IPLમાં લીગ રાઉન્ડની બધી જ મેચ રમાઈ ચૂકી છે. મુંબઈ ઇન્ડિયન્સ, દિલ્હી કેપિટલ્સ, સનરાઇઝર્સ હૈદરાબાદ અને રોયલ ચેલેન્જર્સ બેંગલુરુએ પ્લેઓફમાં એન્ટ્રી મેળવી લીધી છે.
દિલ્હી અને બેંગલુરુ પાસે પોતાનો પ્રથમ ખિતાબ જીતવાનો મોકો હશે, જ્યારે મુંબઈ ઇન્ડિયન્સની પાંચમી વાર અને સનરાઇઝર્સ હૈદરાબાદની નજર ત્રીજી વાર ચેમ્પિયન બનવા પર રહેશે. દુબઈમાં રમાનારા પ્રથમ ક્વોલિફાયરમાં આવતી કાલે પ નવેમ્બરે મુંબઈ-દિલ્હીની ટીમ ટકરાશે. ૬ નવેમ્બરે અબુધાબીમાં હૈદરાબાદ-બેંગલુરુ વચ્ચે એલિમિનેટર મેચ રમાશે.
મુંબઈ પાસે સતત બીજો ખિતાબ જીતવાની તક
ડિફેન્ડિંગ ચેમ્પિયન મુંબઈ ઇન્ડિયન્સે ગત સિઝનના ફોર્મને આ સિઝનમાં પણ જારી રાખ્યું છે. ચેન્નઈ સામે સિઝનની ઉદઘાટન મેચ હાર્યા બાદ ટીમે જબરદસ્ત વાપસી કરી અને સતત બીજી વાર પ્લેઓફમાં સ્થાન મેળવ્યું. આ ટીમ વર્તમાન સિઝનમાં ઘણી બેલેન્સ્ડ નજરે પડી છે. ટીમને બેટ્સમેન અને બોલર્સે અણીના સમયે પોતાના દમ પર જીત અપાવી છે.
ત્રણ બેટ્સમેન-ક્વિન્ટન ડિકોક, ઈશાન કિશન અને સૂર્યકુમાર યાદવ વર્તમાન સિઝનમાં ૪૦૦થી વધુ રન ફટકારી ચૂક્યા છે. ટીમના ત્રણ બોલર્સ સિઝનમાં સૌથી વધુ વિકેટ ઝડપનારા ટોપ-૧૦ની યાદીમાં સામેલ છે. મુંબઈએ સૌથી વધુ ચાર વાર (૨૦૧૩, ૨૦૧૫, ૨૦૧૭, ૨૦૧૯) ખિતાબ જીત્યો છે.
દિલ્હીની ટીમ સતત બીજી વાર પ્લેઓફમાં પહોંચી
દિલ્હીની ટીમે સિઝનની શરૂઆત થાય તે પહેલાં કેટલાક સારા ફેરફાર કર્યા. ફ્રેન્ચાઇઝીએ શિખર ધવન અને અજિંક્ય રહાણે જેવા બેટ્સમેનને પોતાની ટીમમાં સામેલ કર્યા. આર. અશ્વિન જેવા સ્પિનરને પોતાની ટીમ સાથે જોડ્યો. સિઝનમાં ૧૯ વિકેટ ઝડપી ચૂકેલા એનરિચ નેર્ત્ઝેને પણ ક્રિસ વોક્સના રિપ્લેસમેન્ટ તરીકે ટીમમાં સામેલ કર્યો. ટીમ મેનેજમેન્ટના આ બધા નિર્ણય સાચા સાબિત થયા. બોલિંગના દમ પર દિલ્હીએ સિઝનમાં છ વાર ટાર્ગેટ ડિફેન્ડ કર્યો.
દિલ્હીએ સતત બીજી વાર
પ્લેઓફમાં સ્થાન મેળવ્યું છે. ગત વર્ષે ક્વોલિફાયર-૨માં દિલ્હીની ટીમને સીએસકે સામે પરાજયનો સામનો કરવો પડ્યો હતો.
હૈદરાબાદે સતત પાંચમી વાર પ્લેઓફની ટિકિટ કન્ફર્મ કરી
હૈદરાબાદની ટીમ ૨૦૧૬ બાદથી સતત પાંચમી વાર પ્લેઓફમાં પહોંચી છે. ટીમ બે વાર (૨૦૦૯, ૨૦૧૬)માં ખિતાબ જીતી ચૂકી છે. વર્તમાન સિઝનની શરૂઆતમાં પાછળ રહ્યા બાદ ટીમે શાનદાર કમબેક કર્યું. છેલ્લી ત્રણ મેચ જીતીને વધુ સારા નેટ રન રેટના કારણે હૈદરાબાદે પ્લેઓફમાં સ્થાન મેળ્યું. કેપ્ટન ડેવિડ વોર્નરના નેતૃત્વમાં બેટ્સમેનોએ શાનદાર પ્રદર્શન કર્યું. વોર્નરે ૫૦૦, મનીષ પાંડે અને બેરિસ્ટોએ ટૂર્નામેન્ટમાં ૩૦૦થી વધુ રન બાવ્યા છે, જ્યારે રાશિદ ખાન, સંદીપ શર્મા અને ટી. નટરાજને ટીમને ભુવનેશ્વરની ખોટ સાલવા દીધી નથી. ભુવનેશ્વર ઈજાના કારણે ટૂર્નામેન્ટની બહાર થઈ ગયો હતો. ઈજાગ્રસ્ત મિચેલ માર્શના સ્થાને ટીમમાં સામેલ કરાયેલા જેસન હોલ્ડર (પાંચ મેચમાં ૧૦ વિકેટ)એ પોતાના ઓલરાઉન્ડ પ્રદર્શનથી ટીમને અંતિમ-૪માં પહોંચાડી છે.
૨૦૧૬ બાદ પહેલી વાર આરસીબી પ્લેઓફમાં
બેંગલુરુ પાસે પહેલી વાર ખિતાબ જીતવાની તક છે. અનુભવી અને યુવા ખેલાડીઓના શાનદાર પ્રદર્શનના કારણે ટીમ પ્લેઓફમાં પહોંચવામાં સફળ રહી છે. પહેલી વાર આઇપીએલમાં રમી રહેલા દેવદત્ત પડિક્કલે ટીમ તરફથી સૌથી વધુ ૪૭૨ રન બનાવ્યા છે. યુઝવેન્દ્ર ચહલ (૨૦ વિકેટ) સિઝનના ટોચના પાંચ બોલર્સની યાદીમાં સામેલ એકમાત્ર સ્પિનર છે. કેપ્ટન વિરા કોહલી (૪૬૦ રન) અને ડિવિલિયર્સ (૩૯૮ રન)એ ઘણી વખત ટીમને જીત અપાવનારું પ્રદર્શન કર્યું છે. આરસીબીએ કુલ ચાર વાર (૨૦૦૯, ૨૦૧૧, ૨૦૧૫, ૨૦૧૬) પ્લેઓફમાં સ્થાન મેળવ્યું છે અને ત્રણ વાર ફાઇનલમાં રમી છે.
પ્લેઓફ લાઇનઅપ
પ્રથમ ક્વોલિફાયરઃ (૫ નવેમ્બર) પોઇન્ટ ટેબલમાં ટોચની બે ટીમ- મુંબઈ ઇન્ડિયન્સ અને દિલ્હી કેપિટલ્સ વચ્ચે મુકાબલો. આ મેચમાં જીતનારી ટીમ સીધી ફાઇનલમાં પહોંચી જશે.
એલિમિનેટરઃ (૬ નવેમ્બર) ત્રીજા અને ચોથા સ્થાને રહેનારી- સનરાઇઝર્સ હૈદરાબાદ અને રોયલ ચેલેન્જર્સ બેંગલુરુની ટીમ ટકરાશે. આ મેચમાં જીતનારી ટીમ બીજા ક્વોલિફાયરમાં પહોંચશે અને હારનારી ટીમની સફર સમાપ્ત થઈ જશે.
ક્વોલિફાયર-૨: (૮ નવેમ્બર) પ્રથમ ક્વોલિફાયરમાં હારનારી અને એલિમિનેટરની વિજેતા ટીમ બીજા ક્વોલિફાયરમાં ટકરાશે. આ મેચમાં જીતનારી ટીમ ફાઇનલમાં પહોંચશે અને હારનારી ટીમની સફર સમાપ્ત થઈ જશે.
ફાઇનલઃ (૧૦ નવેમ્બર) પ્રથમ ક્વોલિફાયરની વિજેતા અને બીજા ક્વોલિફાયરની વિજેતા ટીમ વચ્ચે દુબઈમાં ખિતાબી મુકાબલો રમાશે.