વિન્ડીઝ સામેની બીજી વન ડે ભલે ટીમ ઇન્ડિયાએ 107 રને જીતી લીધી હોય, પરંતુ તેની એક નબળાઈ ફરી એક વાર ઉજાગર થઈ છે. અહીં વાત થઈ રહી છે ટીમ ઇન્ડિયાની ફિલ્ડિંગની કે જે સુધરવાનું નામ જ લેતી નથી.
આવતી કાલે કટકમાં નિર્ણાયક વન ડે
વિન્ડીઝ સામે ભારતની ફિલ્ડિંગના સ્તરમાં સતત ઘટાડો થઈ રહ્યો છે
બીજી વન ડેમાં ત્રણ કેચ છોડ્યા અને એક સ્ટમ્પિંગ ચાન્સ પણ ગુમાવ્યો
ખાસ કરીને વિન્ડીઝ સામે ભારતની ફિલ્ડિંગના સ્તરમાં સતત ઘટાડો થઈ રહ્યો છે. વિશાખાપટ્ટનમમાં ટીમ ઇન્ડિયાએ એક-બે નહીં, વિન્ડીઝે ચાર તક આપી. એટલે કે ટીમ ઇન્ડિયાએ બીજી વન ડેમાં ત્રણ કેચ છોડ્યા અને એક સ્ટમ્પિંગ ચાન્સ પણ ગુમાવ્યો. આવતી કાલે કટકમાં શ્રેણીની ત્રીજી અને નિર્ણાયક વન ડે રમાવાની છે ત્યારે ભારતીય ટીમે પોતાની ફિલ્ડિંગ સુધારવા પર ખાસ ધ્યાન આપવું પડશે.
ભારતની ફિલ્ડિંગ સતત ખરાબ થઈ રહી છે. વિન્ડીઝ સામે ટી-20 શ્રેણીની ત્રણ અને વન ડે શ્રેણીની બે- એમ કુલ પાંચ મેચમાં ભારતીય ટીમ ૧૫ કેચ ટપકાવી ચૂકી છે. મતલબ કે દરેક મેચમાં ટીમ ઇન્ડિયાએ સરેરાશ ત્રણ કેચ છોડ્યા છે. જો આવી જ કંગાળ ફિલ્ડિંગનું પ્રદર્શન ચાલુ રહ્યું તો આગામી વર્ષે રમાનારા ટી-20 વિશ્વકપમાં ભારતનું જીતવું મુશ્કેલ બની જશે. બીજી મેચ પૂરી થયા બાદ ટીમ ઇન્ડિયાના કેપ્ટન વિરાટ કોહલીએ જણાવ્યું હતું, ''કેચ ઝડપવામાં અમારું પ્રદર્શન નિરાશાજનક રહ્યું. અમારી ફિલ્ડિંગનું સ્તર એવું નહોતું, જેવું અમે સેટ કર્યું છે. ફિલ્ડિંગ બાબતે અમારે ખાસ ધ્યાન આપવું પડશે.''
રાહુલે કેચ ટપકાવ્યો
વિશાખાપટ્ટનમમાં ટીમ ઇન્ડિયાનું ખરાબ પ્રદર્શન પ્રથમ ઓવરથી જ શરૂ થઈ ગયું હતું. વિન્ડીઝની ઇનિંગ્સના ત્રીજા જ બોલે કે. એલ. રાહુલે દીપક ચાહરની ઓવરમાં શેઈ હોપનો આસાન કેચ કેચ ટપકાવી દીધો.
ચાહરે કેચ છોડ્યો
વિન્ડીઝની ઇનિંગ્સની 24મી ઓવરના ત્રીજા બોલ પર નિકોલસ પૂરન ઊંચો શોટ રમ્યો અને બોલ લોન્ગઓન તરફ ગયો. બહુ જ આસાન કેચ હતો, પરંતુ દીપક ચાહર એ કેચ પકડી શક્યો નહીં. બોલર રવીન્દ્ર જાડેજા અને કેપ્ટન વિરાટ કોહલીને વિશ્વાસ નહોતો થતો કે આસાન કેચ છૂટી ગયો છે.
પંતે સ્ટમ્પિંગ ગુમાવ્યુંઃ વિન્ડીઝની ઇનિંગ્સની 31મી ઓવરના પ્રથમ બોલ પર જ ઋષભ પંતે ભૂલ કરી. તેણે કુલદીપ યાદવની બોલિંગમાં શેઈ હોપને સ્ટમ્પ આઉટ કરવાની તક ગુમાવી. કુલદીપે પોતાની ગૂગલીથી ક્રીઝ પર જામી ગયેલા શેઈ હોપને ચકમો આપ્યો હતો, પરંતુ પંત સ્ટમ્પિંગ કરી શક્યો નહોતો.
વિરાટે પણ કેચ છોડ્યો
32મી ઓવરના ત્રીજા બોલ પર વિરાટ કોહલીથી પણ કેચ છૂટી ગયો હતો, જોકે એ કેચ થોડો મુશ્કેલ જરૂર હતો. શમીની બોલિંગમાં હોપ હવામાં શોટ રમ્યો. વિરાટ મિડઓફ પર હતો અને તે કેચ કરવા માટે પાછળની તરફ દોડ્યો, પરંતુ બોલ તેની આંગળીઓને સ્પર્શીને બાઉન્ડ્રી તરફ ચાલ્યો ગયો હતો.
કેરેબિયન ટીમ પર વાપસીનું દબાણઃ આવતીકાલની નિર્ણાયક વન ડેમાં કેરેબિયન ટીમ પર વાપસીનું દબાણ રહેશે. ચેન્નઈ અને તિરુવનંતપુરમમાં વિન્ડીઝનો અનુભવ બહુ સારો રહ્યો હતો. આ સ્થિતિમાં ટીમનાે કેપ્ટન પોલાર્ડ કટકમાં પોતાની જીતને અશક્ય માનતો નથી. આમ છતાં ટીમ પાસે બોલિંગમાં શિસ્ત અને ફિલ્ડિંગમાં સુધારાની આશા રાખી રહ્યો છે. એ ઉપરાંત વિન્ડીઝના બેટ્સમેનોએ ભારતીય બોલર્સ સામે સાવધાની રાખવી પડશે.