શહેરમાં મચ્છરજન્ય રોગચાળાએ હાહાકાર મચાવ્યો છે. સ્વચ્છ અમદાવાદના બણગા ફૂંકનાર તંત્રની બેદરકારીથી આ ચોમાસામાં મચ્છરજન્ય રોગચાળા પર નિયંત્રણ મૂકવાની કામગીરી વિલંબમાં મુકાઇ છે. જેના કારણે સમગ્ર અમદાવાદમાં મચ્છરોનો ઉપદ્રવ ફેલાયો છે.
ડેંગીના પ૪૬ દર્દી મ્યુનિસિપલ હોસ્પિટલમાં દાખલ કરાયા
પાલડીની ખાનગી હોસ્પિટલમાં સૌથી વધુ ૬૬ કેસ
પશ્ચિમ ઝોનમાં સૌથી વધુ ૧૮૮ કેસ નોંધાયા
મ્યુનિસિપલ હોસ્પિટલો ઉપરાંત ખાનગી હોસ્પિટલો પણ ડેંગી સહિતના દર્દીઓથી ઊભરાઇ રહી છે. તેમાં પણ તંત્રના સત્તાવાર આંકડા મુજબ પાલડી, નારણપુરા અને બોડકદેવની ખાનગી હોસ્પિટલમાં ડેંગીના સૌથી વધુ કેસ નોંધાયા છે.
ડેંગીના પ૪૬ દર્દી મ્યુનિસિપલ હોસ્પિટલમાં દાખલ કરાયા
શહેરને ર૦રર સુધીમાં મેલેરિયા મુકત બનાવવાના સપનાં બતાવનાર મ્યુનિસિપલ સત્તાધીશો હજુ સુધી ડેંગી અને મેલેરિયાના વધતા જતા કેસ સામે અંકુશ મૂકી શકયા નથી. મ્યુનિસિપલ હોસ્પિટલોમાં જુલાઇ, ઓગસ્ટ અને સપ્ટેમ્બર તેમજ ચાલુ ઓકટોબર મહિનાની ૧૯ તારીખ સુધીમાં ડેંગીના ૧પ૦૦થી વધુ સત્તાવાર કેસ નોંધાઇ ચૂકયા છે. આ મહિનામાં જ ડેંગીના પ૪૬ દર્દી મ્યુનિસિપલ હોસ્પિટલમાં દાખલ કરાયા છે.
પાલડીની ખાનગી હોસ્પિટલમાં સૌથી વધુ ૬૬ કેસ
ખાનગી હોસ્પિટલો પણ ડેંગીના દર્દીઓથી ઊભરાઇ રહી છે. ખુદ તંત્રના છેલ્લા ત્રણ મહિનાના સત્તાવાર આંકડા મુજબ પાલડીની ખાનગી હોસ્પિટલમાં સૌથી વધુ ૬૬ કેસ, નારણપુરાની ખાનગી હોસ્પિટલમાં પ૦ કેસ અને બોડકદેવની ખાનગી હોસ્પિટલમાં ૪૯ કેસ નોંધાયા હતા. મ્યુનિસિપલ સત્તાવાળાઓએ ખાનગી હોસ્પિટલના કેસની વિગત ઓનલાઇન મેળવવાની ર૦૧૬થી શરૂઆત કરી હતી.
છેલ્લા ત્રણ મહિનામાં ડેંગીના દર્દીઓની સંખ્યા ર૦૦૦થી વધુ
શહેરની ૧૦૦ જેટલી જાણીતી ખાનગી હોસ્પિટલોના ડેટા તંત્રને મળી રહ્યા છે, પરંતુ જે પ્રકારે ગલીએ ગલીએ ખાનગી હોસ્પિટલોના રાફડા ફાટી નીકળ્યા છે. તેમજ ઘણી જગ્યાએ બે કે ત્રણ પથારી ધરાવતી કહેવાતી ખાનગી હોસ્પિટલમાં પણ દર્દીને ડેંગીની સારવાર અપાઇ રહી છે તેને જોતાં ખાનગી હોસ્પિટલમાં સારવાર લઇ ચૂકેલા કે લઇ રહેલા છેલ્લા ત્રણ મહિનાના ડેંગીના દર્દીઓની સંખ્યા ર૦૦૦થી વધુ હોવાની શકયતા છે.
પશ્ચિમ ઝોનમાં સૌથી વધુ ૧૮૮ કેસ નોંધાયા
ખાનગી હોસ્પિટલોમાં નોંધાયેલા ડેંગીના સત્તાવાર કેસની ઝોનવાઇઝ વિગત તપાસતાં પશ્ચિમ ઝોનમાં સૌથી વધુ ૧૮૮ કેસ નોંધાયા હતા. ઉત્તર-પશ્ચિમ ઝોનમાં ૧પ૧ કેસ કે જેમાં ગોતાના ૪ર અને થલતેજના ૩૭ કેસનો સમાવેશ થાય છે. દક્ષીણ-પશ્ચિમ ઝોનમાં ૭પ, પૂર્વ ઝોનમાં ૪૮, ઉત્તર ઝોનમાં ૩૬ અને મધ્ય ઝોનમાં સૌથી ઓછા ર૧ કેસ નોંધાયા હતા.