નિવેદન / દેવેન્દ્ર ફડણવીસે જણાવ્યું કારણ, સૌથી મોટી પાર્ટી હોવા છતા BJP સત્તામાં કેમ ન આવી શકી

• કોંગ્રેસ ઉમેદવાર નાના પટોલે મહારાષ્ટ્ર વિધાનસભાના નવા સ્પીકર બન્યા છે
• બીજપીએ સ્પષ્ટતા કરી કે અમે મહારાષ્ટ્રની પરંપરાનું ધ્યાન રાખ્યું છે
• ફડણવીસે કહ્યું, રાજનૈતિક ગુણાગણિત યોગ્યતા પર ભારે પડ્યું

બીજપીએ સ્પષ્ટતા કરી કે અમે મહારાષ્ટ્રની પરંપરાનું ધ્યાન રાખ્યું છે અને આપણે આ પદને વિવાદમાં લાવવું જોઇએ નહીં. તેથી અમે અમારા ઉમેદવારનું નામ પાછુ ખેંચ્યું છે. આ વચ્ચે મહારાષ્ટ્રના પૂર્વ મુખ્યમંત્રી દેવેન્દ્ર ફડણવીસે રવિવારે કહ્યું કે ભાજપ રાજ્યમાં સૌથી મોટી પાર્ટી તરીકે ઉભરી આવ્યા બાદ પણ સત્તામાં ન આવી શકી. કેમકે ' રાજકીય ગુણાગણિત યોગ્યતા પર ભારે પડ્યું.'

ચૂંટણી પહેલા ફડણવીસ દ્વારા આપવામાં આવેલા નારા 'હું પાછો ફરીશ' પર કટાક્ષને લઇને પૂર્વ મુખ્યમંત્રીએ સ્વીકાર કર્યો કે તેઓએ આમ કહ્યું, પરંતુ તેના માટે સમય આપવાનું ભૂલી ગયા હતા. તેઓએ કહ્યું કે, 'તમારે કેટલોક સમય રાહ જોવી પડશે.' 

નોંધનીય છે કે, ફડણવીસ રાજ્યમાં વિધાનસભામાં તેમના વિપક્ષના નેતા બનવા પર તેમને શુભેચ્છા પાઠવવા આપવામાં આવેલા પ્રસ્તાવ બાદ બોલી રહ્યા હતા. પ્રસ્તાવ મુખ્યમંત્રી ઉદ્ધવ ઠાકરે દ્વારા રજુ કરવામાં આવ્યો. આ પ્રસ્તાવનો એનસીપીના જયંત પાટીલ અને કોંગ્રેસના ધારાસભ્ય દળના નેતા બાલાસાહેબ થોરાટ સહિત અન્ય પાર્ટીના સદસ્યોએ સમર્થન કર્યું હતું. 

ફડણવીસે કહ્યું કે, ભાજપને જનાદેશ મળ્યો, કેમકે અમારી પાર્ટી એકલી સૌથી મોટી પાર્ટી છે. 21 ઓક્ટોબરની વિધાનસભા ચૂંટણીમાં અમારો સ્ટ્રાઇટ રેટ 70 ટકા રહ્યો, પરંતુ રાજનૈતિક ગુણાગણિત યોગ્યતા પર ભારે પડ્યું. જેમને ચૂંટણીમાં 40 ટકા અંક મળ્યા તેઓએ સરકાર બનાવી લીધી.