નિવેદન / શિક્ષણ મુદ્દે સિસોદિયા અને વાઘાણી આમનેસામને, ગુજરાત શિક્ષણમંત્રીના મતવિસ્તારમાં શાળાની મુલાકાતે પહોંચ્યા આપ નેતા

• ગુજરાતમાં શિક્ષણ પર ગરમાયું રાજકારણ
• મનિષ સિસોદીયાએ ભાવનગરની શાળાની મુલાકાત લીધી
• ગુજરાતના શિક્ષણમંત્રીનો છે વિસ્તાર

છેલ્લા ઘણા સમયથી શિક્ષણ મુદ્દે રાજકારણમાં ગરમાવો જોવા મળી રહ્યો છે. આમ આદમી પાર્ટી અને ભાજપ વચ્ચે છેલ્લા ઘણા સમયથી ટ્વિટર વૉર ચાલી રહ્યું છે. શિક્ષણની સ્થિતિને લઇને બંને રાજ્યો એકબીજા પર આક્ષેપ પ્રતિઆક્ષેપ કરતા આવ્યા છે. ત્યારે દિલ્હીના શિક્ષણમંત્રી મનીષ સિસોદિયા આજે ગુજરાતની મુલાકાતે આવ્યા છે. તેઓએ ગુજરાતના શિક્ષણમંત્રી જીતુ વાઘાણીના મત વિસ્તારની મુલાકાત લીધી.  તેઓ ભાવનગરની એક શાળાની મુલાકાત લેવા પહોંચ્યા હતા.

શિક્ષણ વ્યવસ્થા ગુજરાતમાં ખૂબ ખરાબ છેઃ સિસોદિયા

દિલ્હીના શિક્ષણમંત્રી મનિષ સિસોદિયાએ  જીતુ વાઘાણીના વિસ્તારની સ્કૂલ નંબર 62 હારદાનગર સ્કૂલની મુલાકાત લીધી હતી. જે બાદ તેઓએ નિવેદન આપતા જણાવ્યું હતું કે હું આજે શાળાની વ્યવસ્થા જોવા આવ્યો છું. શિક્ષણમંત્રીના વિધાનસભા વિસ્તારની શાળાની હાલત જ દયનીય છે. તૂટેલી દીવાલો તથા મધ્યાહન ભોજનમાં બેસવાની કોઈ વ્યવસ્થા નથી. વધુમાં જણાવ્યું કે  વર્ગખંડમાં બેસવા માટેની પણ વ્યવસ્થા નથી, વિદ્યાર્થીઓ તૂટેલી દિવાલવાળા રૂમમાં અભ્યાસ કરી રહ્યાં છે. ગુજરાતમાં  શિક્ષણ વ્યવસ્થા ખૂબ ખરાબ છે તેમ  મનીષ સિસોદિયાએ જણાવ્યું હતું. સાથે જ ઉમેર્યુ હતું કે  દેશમાં ધર્મ જ્ઞાતિ પર રાજનીતિ ના થવી જોઈએ. 

ગુજરાતમાં શિક્ષણ વ્યવસ્થાના મામલે સોશિલ મીડિયામાં વાકયુદ્ધ

દિલ્લીના શિક્ષણમંત્રીએ આપેલા ચેલેન્જ બાદ સોશિયલ મીડિયામાં ભાજપ અને AAP વચ્ચે વાકયુદ્ધ શરૂ થવા પામ્યું હતું. શિક્ષણમંત્રી જીતુ વાઘાણીના સમર્થનમાં સોશિયલ મીડિયામાં શિક્ષણ સમિતિના સભ્યો અને પદાધિકારીઓએ 'મારી શાળા મારું ગૌરવ' નામથી પોસ્ટ શેર કરી હતી. આ સાથે પદાધિકારીઓ સારી શાળાઓની તસ્વીરો ટ્વીટર પર પણ પોસ્ટ કરી રહ્યા છે.

🚨 LIVE RAID of BJP's Gujarat Govt Schools in Education Minister's own constituency । #GujaratKeSchoolDekho https://t.co/87a5ean1bY

— Manish Sisodia (@msisodia) April 11, 2022

જીતુ વાઘાણીના સમર્થકો આવ્યા મેદાને 

ઉલ્લેખનીય છે કે, રાજ્યની કેટલીક શાળાઓના જર્જરિત દ્રશ્યો સામે આવ્યા બાદ શિક્ષણમંત્રી જીતુ વાધાણીના સમર્થકો મેદાને આવ્યાં હતાં. આ સાથે શિક્ષણ સમિતી સભ્યો અને પદાધિકારીઓએ  'મારી શાળા મારું ગૌરવ' નામથી સોશિયલ મીડિયામાં પોસ્ટ શેર કરી હતી. તેમજ સારી શાળાઓના ફોટા ટ્વિટર શેર કરીને વાયરલ કરાઈ રહ્યાં છે. 

જાણો શું હતો સમગ્ર મામલો ?

શિક્ષણ મામલે આમ આદમી પાર્ટી અને ભાજપ સામસામે આવી ગયા હતા. દિલ્હીના શિક્ષણમંત્રી મનીષ સિસોદિયાએ ગુજરાતના શિક્ષણમંત્રીને ખુલ્લો પડકાર ફેંક્યો હતો કે બંનેમાંથી કયા રાજ્યની શિક્ષણ વ્યવસ્થા મજબૂત છે તે અંગે ચર્ચા કરવાનો પડકાર મનીષ સિસોદિયાએ ફેંક્યો હતો. ગુજરાત ભાજપે દિલ્હીના શાળાઓ વિરુદ્ધ દિલ્હીના મુખ્યમંત્રી સામે ઉઠાવ્યા હતા, જેના જવાબમાં મનીષ સિસોદિયાએ ટ્વીટ કરીને જિતુ વાઘાણીને ચર્ચા માટે પડકાર ફેંક્યો હતો.