણવીસ સાથે જોવા મળતા લોકોમાં ફરી રાજકીય અટકળો શરૂ થઇ હતી.
ફડણવીસે અજિત પવારની પ્રશંસા કરી, શિવસેનાની ટીકા કરી
એવું કહેવામાં આવી રહ્યું છે કે બંને એક સાથે કાર્યક્રમમાં હાજર રહ્યા બાદ ફરી એકવાર રાજકીય ગરમાવો જોવા મળી રહ્યો છે. રસપ્રદ વાત એ છે કે, કાર્યક્રમ દરમિયાન પૂર્વ સીએમ ફડણવીસે પુણે જિલ્લામાં અજિત પવાર દ્વારા કરાયેલા કામની પ્રશંસા કરી હતી પરંતુ શિવસેનાની ટીકા પણ કરી હતી.