પોલીસ દ્વારા 30 કરતા વધુ કાર્યકરોની કરાઈ છે અટકાયત
આજે મહિલા દિવસ પર ગાંધીનગરમાં કોંગ્રેસ સેવાદળના મહિલા કાર્યકરો અને પોલીસ વચ્ચે ઘર્ષણ સાથે ઝપાઝપી થઈ છે.મહત્વનું છે કે, કોંગ્રેસ સેવાદળની મહિલાના દેખાવો બાદ વિધાનસભા તરફ કૂચ કરવા લાગ્યા હતા. જેના કારણે પોલીસે કોંગ્રેસની મહિલાઓને અટકાવાતા મામલો બિચક્યો હતો. જે બાદ પોલીસ દ્વારા અનેક મહિલા કાર્યકર્તાઓની અટકાયત કરવામાં આવી છે. પોલીસ હેડ ક્વાર્ટર કચેરી કોંગ્રેસનું ડેલીગેશન પહોચ્યું હતું જેમાં જગદીશ ઠાકોર, સી.જે ચાવડા, સુખરામ રાઠવાએ કચેરીમાં પોલીસના વર્તન સામે યોગ્ય રજૂઆત કરી હતી.
ગુજરાત વિધાનસભા બહાર હોબાળા મુદ્દે SPનું નિવેદન
આ અંગે ગાંધીનગરના SP, મયુર ચાવડાના જણાવ્ચા પ્રમાણે, આજે મહિલા દિવસના કારણે કાર્યક્રમની મંજૂરી આપવામાં આવી હતી પરંતુ કાર્યક્રમમાં અમુક લોકોએ ઉશ્કેરણી જનક ભાષણ કર્યા હતા અને ત્યાંથી નિકળી ગયા હતા. બાદમાં આગળ કૂચ કરવાની જાહેરાત કરી. જે બાદ આમને સામને સ્થિતિ થતાં પોલીસ દ્વારા 30 કરતા વધુ કાર્યકરોની અટકાયત કરાઈ છે
વિધાનસભાને ઘેરવાનો પ્રયાસ કરાયો હતો
ઉલ્લેખનીય છે કે, કોંગ્રેસ મહિલા કાર્યકર્તાઓ દ્વારા રાજ્યમાં મહિલાઓ પર થતા ગેંગરેપ, દહેજની મહિલા પરેશાન, આત્મહત્યાના બનાવો સહિતના અનેક અત્યાચારો વિરૂધ વિધાનસભા ગૃહને ઘેરવાનો પ્રયાસ કરવામાં આવી રહ્યો હતો. જે માટે કાર્યકર્તાઓએ વિધાનસભા તરફ કૂચ કરી હતી. જેથી પોલીસ દ્વારા મહિલા કાર્યકર્તાઓને રોકવામાં આવી હતી. નોંધનીય છે કે, મહિલા દિન નિમિતે ગાંધીનગરમાં કોંગ્રેસનું વિશાળ મહિલા સંમેલન યોજાયું હતુ. જેમાં કોંગ્રેસના પ્રભારી રઘુ શર્મા, વિપક્ષના નેતા સુખરામ રાઠવા, પ્રમુખ જગદીશ ઠાકોર, મહિલા પ્રમુખ, સહિત તમામ નેતાઓ સેવાદળ સહિતની તમામ મહિલા કાર્યકરો હાજર રહી હતી.