ચેતી જજો! / શહેરોમાં રોગચાળો વકર્યો: શરદી-તાવ-ડેન્ગ્યુ અને સ્વાઇન ફ્લૂના દર્દીઓથી હોસ્પિટલો ઉભરાઈ, તંત્ર થયું દોડતું

• વડોદરા-રાજકોટમાં રોગચાળાએ માથું ઊંચક્યું
• વડોદરામાં તાવના વધુ 472 કેસ નોંધાયા
• રાજકોટમાં શરદી-ઉધરસના 176 કેસ નોંધાયા

વડોદરા અને રાજકોટમાં પાણીજન્ય અને મચ્છરજન્ય રોગચાળાએ માથું ઉચકતા આરોગ્ય તંત્ર પણ ચિંતામાં મૂકાયું છે. મહત્વનું છે કે, ચોમાસાની સિઝન, ભરાયેલા પાણી, ઉભરાતી ગટરો, કાદવ-કિચડનું સામ્રાજ્ય, મચ્છર-માખીનો ઉપદ્રવ, પીવાનું પાણી દૂષિત આવવું, ચારે તરફ ગંદકી થવી તેમજ યોગ્ય સફાઇનો અભાવ અને ભેજયુક્ત વાતાવરણ સહિતના પરિબળો આ રોગચાળા માટે જવાબદાર હોય છે. ત્યારે વાત કરીએ વડોદરા અને રાજકોટની વડોદરા શહેરમાં ચોમાસાની સિઝનમાં રોગચાળો બરાબરનો વકર્યો છે.

વડોદરામાં માત્ર એક વર્ષમાં જ તાવના 57457 કેસ

વડોદરામાં તાવના વધુ 472 કેસ નોંધાયા છે. માત્ર એક વર્ષમાં જ તાવના 57457 કેસ નોંધાયા છે. ગંદકી અને પાણી ભરાઈ રહેતા મચ્છરોનો ઉપદ્રવ પણ વધ્યો છે. જેના લીધે મચ્છરજન્ય રોગચાળાએ લોકોને પોતાના ભરડામાં લીધા છે. જો કે, રોગચાળો વધતા પાલિકા દ્વારા 26,431 ઘરોમાં સર્વે પણ કરાયો છે. જેમાં 11259 ઘરોમાંથી મચ્છરોના પોરા મળી આવ્યા છે.
ચાલુ વર્ષે ડેન્ગ્યુના 222 કેસ, ચિકનગુનિયાના 229 કેસ, સ્વાઇન ફ્લૂના 177 કેસ, મલેરીયાના 30 કેસ, કમળાના 81 કેસ, ટાઇફોઇડના 56 કેસ અને કોલેરાના 38 કેસ નોંધાયા છે.

રાજકોટમાં પણ હોસ્પિટલો દર્દીઓથી ઉભરાઈ

બીજી બાજુ રાજકોટ શહેરમાં પણ રોગચાળો વકર્યો છે. તહેવારો પૂરા થતાની સાથે જ રાજકોટમાં પણ હોસ્પિટલો દર્દીઓથી ઉભરાઈ છે. શહેરમાં શરદી, તાવ અને ઉધરસના કેસમાં સતત વધારો થઇ રહ્યો છે. શાળામાં પણ મચ્છરજન્ય રોગમાં વધારો થયો છે. રાજકોટની જો વાત કરીએ તો રાજકોટમાં શરદી-ઉધરસના 176 કેસ, સામાન્ય તાવના 56 કેસ, ઝાડા-ઉલ્ટીના 48 કેસ, ડેન્ગ્યુના 08 કેસ અને મલેરીયાનો 1 કેસ નોંધાયો છે.

અમદાવાદ શહેરમાં સ્વાઇન ફલૂનો હાહાકાર

બીજી બાજુ અમદાવાદમાં પણ સ્વાઇન ફલૂએ હાહાકાર મચાવ્યો છે. ઓગસ્ટ મહિનામાં સ્વાઇન ફ્લૂના 509 કેસ નોધાયા. સ્વાઇન ફ્લૂના 70 ટકા દર્દીઓ હોસ્પિટલમાં એડમિટ છે. દાખલ દર્દીઓની ઉંમર 40 વર્ષથી વધુ હોવાનું સામે આવ્યું છે. 35 બાળકો 5 વર્ષથી નીચેના, 91 બાળકો 6થી 15 વર્ષના, 145 દર્દીઓ 15થી 40 વર્ષના સ્વાઇન ફ્લૂના શિકાર થયા છે. જ્યારે સાદા મલેરિયાના 129 કેસ, ડેન્ગ્યુના 132 કેસ નોંધાયા છે. આથી, કોમર્શિયલ અને રેસિડેન્ટ એકમો પર તપાસ તેજ કરાઇ.