અફરાતફરી / દિલ્હીથી વારાણસી જનારી ફ્લાઇટમાં બોમ્બ મૂક્યાની સૂચનાથી મચ્યો હડકંપ, યાત્રિકો ઇમરજન્સી વિન્ડોમાંથી કૂદ્યાં

દિલ્હીથી બનારસ જઈ રહેલી ઇન્ડિગો ફ્લાઈટમાં બોમ્બ હોવાની માહિતી મળતાં ખળભળાટ મચી ગયો. ઇન્ડિગો ફ્લાઈટ આજે એટલે કે મંગળવારે સવારે દિલ્હીથી બનારસ માટે ટેકઓફ કરવાની હતી, જ્યારે પ્લેનમાં બોમ્બ હોવાના સમાચાર મળ્યા. આ પછી તરત જ વિમાનનું ઇમરજન્સી ઇવેક્યુએશન કરાવવામાં આવ્યું.

ફ્લાઈટમાં બોમ્બ હોવાના સમાચાર મળતા જ મુસાફરો અને ક્રૂ મેમ્બર્સમાં ગભરાટ ફેલાઈ ગયો. આ લોકો એરપોર્ટ પર જ પ્લેનના ઇમરજન્સી એક્ઝિટમાંથી કૂદીને ભાગવા લાગ્યા. વિમાનમાં બોમ્બ હોવાની માહિતી મળ્યા બાદ, ફ્લાઈટને એક અલગ જગ્યાએ લઈ જવામાં આવી હતી, જ્યાં તમામ મુસાફરોને ઇમરજન્સી એક્ઝિટ કરાવવામાં આવી.

ઇન્ડિગો ફ્લાઈટમાં બોમ્બ હોવાની માહિતી મળતા જ એવિએશન સિક્યુરિટી અને બોમ્બ ડિસ્પોઝલ ટીમ તાત્કાલિક ઘટનાસ્થળે પહોંચી ગઈ. આ સિવાય CISFની 5 ટીમ પણ સ્થળ પર હાજર છે. દિલ્હી ફાયર સર્વિસે જણાવ્યું કે આજે સવારે 5:35 વાગ્યે દિલ્હીથી વારાણસી જઈ રહેલી ફ્લાઇટમાં બોમ્બ હોવાની માહિતી મળી. તમામ મુસાફરોને ઇમરજન્સી ગેટમાંથી બહાર કાઢવામાં આવ્યા. તમામ મુસાફરો સુરક્ષિત છે. ફ્લાઇટની તપાસ કરવામાં આવી રહી છે.

વધુ વાંચો: સ્વાતિ માલીવાલ મારપીટ કેસમાં બિભવ કુમારને ફટકો, જામીન અરજી કોર્ટે ફગાવી

હાલમાં ફ્લાઈટમાં ખરેખર બોમ્બ છે કે નહીં કે પછી તે ફેક કોલ છે કે કેમ તે તપાસ બાદ જ ખબર પડશે. જણાવી દઈએ કે આ પહેલા દિલ્હીની ઘણી શાળાઓને બોમ્બની ધમકી મળી હતી. આટલું જ નહીં, ગૃહ મંત્રાલયમાં બોમ્બ હોવાના સમાચાર પણ આવ્યા હતા, જે બાદમાં તમામ ફેક સાબિત થયા હતા.