અમદાવાદ / તમારા પૈસા પડી ગયા છે, કહી કારની સીટ પરથી મહિલાના રૂ. એક લાખની તફડંચી

47 વર્ષીય દીપ્તિ ભટ્ટ હાલમાં વડોદરાની એક ખાનગી કંપનીમાં મેનેજર તરીકે નોકરી કરે છે. ગઈ કાલે સવારે દીપ્તિબહેન અને તેમની મિત્ર તથા ડ્રાઇવર સાથે વડોદરાથી કાર  લઈને અમદાવાદ આવ્યાં હતાં. પાલડી ખાતે આવેલ વી એફ એસ કેનેડા ઇમિગ્રેશનની ઓફિસમાં તેમનાં મિત્રનું પાસપોર્ટ સબમિટ કરાવવા માટે આવ્યા હતા. ત્યાર બાદ પાસપોર્ટ ઓફિસ બહાર કાર પાર્ક કરીને ડ્રાઇવર ચા પીવા ગયો હતો. તેમની મિત્ર સ્નેહલ ઓફિસની અંદર પાસપોર્ટ સબમિટ કરવા ગઈ હતી. ત્યારે દીપ્તિબહેન બહાર પાર્ક કરેલી કારમાં બેઠાં હતાં. 

આ દરમિયાન તેમની પાસે આશરે પચીસેક વર્ષની વયનો યુવાન આવ્યો હતો. જેણે દીપ્તિબહેનને કહ્યું કે તમારા પૈસા કારની પાછળ નીચે પડેલ છે તમે લઇ લો. જેથી દીપ્તિ બહેન કારમાંથી ઊતરીને પૈસા જોવા ગયા તે તકનો લાભ લઇ બીજો ગઠિયો ગાડીમાંથી દીપ્તિબહેનનું પર્સ ઉઠાંતરી કરી ફરાર થઇ ગયો. પર્સમાં રોકડા રૂ.એક લાખ ઉપરાંત ચેકબુક, એટીએમ કાર્ડ વગેરે હતાં. આ અંગે દિપ્તીબહેને એલિસબ્રિજ પોલીસ મથકમાં ફરિયાદ નોંધાવતાં આજુબાજુના સીસીટીવી ફૂટેજ મેળવી વધુ તપાસ હાથ ધરી છે.