બાળક શાળાએ જતા ટેવાય, બાળક શાળાએ જતા પહેલા ઘડાય તેવી ધારણા સાથે માતા પિતા બાળકોને પ્રિ સ્કૂલમાં મુકવાનો આગ્રહ રાખે છે. બાળક માતા પિતા અને પોતાના ઘરથી એકલુ રહેતા શીખે તે માટે પ્રિ સ્કૂલમાં દાખલો કરાવે છે. પરંતુ આ પ્રિ સ્કૂલને લઇને શિક્ષણ વિભાગની બેવડી નીતિ સામે આવી છે. આમ તો શહેરમાં ગલીએ ગલીએ પ્રિ સ્કૂલ જોવા મળે છે પરંતુ અહીં ભણતા બાળકોની જવાબદારીની જ્યારે વાત આવી ત્યારે ડીઇઓએ હાથ અધ્ધર કરી દીધા.
પ્રિસ્કૂલને લઇને શિક્ષણ વિભાગની બેવડી નીતિ
એક તરફ ડીઇઓ દ્વારા કહેવામાં આવે છે કે પ્રિ સ્કૂલ અમારા દાયરામાં નથી આવતી. તો બીજી તરફ FRC જુનિયર કેજીની ફી નક્કી કરે છે. ત્યારે આ તમામ વચ્ચે શહેરમાં ઠેર ઠેર જોવા મળતા પ્રિ સ્કૂલ ક્લાસની જવાબદારી કોની તે એક યક્ષ સવાલ થઇ પડ્યો છે. શિક્ષણ વિભાગની આવી બેવડી નીતિ ત્યારે સામે આવી જ્યારે એક વાલીએ ડીઇઓને પ્રિ સ્કૂલની ફરિયાદ કરી અને ડીઇઓએ હાથ અધ્ધર કરી દીધા.
LAMPROS પ્રિ-સ્કૂલ વાલીઓ પર ફી બાબતે લાવતી હતી દબાણ
અમદાવાદની LAMPROS પ્રિ-સ્કૂલ વાલીઓ પર ફી ભરવા બાબતે દબાણ કરતી હતી. આ મામલે જ્યારે વાલીઓ દ્વારા ડીઇઓને રજૂઆત કરવામાં આવી તો ડીઇઓએ ઘસીને કહી દીધુ કે DEOના દાયરામાં પ્રિ-સ્કૂલ ન આવે. જેને લઇને વાલીઓ મૂંઝવણમાં મુકાયા છે. ડીઇઓએ વધુમાં જણાવ્યું હતું કે પ્રિ-પ્રાયમરી એજ્યુકેશન ફોર્મ્યૂલા એજ્યુકેશન સિસ્ટમ ન હોવાથી અમારા કન્ટ્રોલમાં નથી અને અમે પ્રિ-પ્રાયમરી સ્કૂલ ચલાવવાની પરમિશન પણ નથી આપતા. ત્યારે અહીં સવાલ એ થાય છે કે રાજ્યમાં હજારોની સંખ્યામાં બાળકો પ્રિ સ્કૂલમાં અભ્યાસ કરે છે ત્યારે જો પ્રિ સ્કૂલનું એજ્યુકેશન માન્ય જ ન હોય તો પ્રિ સ્કૂલ શરુ કરવાની મંજૂરી કેમ આપવામાં આવે છે.
પ્રિ સ્કૂલની જવાબદારી કોની ?
ત્યારે અહીં સવાલ એ થાય કે પ્રિ સ્કૂલ કોના અંડરમાં આવે ? જો શિક્ષણ વિભાગના દાયરામાં નથી તો FRC ફી કેમ મંજુર કરે છે ? પ્રિ પ્રાયમરી સ્કૂલ શિક્ષણ વિભાગમાં આવે કે નહીં ? જો પ્રિ પ્રાયમરી સ્કૂલો માન્ય નથી તો તમામ સ્કૂલ ધોરણ 1ના પ્રવેશ વખતે ફરજિયાત પ્રિ-પ્રાયમરી એજ્યુકેશન કેમ માંગે છે ?
સરકારે સ્પષ્ટતા કરવી જોઈએ કે બિલાડીની ટોપ જેમ ચાલતી આ હાટડીયો માન્ય કે અમાન્ય.