રાજકોટના ગોંડલમાં યુવકને કારના બોનેટ પર લટકાવી અકસ્માત નીપજાવનાર શખ્સ વિરુદ્ધ પોલીસ ફરિયાદ કરવા છતાં કોઈ કાર્યવાહી ન કરવામાં આવતા પીડિત યુવકે જિલ્લા પોલીસ વડાને લેખિતમાં રજૂઆત કરી છે.
ગોંડલમાં કારના બોનેટ પર યુવક લટકવાનો મામલો
પીડિત યુવકે જિલ્લા પોલીસ વડાને કરી રજૂઆત
ફરિયાદ કરવા છતા પોલીસે કાર્યવાહી ન કરી હોવાની રજૂઆત
મૂળ બંધિયા ગામના અને હાલ ગોંડલની નંદનવન સોસાયટીમાં રહેતા દશરથસિંહ વાઘેલાને કારના બોનેટ પર લટકાવી કાર પૂર ઝડપે ભગાવી અકસ્માત સર્જનાર કારચાલક સામે પોલીસ ફરિયાદ કર્યાને 8 દિવસ થયા છતાં પોલીસ દ્વારા કારચાલક સામે કોઈ કાર્યવાહી કરવામાં ન આવતા પીડિત યુવક દથરથસિંહ વાઘેલાએ જિલ્લા પોલીસ વડાને લેખિતમાં રજૂઆત કરી છે.
કાર ધીમે ચલાવવાનું કહેતા ઉશ્કેરાઈ ગયો ચાલક
પીડિત યુવકે રજૂઆતમાં જણાવ્યું છે કે, ગત 29 સપ્ટેમ્બરના રોજ તે જેતપુર જવા માટે જામવાડી ચોકડી પાસે વાહનની રાહ જોઈને ઉભો હતો. આ દરમિયાન લલીત ઠુંમર નામનો શખ્સ સ્વિફ્ટ કાર લઈને આવતા કારનો અરીસો અથડાયો હતો. જે બાદ કારચાલકને કાર ધીમે ચલાવવાનું કહેતા તે ઉશ્કેરાઈ ગયો હતો અને માર માર્યો હતો. આ ઉપરાંત કારચાલકે ઉશ્કેરાઇને કાર ભગાવી હતી. કાર સામે આવતા યુવક કૂદીને બોનેટ પર પડ્યો હતો. કાર ચાલકે કાર પૂર ઝડપે ભગાવતા કાર પલટી હતી. જેમાં યુવકને ઇજાઓ થતા હોસ્પિટલમાં ખસેડાયો હતો. આ સમગ્ર ઘટનાના સીસીટીવી ફૂટેજ પણ સામે આવ્યા હતા.
જિલ્લા પોલીસ વડાને લેખિતમાં રજૂઆત
જે બાદ યુવક દશરથસિંહ વાઘેલા દ્વારા કારચાલક લલીત ઠુંમર વિરુદ્ધ ગોંડલ સિટી પોલીસ મથકમાં ફરિયાદ નોંધાવામાં આવી હતી. પરંતુ કારચાલક વિરુદ્ધ આજદિન સુધી કોઈપણ જાતની કાર્યવાહી કરવામાં આવી નથી. પીડિત યુવકના જણાવ્યા અનુસાર, કારચાલક રાજકીય વગ ધરાવતો હોવાથી તેની વિરુદ્ધ કોઈ કાર્યવાહી કરવામાં આવી નથી. આવા આરોપીઓને છાવરવામાં આવશે તો આવા આરોપીઓને વધુ ગુના કરવા માટે પ્રોત્સાહન મળશે.