બેઠક / દિલ્હી દરબારમાં નાયબ મુખ્યમંત્રી નીતિન પટેલે રાજ્ય સરકાર માટે કરી આ માગ

પાક વીમા મુદ્દે DyCM નીતિન પટેલે કેન્દ્ર સરકારમાં કરી રજૂઆત

પાક વીમા મુદ્દે નાયબમુખ્યમંત્રી નીતિન પટેલે કેન્દ્ર સરકારમાં રજૂઆત કરી હોવાનું સામે આવ્યું છે. પાક વીમો ફરજીયાત ના કરવા નીતિન પટેલે રજૂઆત કરી હતી. પાક વીમો મરજીયાત બનાવવા માટે કેન્દ્ર સમક્ષ માગ કરી હતી. 

નીતિન પટેલે જણાવ્યું કે, ખેડૂતોને સરળતા માટે પાક વીમો મરજીયાત બનાવવો જોઇએ. પાક વીમો લેવા માગતા હોય તેવા ખેડૂતોને જ વીમો આપવો જોઇએ. હાલ ધીરાણ સમયે પાક વીમો જ કાપી લેવામાં આવે છે. ત્યારે દિલ્હીમાં નાણામંત્રાલયની બેઠકમાં નીતિન પટેલે આ મામલે રજૂઆત કરીને પાકવીમાને મરજીયાત કરવાની માગ કરી છે.

રાજ્યમાં દારૂબંધી અંગે ડે.સીએમ નીતિન પટેલનું નિવેદન

નાયબ મુખ્યમંત્રી નીતિન પટેલે દારૂબંધી અંગે નિવેદન આપ્યું હતું. તેમણે કહ્યું કે, દારૂબંધીથી ગુજરાતને એક્સાઇઝ ડ્યુટીમાં નુકસાન થઇ રહ્યું છે. દારૂબંધી ન હોય તેવા રાજ્યોને મોટી આવક થાય છે. દારૂબંધીથી આવકમાં નુકસાનની ભરપાઇ કરવા માટે રજૂઆત કરી છે.

રોડ-રસ્તા માટે ગ્રાંટ ફાળવવાની નીતિન પટેલની માગ

'નલ સે જલ' યોજના હેઠળ વધુ ગ્રાંટ ફાળવવા અનુરોધ કરવામાં આવ્યો છે. માર્ગને પહોળા કરવા, નાના પુલો બનાવવા ગ્રાન્ટ માગી છે. ગ્રામ સડક યોજનામાં વધુ ગ્રાન્ટ ફાળવવા અનુરોધ કર્યો છે. 

વેતન વધારા અને સહાય વધારાની માંગણી

આશા વર્કર, આંગણવાડી, મધ્યાહન ભોજનના કર્મીના વેતન વધારવા માગ કરવામાં આવી છે. વૃદ્ધો, વિધવાઓ અને દિવ્યાંગોની સહાયમાં વધારો કરવા પણ માંગણી કરવામાં આવી છે.

ગ્રાન્ટેડ હાઇસ્કૂલો માટે કેન્દ્રમાં રજૂઆત

રાષ્ટ્રીય માધ્યમિક શિક્ષા અભિયાન અંતર્ગત ગ્રાન્ટેડ હાઇસ્કૂલો માટે રાજ્ય સરકારને ગ્રાન્ટ આપવાની રજૂઆત કરવામાં આવી છે. શિક્ષકો અને મહેકમનો ખર્ચ રાજ્ય સરકાર ઉઠાવે છે. જેને લઇને ગુજરાતને ગ્રાન્ટ ફાળવવા માગ કરવામાં આવી છે.