નિવેદન / દહેગામ કોંગ્રેસના ઉમેદવારનો દાવો, કહ્યું કામિનીબા રાઠોડના ભાજપમાં જોડાવાથી પક્ષને કોઈ નુકસાન નહીં

• દહેગામ કોંગ્રેસના ઉમેદવાર વખતસિંહ ચૌહાણનો પ્રચાર
• કામિનીબા રાઠોડની ટીકીટ વહેંચણીનો આક્ષેપ ફગાવ્યો
• કામિનીબા રાઠોડના ભાજપમાં જોડાવાથી કોંગ્રેસને કોઈ નુકસાન નહી-વખતસિંહ

ગુજરાત વિધાનસભાની ચૂંટણી નજીક આવતા તમામ પક્ષોએ મતદારોને રીજવવા પ્રચાર શરૂ કરી દીધો છે. દહેગામ વિધાનસભા બેઠકના કોંગ્રેસના ઉમેદવાર વખતસિંહ ચૌહાણ પણ ડોર ટૂ ડોર પ્રચાર કરી રહ્યાં છે. જોકે આ જ બેઠક પર કામિનીબા રાઠોડને ટિકિટ ન મળતાં તેમણે કોંગ્રેસ પર ટિકિટ પૈસાથી વહેંચી હોવાના આક્ષેપો લગાવ્યાં હતા. આ તરફ હવે કોંગ્રેસના ઉમેદવાર વખતસિંહ ચૌહાણે કામિનીબા રાઠોડના તમામ આક્ષેપો ફગાવ્યાં છે. આ સાથે તેમણે કહ્યું કે, કામિનીબા રાઠોડના ભાજપમાં જોડાવાથી કોંગ્રેસને કોઈ નુકસાન નહી. 

ગાંધીનગરની દહેગામ વિધાનસભા સીટ ઉપર કોંગ્રેસના કામિનીબા નારાજ થયા બાદ રાજકારણ ગરમાયું હતું. જોકે કોંગ્રેસના ઉમેદવાર વખતસિંહ ચૌહાણ પણ ડોર ટૂ ડોર પ્રચારમાં જોતરાઈ ગયા છે. આ દરમ્યાન તેમણે કામિનીબાના આક્ષેપો ગફવતા કહ્યું હતું કે,કામિનીબા રાઠોડના ભાજપમાં જોડાવાથી કોંગ્રેસને કોઈ નુકસાન નહીં થાય. કોંગ્રેસ ઉમેદવાર વખતસિંહ ચૌહાણે દહેગામ બેઠક પર જીતનો વિશ્વાસ પણ વ્યક્ત કર્યો હતો. આ સાથે તેમણે કહ્યું હતું કે, અમે દહેગામ તાલુકામાં વિકાસ અને સિંચાઈના પ્રશ્નને પ્રાધાન્ય આપીશું. 

કામિનીબા ભાજપમાં જોડાયા

કોંગ્રેસથી લાંબા સમયથી નારાજ કામિનીબા રાઠોડ કોંગ્રેસમાંથી રાજીનામું આપીને આજે ભાજપમાં જોડાઈ ગયા છે. મહત્વનું છે કે, કોંગ્રેસમાંથી ટિકિટ ન આપતા કામિનીબા નારાજ હતા અને કામિનીબા રાઠોડે અપક્ષ ઉમેદવારી નોંધાવી હતી. ત્યારબાદ ગતરોજ અપક્ષ ઉમેદવારી ફોર્મ પરત ખેંચી લીધું હતું અને આજે વિધિવત રીતે ભાજપમાં જોડાઈ ગયા હતા. ભાજપનો ખેસ ધારણ કર્યા બાદ કામિનીબા રાઠોડે પ્રતિક્રિયા આપી છે.

શું કહ્યું હતું કામિનીબાએ ? 

ભાજપમાં જોડાયા બાદ કમિનીબાએ જણાવ્યું કે, વડાપ્રધાન નરેન્દ્ર મોદીની વિચારધારાથી પ્રેરિત થઈને હું આજે ભાજપમાં જોડાઈ છું. કોંગ્રેસની અંદર સાચા અને સારા માણસોની કદર થતી નથી. પક્ષમાં એક મહિલા તરીકે મેં સવિશેષ કામગીરી કરી છે, છતાં કોંગ્રેસે તેની કદર કરી નથી. ઉપર જતાં મારી પર આક્ષેપબાજી અને આરોપો લગાવવામાં આવ્યા. મહિલાની મદદે આવવાને બદલે કોર્ટની નોટિસ ફટકારવાની ધમકીઓ આપવામાં આવી અને મહિલાનો અવાજ દબાવવા પ્રયાસ કરાયો છે. આવી પાર્ટીમાં રહેવું મને યોગ્ય લાગતું નથી.