નર્મદા / આદિવાસી સમાજ વિરૂદ્ધ ટિપ્પણી કરનારા SOUના ડેપ્યુટી કલેક્ટર વિરુદ્ધ થઇ કાર્યવાહી, આપત્તિજનક Audio થયો હતો વાયરલ

• SOUના નાયબ કલેક્ટરનો ઓડિયો વાયરલનો મામલો 
• SOU નાયબ કલેક્ટર નિલેશ દુબેને હોદ્દા પરથી સસ્પેન્ડ કરાયા
• CISFનાં અધિકારી સાથે વાત કરતો ઓડીયો થયો હતો વાયરલ 

ઉંચનીચ અને ભેદભાવનું દૂષણ આજે પણ ગુજરાતમાં જીવી રહ્યું છે. સ્ટેચ્યુ ઓફ યુનિટીના નાયબ કલેક્ટર નિલેશ દુબેનો સી.આઈ.એસ.એફના અધિકારી સાથે આદિવાસી વિરુદ્ધ ટિપ્પણી કરતો ઓડિયો વાયરલ થતા આદિવાસી સમાજમાં રોષ ફેલાયેલો છે. ત્યારે હવે સ્ટેચ્યુ ઓફ યુનિટીના ડેપ્યુટી કલેક્ટર નિલેશ દુબેને સરકાર દ્વારા સસ્પેન્ડ કરાયો છે.

ડે. કલેક્ટર નિલેશ દૂબેએ CISFના આધિકારી સાથેની વાતચીતમાં આદિવાસી સમાજ માટે અપશબ્દો ઉચ્ચાર્યા હતા. જેના પગલે અધિકારી વિરૂદ્ધ કાર્યવાહી કરવા આદિવાસી સંગઠન દ્વારા કેવડિયા બંધ આપવામાં આવ્યુ હતુ. જેમાં આદિવાસી સમાજના લોકોએ અધિકારીનું પૂતળું બાળીને સરકાર વિરુદ્ધમાં સૂત્રોચ્ચાર કર્યા હતા. વિવાદ ઉગ્ર થતા આદિવાસી સમાજે પ્રવાસીઓને પણ અટકાવયા હતા.

આમ આદિવાસીઓના ભારે વિરોધને પગલે ભાજપના આદિવાસી નેતા ગણપત વાસવાએ CMને પત્ર લખી રજૂઆત કરી હતી. સાથે સાંસદ મનસુખ વસાવાએ પણ રજૂઆત કરી હતી. જેથી હવે રાજ્ય સરકાર દ્વારા આ અધિકારી વિરૂદ્ધ શિક્ષાત્મક પગલા ભરી તેને સસ્પેન્ડ કરાયો છે.