દુર્ઘટના / UPમાં મોટી દુર્ઘટના : દશેરાનો મેળો જોવા ગયેલ 2 બહેનો પર ફરી વળ્યો કાળમુખો ટ્રક, કમકમાટીભર્યા મૃત્યુ

• ઉત્તર પ્રદેશના દેવરિયામાં અકસ્માત
• મેળામાં બેફામ બન્યો ટ્રક
• 2 બાળકીના મૃત્યુ

બંને મૃતક યુવતીઓ પિતરાઈ બહેનો છે. બંને યુવતીઓ સદર કોતવાલી પોલીસ સ્ટેશન વિસ્તારના કટારી ગામની રહેવાસી હોવાનું ખુલ્યું હતું. દશેરાનો મેળો જોવા માટે યુવતીઓ શહેરમાં આવી હતી. જો કે ટ્રક ફરી વળતા અનેક લોકો ઈજાગ્રસ્ત થયાં હતા અને આ બંન્ને બાળકીનો ઘટના સ્થળે જ કમકમાટીભર્યા મોત થયાં હતા. 

દશેરાની પૂર્વ સંધ્યાએ બની ઘટના 

ઉલ્લેખનીય છે કે, આ ઘટના મંગળવારે મોડી રાત્રે બની હતી. ટ્રકની સ્પીડ એટલી ઝડપી હતી કે તેમાં અડધો ડઝન જેટલા વાહનોને નુકસાન થયું હતું. ઘટનાની જાણ થતાં જ એસપી સહિતના ઉચ્ચ અધિકારીઓ ઘટનાસ્થળે પહોંચી ગયા હતા અને ટ્રકનો કબજો મેળવી આગળની કાર્યવાહી હાથ ધરી હતી. 

ટ્રક ડ્રાઈવર કસ્ટડીમાં

સમગ્ર ઘટના અંગે પોલીસ અધિક્ષક સંકલ્પ શર્માએ જણાવ્યું કે અકસ્માતમાં 2 બાળકીઓના મોત થયા છે. તેમણે જણાવ્યું હતું કે ટ્રક જપ્ત કરવામાં આવી છે, તેમજ ટ્રક ચાલકને કસ્ટડીમાં લઈ કાયદેસરની કાર્યવાહી કરવામાં આવી રહી છે. તમને જણાવી દઈએ કે ભૂતકાળમાં મુખ્યમંત્રીએ માર્ગ અકસ્માતને લઈને કડક સૂચનાઓ આપી છે. પરંતુ સદર કોતવાલી પોલીસ સ્ટેશન વિસ્તારમાં નિયમોનો ખુલ્લેઆમ ભંગની ઘટના પ્રકાશમાં આવતા તંત્ર સામે અનેક સવાલો ઉભા થયાં હતા.