ફળોનો રાજા / ગીરની કેસર કેરીની જગ્યાએ કચ્છની કેરીનો સ્વાદ ચાખવા લોકો તલપાપડ, જાણો શું છે કારણ

• કચ્છની કેસર દાઢે વળગી  
• કચ્છની કેસર કેરીની વધી માગ 
• ગીર પંથકમાં પાક ફેઈલ જતા વધી માગ 

સામાન્ય રીતે માર્કેટમાં સૌથી વધુ તાલાલા ગીરની કેસર કેરીનું પ્રભૂત્વ છે. પરંતુ આ વર્ષે તૌકતે વાવાઝોડામાં ગીર સોમનાથ, જૂનાગઢ અને વલસાડની કેરીનો પાક ફેઈલ ગયો છે. તેવામાં કચ્છની કેસર કેરીની મીઠાસ હવે બજારમાં પહોંચી છે. કચ્છની કેસરની માગ વધી છે. 

કચ્છ હંમેશા પાણી માટે વલખા મારતો સરહદી જિલ્લો છે. પરંતુ હવે આ કચ્છ પોતાના બાગાયતી કેસર કેરીના પાકને લઈને વિશ્વ પ્રસિદ્ધિ બન્યું છે. વરસાદનું પ્રમાણ ઓછું હોવા છતાં અહીં અનેક પાક લેવામાં આવી રહ્યા છે. તેમાં પણ કચ્છની કેસર, ખારેક તેમજ દાડમની બજારમાં ખૂબ માગ વધી છે. દર વર્ષે જૂન મહિનામાં કેસર કેરીનો પાક બજારમાં આવે છે. પરંતુ ચાલુ વર્ષે વરસાદ તેમજ તૌકતે વાવાઝોડાના કારણે 30થી 40 ટકા પાક ફેઈલ ગયો છે. તેમાં પણ સૌરાષ્ટ્રમાં તો કેસર કેરીનો પાક તૌકતેના તાંડવમાં સંપૂર્ણ પણે ફેઈલ ગયો છે. તેવામાં કચ્છની કેરસ કેરીની માગ બજારમાં વધી છે.

કચ્છમાં મુખ્યત્વે અંજાર, ભુજ, નખત્રાણા સહિતના વિસ્તારોમાં કેસર કેરીનું મોટા પાયે ઉત્પાદન થઈ રહ્યું છે. આ વર્ષે કેરીનો પાક પણ ખૂબ સારો આવ્યો છે. તેવામાં વેપારીઓ ખુદ ખેડૂતના બગીચા સુધી પહોંચીને કેસર કેરીની ખરીદી કરી રહ્યા છે. એટલું જ નહીં આ વર્ષે ફળ પ્રમાણે, હોલસેલમાં વેપારીઓ બગીચા પરથી જ 45થી 50 રૂપિયાના ભાવે હોલસેલમાં કેરીની ખરીદી કરી રહ્યા છે. તેમાં પણ સૌરાષ્ટ્રમાં પાક ફેઈલ જતા કચ્છની કેરીના ભાવમાં પણ ઉછાળો આવ્યો છે.

મહત્વનું છે કે, ન માત્ર ગુજરાતમાં જ પરંતુ હવે કચ્છની કેસરની માગ વિદેશમાં પણ વ્યાપક પ્રમાણમાં જોવા મળે છે. કચ્છમાંથી ખેડૂતો અમેરિકા, લંડન, ઓસ્ટ્રેલિયા, ઓમાન, આફ્રિકા સહિતના દેશોમાં એક્સપોર્ટ પણ કરે છે. એટલે કે, હવે કચ્છની કેસર કેરીની મીઠાસ વિદેશીઓને પણ દાઢે વળગી છે.