અમદાવાદ / વૈકલ્પિક જગ્યા નહીં મળે ત્યાં સુધી સિંધુભવન રોડ પરનું 120 વર્ષ જૂનું મેલડી માતા મંદિર મૂળ સ્થાને જ જળવાઈ રહેશે, પરંતુ...

• વૈકલ્પિક જગ્યા નહીં મળે ત્યાં સુધી મંદિર મૂળ સ્થાને જ જળવાઈ રહેશે
• મ્યુનિસિપલ કોર્પોરેશનના સત્તાધીશોએ વૈકલ્પિક જગ્યા આપવા સંમતિ દર્શાવી
• જોકે અન્ય ધાર્મિક સ્થળોનાં દબાણના મામલે તંત્રનું મૌન

સમગ્ર અમદાવાદમાં રોડ કે ફૂટપાથ પર વિવિધ ધર્મનાં અલગ અલગ પ્રકારનાં સ્થાનકની નવાઈ નથી. કેટલીક વાર તો આવાં ધર્મસ્થાનક રાતોરાત ઊભાં થઇ જાય છે, તેમાં ઘણી વખત શ્રદ્ધાળુઓની લાગણી સાથે ચેડાં કરીને ધર્મ કે મજહબની દુકાન ધમધમતી કરવાનો પણ લેભાગુ તત્ત્વોનો આશય હોય છે. આવા મલિન ઇરાદા ધરાવતાં તત્ત્વોને તંત્ર સારી પેઠે ઓળખતું હોવા છતાં તેના તરફ આંખ આડા કાન કરાતા હોઇ ત્યાં રોડ કે ફૂટપાથને કશું નડતરરૂપ લાગતું નથી, પરંતુ બોડકદેવમાં નડે છે તેમ સ્થાનિકોનું રોષભેર કહેવું છે. એ જે હોય તે, પરંતુ લોકોના ઉગ્ર આક્રોશથી ડઘાયેલા સત્તાવાળાઓને ગઇ કાલે જ ઝૂકવાની ફરજ પડી હતી.

હવે એસ્ટેટ વિભાગ દ્વારા મંદિરના આગળના ભાગે આવેલા ફાઇનલ પ્લોટમાં વૈકલ્પિક જગ્યા ફાળવવાની સંમતિ દર્શાવાઈ છે. ઉત્તર પશ્ચિમ ઝોનના એસ્ટેટ અધિકારી પરેશ પટેલને આ અંગે પૂછતાં તેઓ કહે છે રોડની બહારના ભાગમાં મંદિર માટે વૈકલ્પિક જગ્યા અપાશે. હાલ મંદિરને તેના મૂળ સ્વરૂપે જાળવી રખાયું છે.

રોડને નડતરરૂપ હોઇ માતાજીના મંદિરને સાત દિવસમાં હટાવી લેવું તેવી નોટિસ આપીને બહુમતી સમાજનો રોષ વહોરી લેનાર મ્યુનિસિપલ કોર્પોરેશને આ નોટિસ ક્યારે આપી તે તારીખની ખબર નથી,  જોકે તંત્રનું કહેવું છે કે સમગ્ર ઝોનમાં આ મંદિરને જ આવી નોટિસ ફટકારાઇ હતી. રોડ-ફૂટપાથને નડતરરૂપ તમામ ધાર્મિક સ્થળના સર્વે કરવા અંગેના એક અન્ય પ્રશ્નના ઉત્તરમાં તંત્ર ભેદી મૌન પાળે છે.