કોવિડ 19 / હાઇકોર્ટે કેજરીવાલ સરકારને ખખડાવી નાખી, કહ્યું - ન થાય તો કહી દો, દિલ્હી કેન્દ્રને સોંપી દઈએ

• ઓક્સિજન સંકટ મુદ્દે દિલ્હી હાઇકોર્ટ લાલઘૂમ
• કેજરીવાલ સરકારને આજની સુનાવણીમાં ઝાટકો નાખી 
• દિલ્હી હાઇકોર્ટે પાંચ કંપનીઓની સામે અવમાનના નોટિસ જાહેર કરી 

ઓક્સિજન સંકટની વચ્ચે દિલ્હી હાઇકોર્ટમાં આ મામલે સુનાવણી ચાલી રહી છે, શાંતિ મુકુન્દ હોસ્પિટલની અરજી પર આજે અદાલતે કેજરીવાલ સરકારને ખખડાવી હતી, અને ઑકિસજનની કાળાબજાર કરવાવાળાની ઉપર કડક એક્શન લેવાનું કહ્યું હતું, મહત્વનું છે કે આજે હાઇકોર્ટ દિલ્હી સરકાર પર ભારોભાર નારાજ થઈ ગઈ હતી, અને તેને કડક ટિપ્પણી કરતાં કહ્યું હતું કે દિલ્હી સરકારની સિસ્ટમ ફેઇલ થઈ ગઈ છે, આવી સ્થિતિમાં કહી દો કે જો તમે  પરિસ્થિતિ નથી સંભાળી શકતા તો અમને જણાવો જેથી અમે કેન્દ્રને સ્થિતિ સંભાળવા માટે કહીએ.

હોસ્પિટલનો વલોપાત, ઓક્સિજન આખરે છે જ ક્યાં?

મહત્વનું છે કે દિલ્હી શાંતિ મુકુન્દ હોસ્પિટલ દ્વારા આ મુદ્દે દિલ્હી હાઇકોર્ટમાં ધા નાખવામાં આવી હતી અને દાદ માંગવામાં આવી હતી કે તેને રોજના 3 મેટ્રિક ટન ઓક્સિજનની જરૂર છે, જો કે તેને એલોટ તરીકે 3.2 મે ટનની વાત થઈ છે, પરંતુ અમને માત્ર 2.69 મેટ્રિક ટન ઓક્સિજનની જ સપ્લાય થઈ છે, આવી સ્થિતિમાં દિલ્હી હાઇકોર્ટે હોસ્પિટલને સવાલ કર્યો હતો કે હાલમાં શું સ્થિતિ છે? જેના જવાબમાં હોસ્પિટલ દ્વારા જણાવાયું હતું કે દર્દીઓ મરી રહ્યા છે, સરકાર શું કરી રહી છે? અમે આ સરકારથી તંગ થઈ ગયા છીએ, ઓક્સિજન આખરે છે જ ક્યાં?

5 કંપનીઓની સામે અવમાનના નોટિસ જાહેર કરી 

દિલ્હી હાઇકોર્ટે આજે 5 ઓક્સિજન કંપનીઓની સામે અવમાનના નોટિસ જાહેર કરી હતી, એક કંપની સેઠ એયરના પ્રતિનિધિને દિલ્હી હાઇકોર્ટે કહ્યું કે  તમે હોસ્પિટલોને શું કામ ઓક્સિજન સપ્લાય નાથી કરી રહ્યા? તમે શું અમને મૂર્ખ સમજો છો?, કોર્ટે વધુમાં ટિપ્પણી કરતાં કહ્યું હતું કે એવું લાગી રહ્યું છે કે સેઠ એયર ક્યાંક બીજે ઓક્સિજન મોકલી રહ્યું છે, અથવા કાળાબજાર કરી રહ્યું છે, અમે દિલ્હી સરકારને આદેશ આપીએ છીએ કે તે આ કંપનીને ટેકઓવર કરે. 

આ સમય ગીધની જેમ વર્તન કરવાનો નથી 

દિલ્હી હાઇકોર્ટે આ સિવાય પણ એક અન્ય કંપનીના મામલે કહ્યું હતું કે આજે અમે જે ઓર્ડર પાસ કરવાના છીએ, જેમાં બધી જ જાણકારી હશે, જેનાથી હોસ્પિટલોને જાણકારી રહેશે કે ઓક્સિજન ક્યાંથી આવી રહ્યું છે, આ સમય ગીધની જેમ વર્તવાનો નથી.