રાજરમતની લડાઈમાં કેટલીક વાર વિકાસ આડે સરહદીય મુસીબતો સામે આવી જતી હોય છે એવી જ સ્થિતિ છે નવસારી લોકસભાની, નામ નવસારી છે પરંતુ પ્રભુત્વ સુરત અને વલસાડ જિલ્લાનું છે. બંને જિલ્લાઓની વચ્ચે સેન્ડવીચ બની ગયેલાં શહેર આજ સુધી રાજકીય આટાપાટા અને સત્તાની ખેંચતાણ વચ્ચે રહેસાઈ રહ્યું છે અને વિકાસ દૂર જઈ રહ્યો છે. ત્યારે સામાન્ય ચૂંટણી પહેલાં કેવો છે આ નવસારીનો મિજાજ.
નવસારી લોકસભા સીટમાં સુરતની ચાર અને નવસારીની 3 વિધાનસભા સીટોનો સમાવેશ થાય છે. જેમાં નામ નવસારીનું અને વર્ચસ્વ સુરતનું રહ્યું છે. છેલ્લી 5 ટર્મથી નવસારી જિલ્લાની આ જ સ્થિતિ છે. જે સુધરી નથી. 2009માં નવસારી નામની સ્વતંત્ર સીટનુ સીમાંકન તો થયું પરંતુ નવસારી જિલ્લાને પ્રતિનિધિત્વનો મોકો મળ્યો નથી.
2009ની પહેલી ટર્મમાં ભાજપનાં સીઆર પાટીલ 1 લાખ 35 હજાર વોટથી જીત્યાં, બીજી ટર્મમાં 5 લાખ 56 હજાર વોટોથી જીત્યાં છે. અગાઉ કાશીરામ રાણા અને મોરારજી દેસાઈ જેવાં નેતાઓ આ સીટ પરથી જીતતા આવ્યાં છે અને કેન્દ્રમાં નવસારીનાં નામે પ્રતિનિધિત્વ કરતા આવ્યાં છે. પરંતુ નવસારી સાથે સતત અન્યાયનાં કારણે વિકાસની દિશા ધૂંધળી બની ગઈ છે.
સુરત અને નવસારી વચ્ચે માત્ર 20 કીલોમીટરનું અંતર છે તેમ છતાં ટ્વિનસિટી પ્રોજેકટ સફળ થઈ શક્યો નથી. બીજી તરફ નુડા જેવું માળખુ પણ સફળ થયું નથી. ભાજપની વધતી જીતની લીડ છતાં નવસારીનાં વિકાસની લીડ વધી નથી. એક તરફ નવસારી લોકસભામાં નવસારી વિસ્તારમાં ભાજપ મજબૂત થતું જાય છે અને કોંગ્રેસનું ધોવાણ થઈ રહ્યું છે. પરંતુ આ વિકાસ પક્ષ પૂરતો સીમિત છે.
શહેરથી વિકાસ હજુ ઘણો દૂર છે. હાલનાં રાજકારણમાં ભાજપ લીડ વધારવા પ્રયત્નરત છે અને કોંગ્રેસ લીડ વધારવા કામે લાગી છે. જાતિવાદ જેવાં મુદ્દાએ પણ જોર પકડ્યું છે. જેમાં શહેરનાં વિકાસનો મુદ્દો ક્યાંક ખોવાઈ ગયો છે.
રાજકીય કાવાદાવાઓની વચ્ચે નવસારીનું સીમાંકન રાજકીય લાભાલાભનો મુદ્દાને લઈને બે લોકસભામાં વહેચાઈ ગયું છે. રાજકીય ફાયદાઓ માટે નવસારીને ભલે વિભાજીત કર્યુ હોય પરંતુ નવસારીને પોતાની આગવી ઓળખ અપાવવા માટે વિકાસની સાથે જોડવામાં આવે તો જ રાજકીય હેતુ સિદ્ધ થઈ શકે અને સાચા અર્થમાં જનતાનાં પ્રતિનિધિની જીત કહેવાય.