સાવધાન / ગ્લોબલ વોર્મિંગથી દુનિયાભરમાં વધી રહ્યો છે ડેન્ગ્યુનો ખતરો

એક અભ્યાસ અનુસાર, ગ્લોબલ વોર્મિંગના કારણે દુનિયામાં ડેન્ગ્યુનો ખતરો વધી રહ્યો છે. ડેન્ગ્યુનો આતંક ભારત અને બ્રાઝિલ જેવા અપેક્ષાથી વધારે ગરમ વાતાવરણવાળા દેશોમાં વધુ જોવા મળે છે. માદા એડીસ ઈજિપ્તી મચ્છરના કારણે ફેલાતી આ બીમારીના લક્ષણોમાં તાવ આવવો, સાંધામાં દુ:ખાવો અને ઈન્ટરનલ બ્લિડિંગનો સમાવેશ થાય છે. દુનિયાભરમાં દર વર્ષે ડેન્ગ્યુના લગભગ 10 લાખ નવા કેસ સામે આવે છે. 

2015ની સરખામણીએ 2080 સુધીમાં બે અબજ વધુ લોકો ડેન્ગ્યુની ઝપટમાં આવી શકે

ઉલ્લેખનીય છે તે, અભ્યાસમાં જણાવવામાં આવ્યું છે કે, 2015ની સરખામણીએ 2080 સુધીમાં બે અબજ વધુ લોકો ડેન્ગ્યુની ઝપટમાં આવી જાય તેવી દહેશત છે. સાયન્સ પેપર ‘નેચર
માઈક્રોબાયોલોજીમાં પ્રકાશિત કરવામાં આવેલા અભ્યાસ અનુસાર, વાતાવરણમાં સતત વધતી ગરમી એડીસ ઈજિપ્તી પ્રજાતિના મચ્છરોને એ વિસ્તારમાં પણ પ્રસરવામાં મદદ કરશે, જ્યાં હાલ તેમનો પ્રસાર ઘણો ઓછો છે. 

દક્ષિણ-પૂર્વી રાષ્ટ્રોમાં મચ્છરો વધુ

દક્ષિણ-પૂર્વી અમેરિકા, ચીન અને જાપાનના કિનારાના વિસ્તારો અને ઓસ્ટ્રેલિયાના મોટા વિસ્તારોમાં ગ્લોબલ વોર્મિંગ આ મચ્છરોના પ્રસારનું મુખ્ય કારણ બની રહી છે. ગરમી આ મચ્છરોના શારીરિક વિકાસમાં પણ મદદ કરે છે. ગરમ હવામાનમાં મચ્છર વધુ જલ્દી કરડવા સક્ષમ બની જાય છે. 

તેનાથી ડેન્ગ્યુનો ફેલાવો પણ વધે છે. દક્ષિણ-પૂર્વી અમેરિકામાં છેલ્લી સદીના પાંચમા દાયકા સુધી મેલેરિયા સૌથી મોટો ખતરો હતો, ત્યાં મચ્છરોના ખાત્મા માટે ડીડીટી જેવા રસાયણોનો બેફામ ઉપયોગ કરવામાં આવ્યો હતો, જેનાથી પર્યાવરણને મોટું નુકસાન થયું હતું.