પશ્ચિમ બંગાળ પોલીસે સંખ્યાબંધ મહિલાઓના બળાત્કાર કેસમાં એક ડિલિવરી બોય અને તેના એક સાગરીતની ધરપકડ કરી છે.
પશ્ચિમ બંગાળની શરમજનક ઘટના
ડીલીવરીબોય સહિત બેની ધરપકડ
66 જેટલી મહિલાઓને બ્લેકમેઇલ કરી બળાત્કાર કર્યો
પશ્ચિમ બંગાળના હુગ્લી જિલ્લાની ઘટના
પશ્ચિમ બંગાળ પોલીસે હુગલી જિલ્લાનાં બંદેલમાંથી એક ડિલિવરી બોય અને તેના સાગરીતની ધરપકડ કરી હતી. જેમનાં પર 66 જેટલી મહિલાઓને બ્લેકમેઇલ કરી તેમની સાથે બળાત્કાર ગુજારવાનો આરોપ લગાવવામાં આવ્યો છે. એક અહેવાલ મુજબ બંને આરોપીઓની ઓળખ વિશાલ વર્મા અને સુમન નામે કરવામાં આવી છે. જેમાં વિશાલ એક ઇ-કોમર્સ વેબસાઇટ માટે ડિલિવરી બોયનું કામ કરતો હતો.
મહિલાઓનો નંબર માગી કરતો હતો બ્લેકમેઈલ
વિશાલ ડિલિવરી આપ્યા બાદ ફિડબેક આપવાના હેતુથી મહિલાઓનો નંબર માગતો હતો. ત્યારબાદ તે પર્સનલ નંબરથી મહિલાઓ સાથે વિડીયોકોલ કરતો અને એ દરમિયાન વિડિયોકોલના સ્ક્રીનશૉટ લઈ તેમને બ્લેકમેઇલ કરતો હતો. ધરપકડ બાદ સમગ્ર ગુનાની કબૂલાત વિશાલે પોલીસ સામે કરી હતી.
66 મહિલાઓને છેતરીને ગુજાર્યો બળાત્કાર
ગુનેગારે કબૂલાત કરી હતી કે તે અત્યાર સુધીમાં 66 જેટલી મહિલાઓ સાથે એ આ પ્રકારની છેતરપિંડી કરી ચૂક્યો છે. તે મહિલાઓનો નંબર લઈ તેમને વિડીયોકોલ કર્યા બાદ સ્ક્રીનશૉટ લઈ લેતો હતો. ત્યાર બાદ બ્લેકમેઈલ કરી મહિલાઓને પોતાના ઘરે બોલાવતો હતો અને તેમની સાથે બળાત્કાર ગુજારતો હતો.
કેવી રીતે ભાંડો ફૂટ્યો?
આ સમગ્ર ઘટના ત્યારે બહાર આવી હતી જ્યારે ચીનસુરા જિલ્લાની એક મહિલાએ પોલીસ ફરિયાદ નોંધાવી હતી. મહિલાએ જણાવ્યું હતું કે 2 મહિના પહેલા વિશાલ એના ઘરે થોડો સમાન પહોંચાડવા માટે આવેલો. ત્યાર બાદ તેણે ફિડબેક લેવાના બહાને મહિલાનો નંબર લઈ તેની સાથે ફ્રેન્ડશિપ કરવાનું નાટક કર્યું હતું. એક દિવસ એણે મહિલાને ઘરે બોલાવીને તેની સાથે બળાત્કાર ગુજાર્યો હતો. ફરિયાદને લઈને પોલીસ જ્યારે વિશાલના ઘરે પહોંચી તો તે અન્ય એક પીડિતા સાથે રંગે હાથ ઝડપાયો હતો. ધરપકડ સમયે તેની પાસેથી માઇક્રો ચિપ્સ મળી આવી હતી જેમાં તેને મહિલાઓના વિડીયો અને ફોટોઝ રાખેલ હતા. એક વિડિયોમાં તો તે એક પીડિતા સાથે બંદૂક લઈને જોવા મળ્યો હતો.
ઘરેણાં તેમજ પૈસા પણ પડાવતો હતો
પોલીસ તપાસમાં એ પણ જાણવા મળ્યું હતું કે તે મહિલાઓ પાસેથી ઘરેણાં અને પૈસા પણ પડાવતો હતો. આ સમગ્ર મોડ્સ ઓપરેન્ડીમાં ઘણી વખત તેનો એક મિત્ર સુમન પણ સાથ આપતો હતો. જે વ્યવસાયે ચિત્રકાર છે અને તેના તાજેતરમાં જ લગ્ન થયા હતા. બંને આરોપીઓને લોકલ કોર્ટમાં રજૂ કરવામાં આવ્યા હતા અને પાંચ દિવસ માટે પોલીસ કસ્ટડીમાં મોકલવામાં આવ્યા હતા.