મ્યુનિસિપલ કોર્પોરેશનના સત્તાવાળા દ્વારા સતત ત્રીજા દિવસે હોસ્પિટલ, હોટલ-સ્કૂલ ટેરેસ પરનાં ગેરકાયદે બાંધકામને તોડી નાખવાની કાર્યવાહી હાથ ધરાતાં દબાણકર્તાઓમાં ભારે ફફડાટ ફેલાયો છે.
આજે સવારથી પશ્ચિમ ઝોનના એસ્ટેટ વિભાગની ટીમ દ્વારા નારણપુરા વોર્ડની સરદાર પટેલ કોલોની પાસે આવેલ એવરોન હોસ્પિટલ, ઓફ સીજીરોડ પરની પુષ્ય હોસ્પિટલ, નવરંગપુરા વોર્ડમાં આવેલી આરોગ્યમ્ હોસ્પિટલના ટેરેસ પરના ગેરકાયદે શેડને દૂર કરાઇ રહ્યા હોવાનું પશ્ચિમ ઝોનના એસ્ટેટ ઓફિસર રાજેન્દ્ર જાધવ કહે છે.
જ્યારે મધ્ય ઝોનમાં શાહીબાગ પોલીસ સ્ટેડિયમ પાસેના સ્પેક્ટ્રલ ટાવરના બીજા માળે આવેલી શુભ લાઇબ્રેેરીના ગેરકાયદે બાંધકામ તેમજ રાજસ્થાન હોસ્પિટલ નજીકની કામધેનુ હોટલના ટેરેસ પરના ગેરકાયદે શેડ અને કાલુપુરના જય વિજય હોટલના ટેરેસના ગેરકાયદે શેડને હટાવાઇ રહ્યો હોવાનું મધ્ય ઝોનના એસ્ટેટ ઓફિસર રમેશ દેસાઇ જણાવે છે.
પૂર્વ ઝોનના રામોલ વોર્ડમાં નવરંગ સ્કૂલના અને ભાઇપુરા વોર્ડની ઉદ્ગમ સ્કૂલના ટેરેસ પરના ગેરકાદે શેડ તેમજ વસ્ત્રાલ વોર્ડમાં શેઠ આર.ટી. સ્કૂલના ટેરેસ પરના ગેરકાયદે શેડ પર હથોડા ઝીંકાઇ રહ્યા હોવાનું આ ઝોનના ડેપ્યુટી એસ્ટેટ ઓફિસર કાંતુભાઇ પટેલ જણાવે છે.
આ ઉપરાંત ઉત્તર-પશ્ચિમ ઝોનના બોડકદેવ વોર્ડના મેરી મેન્ટ પાર્ટી પ્લોટ સામેના એલેન ટ્યૂશન કલાસીસ સામે પણ કાર્યવાહી થઇ રહી હોવાનું આ ઝોનના એસ્ટેટ ઓફિસર પરેશ પટેલ કહે છે. દરમ્યાન પૂર્વ ઝોનના રામોલ-હાથીજણ વોર્ડના જનતાનગર પાસેની નવરચના સ્કૂલના ટેરેસ પરના ગેરકાયદે શેડ અને નિકોલના ડી-માર્ટના બેઝમેન્ટના ગેરકાયદે બાંધકામ પર પણ હથોડા ઝીંકાઇ રહ્યા હોવાનું જાણવા મળ્યું છે.