પ્રાથમિક શાળા, માધ્યમિક-ઉચ્ચતર માધ્યમિક શાળા, વિજ્ઞાન પ્રવાહની ઉ.માધ્યમિક શાળામાં 33 ટકાનો ફી વધારો કરવા શાળા સંચાલકોની માંગ
ખાનગી શાળાઓના ફી સ્લેબમાં વધારો કરવાની માગ
શાળા સંચાલક મંડળે ફી સ્લેબમાં વધારો માંગ્યો
સંચાલક મંડળના પ્રમુખ ભાસ્કર પટેલે CMને લખ્યો પત્ર
કોરોનાકાળ બાદ હાલ સ્કૂલો ફરી ધમધમી રહી છે. કેટલાય સમયથી ફી વધારવાની માંગ કરતાં સંચાલકોને હવે ફાવતું જડ્યું છે. સામે વાલીઓને લાગે છે કે હવે કપરા દિવસો આવશે કારણ કે ખાનગી શાળાઓના ફી સ્લેબમાં વધારો કરવાની માગ તીવ્ર બની છે.
ફીમાં 33 ટકા વધારો માંગ્યો
શાળા સંચાલક મંડળે ફી સ્લેબમાં વધારો માંગ્યો છે જેને લઈને સંચાલક મંડળના પ્રમુખ ભાસ્કર પટેલે CMને લખ્યો પત્ર લખી ખાનગી શાળાના ફી સ્લેબમાં 33 ટકા વધારો માંગ્યો છે. પ્રાથમિક શાળામાં ફી રૂ.15 હજારથી વધારીને રૂ.20 હજાર કરવા માગ કરવામા આવી છે જ્યારે માધ્યમિક-ઉચ્ચતર માધ્યમિકમાં રૂ.25 હજારને સ્થાને રૂ.30 હજારની માગ સીએમ સમક્ષ કરવામાં આવી છે. તો વિજ્ઞાન પ્રવાહની ઉ.માધ્યમિક શાળામાં રૂપિયા 30 હજારને બદલે રૂપિયા 36 હજારની માગ મૂકવામાં આવી છે.
બેઠકમાં લેવાયો નિર્ણય
મહત્વનું છે કે શાળા સંચાલક મહામંડળની કોર કમિટીમાં ચર્ચા થઈ હતી. બેઠકમાં મહામંડળ સાથે જોડાયેલી શાળાના પ્રશ્નોની ચર્ચા થઈ હતી. જે બાદ ફી વધારો તેમજ સ્વનિર્ભર શાળાઓના કર્મીઓનો શૈક્ષણિક અનુભવ ગણતરીમાં લેવાની માંગ સંચાલક મંડળ દ્વારા કરવામાં આવી છે.
FRC શું નિર્ણય લેશે?
રાજ્ય સરકાર દ્વારા ખાનગી શાળાઓ પર ફી નિયંત્રણ કરી શકાય તે ઉદ્દેશ સાથે ફી રેગ્યુલેશન એક્ટ લાવવામાં આવ્યો હતો.અને તેના માટે ફી રેગ્યુલેશન કમિટીની રચના પણ કરવામા આવી હતી.પરંતુ 2017થી અમલમાં આવેલી FRC સતત ગોકળગતીએ ચાલી રહી છે. અનેક વખત ફી વધારો અને મનફાવે તેમ કોરોનાકાળમાં ઓનલાઈન એજ્યુકેશનના નામે સંચાલકોની મનમાની પણ સામે આવી હતી. તેવામાં કોરોના અને મોંઘવારીનો માર ઝેલી રહેલો વાલીને આવનાર સમયમાં ફી વધારાનો ડામ અપાય તો નવાઈ નહીં.