ન્યાયિક રાહત / સગીરાના ગર્ભપાત માટે માતાપિતાની સંમતિ ફરજિયાત, પુખ્ત મહિલા પોતે નક્કી કરી શકે- HCનો ફેંસલો

• રેપનો ભોગ બનીને ગર્ભવતી બનનાર સગીરાના કિસ્સામાં હાઈકોર્ટનો મહત્વનો ચુકાદો
• સગીરાની મેડિકલ ટર્મિનેશન પ્રેગનન્સી માટે માતાપિતાની સંમતિ ફરજિયાત ગણાવી
• દિલ્હીમાં માતાપિતાએ સગીરાનો ગર્ભપાત કરાવવાનો કર્યો ઈન્કાર, કોર્ટે બાળ સંરક્ષણ ગૃહ મોકલી 

રેપનો ભોગ બનીને ગર્ભવતી બનનાર સગીરાના કિસ્સામાં એક મોટો ચુકાદો આપતાં દિલ્હી હાઈકોર્ટે એવું ઠરાવ્યું છે કે કોઈ પણ મેડિકલ ટર્મિનેશન ઓફ પ્રેગનન્સી માટે મહિલાની મંજૂરી જરુરી હોય છે પરંતુ સગીરાના કિસ્સામાં તેના માતાપિતાની જ મંજૂરીની જરુર હોય છે જો માતાપિતા ગર્ભપાતની મંજૂરી ન આપે તો ગર્ભપાત થઈ શકતો નથી. 

ગર્ભપાત કરાવવાનો ઈન્કાર કરનાર સગીરાને મોકલાઈ બાળ સંરક્ષણ ગૃહમાં 
સગીર તેમજ તેના વાલીએ ગર્ભપાત માટે સંમતિ આપવાનો ઈન્કાર કર્યા બાદ દિલ્હી હાઈકોર્ટે નિર્દેશ આપ્યો છે કે 14 વર્ષની ગર્ભવતી છોકરીને જરૂરી કાળજી માટે ચિલ્ડ્રન હોમમાં શિફ્ટ કરવામાં આવે. જસ્ટિસ અનુપ જયરામ ભાંભાણીએ જણાવ્યું હતું કે, 27 સપ્તાહની ગર્ભવતી અરજદાર ગર્ભાવસ્થાને પૂર્ણ મુદત સુધી લઈ જવા માંગતી હતી અને તેના વાલી ભાઈએ પણ સંમતિ આપી હતી. 

શું બની હતી ઘટના
દિલ્હીની સગીરા પર એક યુવાને રેપ કર્યો હતો જેને પરિણામે તે ગર્ભવતી થઈ હતી. હાલમા તે 27 અઠવાડિયાની ગર્ભવતી છે અને તેણે અને તેના ભાઈએ ગર્ભપાતનો ઈન્કાર કરીને બાળકને જન્મ આપવાની ઈચ્છા દર્શાવી હતી. 

માતાપિતાની સંમતિ હોય તો જ સગીરાનો ગર્ભપાત થઈ શકે 
હાઈકોર્ટે આ કેસમાં એવું ઠરાવ્યું કે મેડિકલ ટર્મિનેશન ઓફ પ્રેગનન્સીના સંદર્ભમાં કાયદામાં સ્પસ્ટ કહેવાયું છે કે ગર્ભપાત માટે ફક્ત મહિલાની સંમતિ જ જરુરી હોય છે જોકે સગીરાના કિસ્સામા વાલીઓની સંમતિ ફરજિયાત બની રહેતી હોય છે. કોર્ટે કહ્યું કે ગર્ભાવસ્થા એ સગીરા અને પોક્સો એક્ટ હેઠળ ગુનાહિત કાર્યવાહીનો સામનો કરી રહેલા પુરુષ વચ્ચેના શારીરિક સંબંધનું પરિણામ  હતું. 

પુખ્ત વયની મહિલા પોતે નક્કી કરી શકે

હાઈકોર્ટનું એવું માનવું છે કે પુખ્ત વયની મહિલાના કિસ્સામાં તે પોતે નક્કી કરી શકે કે ગર્ભપાત કરાવવો નહીં પરંતુ સગીરાના કિસ્સામાં તેના માતાપિતાની સંમતિ લેવી જરુરી છે.